DPA çel Kinemanë Verore, Bido: Do të shfaqen 10 filma që risjellin epopenë e LANÇ

Me rastin e Vitit Mbarëkombëtar të 80-vjetorit të Çlirimit, kinemaja verore e Drejtorisë Përgjithshëm të Arkivave çeli siparin e sezonit artistik me shfaqjen e filmit “Tomka dhe shokët e tij”, ku do të vazhdohet dhe me realizimet filmike që i referohen Luftës Nacionalçlirimtare.

Përmes kësaj nisme tha Drejtori i Përgjithshëm i Arkivave, Ardit Bido, tha se DPA synon të përcjellë një mesazh me rëndësi kombëtare.

“Ne nisim sot një seri aktivitetesh, në kuadër të 80-vjetorit të Çlirimit. Këto aktivitete do të zhvillohen këtu, në Drejtorinë e Përgjithshme të Arkivave, por do të mbahen nga DPA-ja kudo nëpër Shqipëri. Me rastin e këtij viti me rëndësi kombëtare, ne përcjellim një mesazh shumë të rëndësishëm: kur atdheu është në rrezik, të rinjtë duhet të dalin përballë tij,” tha Ardit Bido duke fol për momentin e përcjelljes së këtijë mesazhi.

“Do të shfaqen 10 filma që risjellin epopenë e Luftës Antifashiste Nacionalçlirimtare. Lavdi dëshmorëve të Atdheut,” tha Drejtori i DPA-së ndërsa Drejtoresha e Arkivit Qendror Shtetëror të Filmit, Marinela Ndria. duke vlerësuar bashkëpunimin me DPA-në në këtë përvjetor të rëndësishëm për vendin vlerësoi dhe përzgjedhjeb e filmave.

“Jam shumë e lumtur që një listë e përzgjedhur filmash do të shfaqet në DPA. 80-vjetorin e Çlirimit e nisim me ‘Tomka dhe shokët e tij’. Në vijim do të kemi filma, si: ‘Lulëkuqe mbi mure’, ‘Nusja dhe shtetrrethimi’, ‘Gjenerel Gramafoni’ etj. Këto filma do të jenë të restauruar. Përmes tyre do mësojmë jo vetëm mbi historinë e vendit, por edhe do të risjellim muzikën, që i është kushtuar Luftës Nacionalçlirimtare,” tha drejtoresha e AQSHF-së, Marinela Ndria.

Kalendari i aktiviteteve të Kinemasë Verore pranë DPA-së do të zgjasë deri në muajin nëntor. Repertori i filmave të përzgjedhur do të risjellë në vëmendjen e publikut kryeqytetas disa prej realizimeve artistike të kinematografisë shqiptare. Mes 10 filmave që do të shfaqen, si një përkujtesë të betejës së vendit për çlirimin nga pushtuesit nazifashist, bëjnë pjesë: “Partizani i vogël Velo”, “Mëngjese lufte”, “I teti në bronz”, “Njeriu me top”, “Malet me blerim mbuluar” etj.

Në kuadër të këtij jubileu kombëtar, DPA zotohet se do të angazhohet edhe përmes prezantimit të ekspozitave, publikimit të albumeve fotografike dhe të botimeve, në lidhje me tematikën e betejës të të parëve për liri ndaj thundrës së pushtuesve.

Ndryshe, Kinemaja Verore, e cila zotëron një kapacitet prej 140 ulësesh i adresohet veçanërisht të rinjve, përmes një shërbimi që ndërthur edukimin me zbavitjen. Jetësimi i kësaj hapësire vjen në vazhdën e nismave të herëpashershme të DPA-së, në funksion të inkurajimit të nxënësve dhe të studentëve për të njohur historinë dhe trashëgiminë dokumentare kombëtare.