Albin Kurti, t’lumshin duart!
Hyrja në Zyra e kryetarëve të rinjë të katër komunave në veri të Kosovës u ndesh me një revoltë të egër popullore serbe e cila u shoqërua me një reagim po aq të egër të Presidentit të Serbisë, Aleksandar Vuçiç, i cili nisi ushtrinë në drejtim të Kosovës, dënimin e veprimit të Qeverisë Kurti dhe mbështetje ndërkombëtare për serbët që sulmuan Policinë e Kosovës e cila ishte angazhuar për ruajtjen e rendit dhe qetësisë publike, dhe në fund mbështetje të parezervë për veprimet e Vuçiçit edhe nga ana e Kryeministrit të Shqipërisë, Edi Rama!
Nëse kësaj i shtojmë dhe sulmin e mediave në Kosovë kundër veprimeve të Albin Kurtit, mesnata nuk ishte shpresdhënëse ndonëse forcat e Policisë së Kosovë po ruanin godinat e institucioneve kosovare që ishin në shënjestër të bandave serbe!
Nata e gjatë e Albinit!
“Veprimet e Policisë së Kosovës ndaj strukturave ilegale e bandave kriminale të Vuçiqit janë legjitime, në realizim të detyrave të tyre kushtetuese dhe në mbrojtje të të gjithë qytetarëve, pa dallim,” u shprehë qartë Presidentja e Kosovës, Vjosa Osmani, e prerë se qëndrueshmëria, jetëgjatësia dhe suksesi i këtyre veprimeve varen njëkohësisht edhe nga koordinimi me aleatët që ishin dhe mbeten garantues të sovranitetit dhe pavarësisë së Kosovës.
Por, sa vlenë kjo, kur Sekretari amerikan i Shtetit, Antony Blinken, dënoi ashpër veprimet e Qeverisë së Kosovës, siç tha, “për të hyrë me forcë në ndërtesat e komunave në veri të Kosovës”, dhe, po kaq ashpër e dënoi edhe Kryeministri i i Shqipërisë, Edi Rama, gjë që krijoi një situatë të frikshme ndër shqiptarë!
Nëse Albin Kurti duhet të fajësohet për këtë veprim, e vetmja gjë jologjike që nuk përkonte me një aksion të mirëfilltë ligjor ishte data e përzgjedhur, 26 maj, meqë Presidenti i Serbisë, Aleksandar Vuçiç e kishte paralajmëruar një miting kombëtar në Beograd, shumë javë më parë!
Për përrallat e antisovranistëve me rivalët e tyre, Kroacia kur nisi aksionin “Oluja” për zgjidhjen e çështjes serbe, të gjithë ndërkombëtarët i kishte kundër e kufinjtë as që i kishte të përcaktuar, dhe vetëm me vendosmërinë e Presidentit Franjo Tuxhman operacioni u krye me sukses ndërsa kufinjtë u përcaktuan pak para anëtarësimit në BE.
Gjithçka tjetër, mbrëmë, ishte ashtu siç e kishte përkufizuar Presidentja e Kosovës në reagimin e saj, duke ju referuar Nenit 2. të Kushtetutës:
“Sovraniteti dhe integriteti territorial i Republikës së Kosovës është i pacenueshëm, i patjetërsueshëm dhe i pandashëm, ndaj mbrohet me të gjitha mjetet e përcaktuara me Kushtetutë dhe me ligj.”
Në këtë situatë, kur opinionit kosovar ju servir një realitet ku Albin Kurti ishte fajtori kryesor dhe ishte ai që donte të na “prishë me Amerikën” ndërsa nga ana tjetër gjithçka varej nga veprimi dhe profesionalizmi i Policisë së Kosovës që tashmë janë në godinat e komunave në veri, kjo patjetër që ishte nata më e gjatë e Albin Kurtit deri sa mëngjesi i 27 Majit do të vinte me qetësi apo dhe me viktima që nuk i uronte njeri, por vetëm njëri ti kishin drejtu gishtin: Kryeministrit të Kosovës!
Albini i vetmuar
Pavarësisht se bandat serbe sulmuan Policinë e Kosovës dhe ajo u dënua nga shtetet e Quintit – SHBA, Mbretëria e Bashkuara, Gjermania, Franca dhe Italia – dhe, Kryeministri i Shqipërisë, Edi Rama, pavarësisht se kryetarët e rinjë që pretendonin të futen në zyrat e tyre kishin dalë nga zgjedhjet e rregullta por që ishin bojkotuar nga Lista Srpska që kontrollohet nga Presidenti i Serbisë, dhe, pavarësisht se ishin po këto ndërkombëtarë që pranuan pushtetin lokal të dalë nga zgjedhjet e vitit 2019 në Shqipëri me vetëm 6-15 për qind të mbështetjes së qytetarëve, ata mbrëmjen e 26 Majit, Albin Kurtin e lanë të vetmuar madje edhe e dënuan vetëm pse ai zbatoi ligjin!
Mëngjesin e sotëm, Albin Kurti është ndryshe, me situatën e qetë që mbretëron në veri ai e arsyetoi veprimin e tij në zbatueshmërinë e ligjit, ai madje i bëri thirrje edhe qytetarëve serbë që të bashkëpunojnë me kryetarët e rinjë dhe kabinetet e tyre, të cilat do të jenë multietnike, multikulturore, multigjuhësore dhe multipartiake sepse ata janë të zgjedhur dhe nuk janë kundër askujt, por në shërbim të të gjithëve.
“Rrugët në veri janë që të gjitha të hapura e të qarkullueshme për qytetarët. Komunat dhe kryetarët duhet të punojnë shumë sepse kemi shumë punë për të bërë për qytetarët,” tha mëngjesin e sotëm me plotë krenari Kryeministri i Kosovës, Albin Kurti, për jetëgjatësinë e së cilës situatë normalisht do të jetë sërish Albini i vetmuar!
Sot, duhet ta pranojmë se Kryeministri i Kosovës, Albin Kurti, nuk është i vetmuar si mbrëmë dhe lirisht mund t’i themi siç e don dhe tradita shqiptare, “T’lumshin duart”, por pse doli vetëvetja shumë kohë më parë e ka përkufizuar filozofi gjerman, Arthur Schopenhauer:
“Njeriu mund të jetë vetëvetja përderisa është vetë; Dhe, nëse nuk e don vetminë, nuk do ta don as lirinë; sepse vetëm kur është vetë ai është vërtetë i lirë. Vetëpërmbatja dhe kufizimi gjithmonë janë prezent në shoqëri, si ai shoku të cilin nuk mund ta heqësh qafe; Dhe, proporcionalisht me madhësinë e individualitetit njerëzor, do të jetë e vështirë që të mbajë mbi supe viktimat që çdo shoqërim i kërkon.”
