“Ditët e Reçakut”, Kurti: Varret janë në tokë, vrragët në shpirt, kurse vrasësit ende në liri në Serbi

26 vjet më parë u ndeshën njerëzorja dhe mizorja, tha sot në Reçak Presidentja e Kosovës, Vjosa Osmani, në Akademinë përkujtimore për Masakrën e Reçakut, ndërsa Kryeministri Albin Kurti duke konstatuar se sot varret janë në tokë, vrragët në trup e në shpirt, kurse vrasësit ende në liri në Serbi, e ajo që duhet të ndodhë është drejtësia, gjykimi dhe ndëshkimi i kriminelëve.

“Në një ditë të zymtë të janarit 99-të 45 banorë të Reçakut ndër të cilët burra, gra e të moshuar u masakruan nga regjimi gjenocidal i Serbisë duke shpërfaqur kështu fytyrën e egër të gjenocidit dhe shtypjes.

Reçaku nuk është vetëm një tragjedi që lidhet vetëm me këtë fshat dhe banorët e tij, por një dëshmi e vuajtjeve të gjata të popullit tonë i cili kërkonte dhe luftonte për liri dhe për të drejtën në ekzistencë,” tha Vjosa Osmani duke rikujtuar se si pamjet e asaj masakre tronditën botën dhe prekën ndërgjegjen ndërkombëtare e mobilizuan diplomacinë, krejt kjo në saje të mikut tonë të madh ambasadorit William Walker i cili me guxim dhe përkushtim i dha zë të vërtetës së pamohueshme të vuajtjeve të popullit tonë.

“Ai dëshmoi para botës atë që e pa me sytë e tij. Mizoritë e paimagjinueshme të cilat regjimi gjenocidal serb i kreu mbi popullsinë e pa mbrojtur shqiptare këtu në Reçak dhe ku do në Kosovë.

Sot ambasadori Walker i cili është në mesin tonë mbetet një simbol i ndërgjegjes njerëzore dhe i drejtësisë ndërkombëtare, ndaj edhe kisha nderin që në tetor të viti të kaluar ta dekoroja atë me medaljen presidenciale të lirisë në emër të popullit të Republikës së sonë. Fjalët e thëna me vendosmërinë nga ambasadori Walker, tronditën opinion publik ndërkombëtar dhe ishin thirrje për veprim të menjëhershëm,” tha Presidentja e Kosovës, Vjosa Osmani duke përfunduar:

“Kjo hapi edhe rrugën për ndërhyrjen e NATO-s e cila bashkë me luftën çlirimtare të bijve dhe bijave të Kosovës, vajzave dhe djemve të ushtrisë sonë çlirimtare e bënë Kosovën të lirë.”

Kurti: Gjykim dhe ndëshkim kriminelëve

Ndërsa Kryeministri i Kosovës, Albin Kurti, duke theksuar se varret janë në tokë, vrragët në trup e në shpirt, kurse vrasësit ende në liri në Serbi, shtoi se krimet e kryera gjatë luftës nuk ka qenë e thënë të ndodhin, nuk është dashur të ndodhin, ajo që duhet të ndodhë për pasojë është drejtësia, gjykimi dhe ndëshkimi i kriminelëve qoftë edhe në mungesë.

“Jemi në Reçak për të nderuar kujtimin për 45 civilët e pafajshëm e të pa armatosur të vrarë si dhe për të ripërtërirë zotimin tonë për të mos harruar kurrë masakrën e 15 janarit 1999,” tha Albin Kurti duke përsëritur edhe me këtë rast se Ambasadorit Wiliam Walker i jemi përjetësisht mirënjohës për humanizmin dhe kontributin e tij gjatë kohës më të vështirë për popullin tonë.

“Deklaratat e zotit Walker ishin denoncime zyrtare në emër të komisionit verifikues të OSCE-së ndaj forcave dhe autoriteteve serbe që po kryenin krime kundër njerëzimit dhe krime lufte ndaj shqiptove civil në Kosovë. Këto raportime ekspozuan brutalitetin që po përballonte Kosova dhe ndryshuan diskursin ndërkombëtar ndaj luftës në vendin tonë,” tha Kryeministri Kurti duke u shprehur krenar që Qeveria e Kosovës e ka mundësuar botimin e librit të Ambasadorit Walker me dëshmi të fuqishme dhe prekëse mbi tmerrin e masakrës së Reçakut.

