Festivali i Filmit në Sarajevë, Norika Sefa e fiton çmimin për dokumentarin më të mirë të shkurtër

Regjisorja nga Kosova, Norika Sefa, e ka fituar çmimin për dokumentarin më të mirë të shkurtër në Festivalin e Filmit në Sarajevë, me filmin e saj “Like a sick yellow”/ Lexo shqip: Si e verdhë e sëmurë/.

Ky është çmimi i dytë që Sefa e fiton me këtë film brenda këtij muaji, pasi “Like a sick yellow” u zgjodh filmi më i mirë kombëtar në festivalin ndërkombëtar të filmit të shkurtër dhe dokumentar “Dokufest”, më 10 gusht në Prizren, raporton RFE.

Kryeministri i Kosovës, Albin Kurti, dhe ministri i Kulturës, Hajrullah Çeku, e uruan Norika Sefën për çmimin e fituar në festivalin e Sarajevës.

“Urime Norikës dhe gjithë ekipit të prodhimit për këtë çmim kulmor dhe fitore shumë domethënëse,” shprehet Albin Kurti përmes rrjetit social Facebook.

Ministri Çeku duke vlerësuar çmimin e fituar nga Norika Sefa si një arritje tjetër, shton se kjo “shpërfaq potencialin e jashtëzakonshëm që ka vendi ynë”.

Ndërkohë, çmimin kryesor në Festivalin e Sarajevës në Bosnje Hercegovinë e fitoi filmi “Three kilometers to the end of the world”, i regjisorit nga Rumania Emanuel Parvu, pasi e mori çmimin “Zemra e Sarajevës” për filmin më të mirë artistik.

Ndryshe, ky ishte Festivali i 30-të i Filmit në Sarajevë dhe përfundoi mbrëmjes e së premtes me ceremoninë e ndarjes së çmimeve, raporton RFE. Gjatë festivalit u shfaqën më shumë se 250 filma nga e gjithë bota.