“Përtej së qenit një dokument historik është edhe një thirrje për kujtesë kolektive dhe për drejtësi. Sot përkujtojmë qëndresën e të gjitha familjeve të Reçakut e anë e kënd Kosovës që dhanë më të dashurit për lirin e vendit,” tha Kryeministri i Kosovës duke folur për librin, që sipas tij, është dhe një urë që lidh brezat përmes kujtesës historike, është trashëgimi për brezat e rinj që të njohin luftën së cilës i mbijetuam dhe plagët që ajo na i la pas.

“Familjarët dhe institucionet e Kosovës bashkë i nderojmë jetët njerëzore që u shuan nga vrasjet e kryera nga regjimi fashist i Slobodan Milosheviçit dhe i autoriteteve të tjera të Serbisë urdhërdhënëse e ekzekutore jo pak prej të cilave janë ende në pushtet në serbi.

Republika jonë dhe populli ynë është i vendosur e vërteta mos të harrohet kurrë e të mos deformohet asnjëherë dhe që përgjegjësit për gjenocidin të përballën me drejtësinë,” tha Kryeministri i Kosovës, Albin Kurti, duke përfunduar:

“Bashkë angazhohemi që historia e Kosovës dhe liria jonë të jenë shembull i forcës së popullit për të triumfuar mbi padrejtësinë. I përjetshëm qoftë kujtimi për secilën jetë të dhënë në rrugën tonë për çlirimin e Kosovës dhe lirinë e popullit të saj. Lavdi martirëve dhe dëshmorëve të kombit.”

Walker: Reçaku për mua përfaqëson diçka shumë të rëndësishme

Ambasadori William Walker tha se sot është me të kujtesa e asaj se çka ka ndodhur para 26 viteve.

“Unë thjesht i tregova botës se çka pashë dhe kush është përgjegjës për atë se çka ka ndodh aty,” tha Ambasadori Walker duke kërkuar falje që libri i tij për Reçakun doli 25 vite më vonë, por u shpreh i kënaqur që më në fund ky libër u mundësua dhe që Kryeministri dhe Presidentja i kanë treguar që ky libër do të jetë një vlerë sa i përket rinisë dhe popullatës së Kosovës.

Walker u shpreh se për të, Reçaku përfaqëson diçka shumë të rëndësishme, të ardhmen e Republikës së Kosovës ndërsa e pranoi se ishte shumë krenar që ka qenë pjesë e stories së Kosovës.

Përfaqësuesi i shoqatave të dala nga lufta e Ushtrisë Çlirimtare të Kosovës dhe kryetari i fshatit, Adem Ramadani, tha se Reçaku nuk është vetëm e kaluara.

“Është edhe e sotmja jonë dhe do të mbetet edhe e ardhmja jonë e lavdishme do të reflektojë në kujtesën tonë krimet brutale dhe gjenocidin ndaj popullit shqiptar në mënyrë që një krim i tillë të mos harrohet dhe të mos përsëritet më askund,” tha Adem Ramadani duke përfunduar:

“Ne do të qëndrojmë të fuqishëm dhe do të mburremi për qëllimin e flijimit dhe qëndresës heroike përballë hordhive të etura për shuarjen e familjeve tona në trojet stërgjyshore.”

Ndryshe, sot në Komunën Shtime u mbajt Akademia përkujtimore për nderë të viktimave të Masakrës së Reçakut.

Në orët e hershme të mëngjesit të 15 janarit të vitit 1999, Reçaku u zgjua i rrethuar nga forcat policore dhe paraushtarake serbe. Sipas dëshmitarëve, rreth orës 6:30 forcat serbe me artileri të rëndë kanë filluar të bombardojnë fshatin. Pas ndërprerjes së bombardimeve, forcat serbe janë futur në fshat dhe kanë filluar bastisjet duke lënë 45 shqiptarë të paarmatosur të masakruar barbarisht, shkatërrim dhe vatra të djegura shqiptare.

Ish-Shefi i misionit vëzhgues të OSBE-së në Kosovë, Ambasadori William Walker, e pati cilësuar Masakrën në Reçak si krim kundër njerëzimit.

Masakra në Reçak tmerroi botën dhe zgjoi ndërgjegjen e diplomacisë botërore për planin gjenocidal që kishte krimineli serb Slobodan Milosheviç, duke u mobilizuar për Kosovën. 

Pas Masakrës së Reçakut u zhvillua konferenca ndërkombëtare për Kosovën në Rambuje, dështimi i së cilës pasoi me ndërhyrjen e NATO-së kundër forcave ushtarake serbe, largimin e tyre nga Kosova dhe vendosjen e administratës ndërkombëtare në Kosovë.