Hetimet për video-përgjimin/ Detajet, pas Dëshmitarit X, ja kur do të deponojnë 3 zyrtarët e PD

Prokuroria e Tiranës ka nisur lëvizjet pas identifikimit të “bashkëpunëtorit X” në audio-përgjimin e publikuar nga PD.

Ai u vetëidentifikua dje në një video dëshmi, ku pranonte njohjen me Agron Xhafajn, dëshminë e tij në përgjim por nuk ka pranuar se e ka regjistruar ai përgjimin.

Një ditë pas shoqërimit në Polici të Albert Veliut, prokuroria e ka marre sot në pyetje i shoqëruar nga avokati Ivi Kaso.

Organi i akuzës ka nisur hetimet pas padisë penale të Agron Xhafajt, për kallëzim të rremë ndaj Albert Veliut. Pak ditë më parë, vëllai i ministrit të Brendshëm, Agron Xhafaj, depozitoi në organin e akuzes padinë pas audio-përgjimit të publikuar ku pretendon se aty nuk është zëri i tij.

Veliu gjatë marrjes dje në pyetje në Polici ka konfirmuar gjithcka ka thënë në video.

Personi që njihet si “Bashkëpunëtori X” u mor në pyetje sot nga prokurori Genci Qana.

Ditën e enjte, në një video të publikuar nga selia e Partisë Demokratike, Veliu bëri të ditur idenitetin e tij, teksa tha se i është kërcënuar familja pas audiopergjimit dhe se ai është i vërtetë, pasi ajo bisedë me Agron Xhafaj është bërë. Por sipas tij nuk është ai autor i përgjimit.

Sakaq, Prokuroria e Përgjithshme ka vendosur të thërrasë ditën e hënë tre zyrtarët e PD që publikuan audiopërgjimin për vëllain e ministrit të Brendshëm Fatmir Xhafaj, Agron Xhafajn, me pretendimin se aty dëgjohet zëri i tij teksa flet me “bashkëpunëtorin X” për pazare droge.

Shkresa e Prokurorisë, që specifikon ditën e hënë të 21 majit në orën 10:00, ka mbërritur në selinë e PD dhe kërkon të paraqiten pranë organit të akuzës deputetët Ervin Salianji, Enkelejd Alibeaj dhe zyrtari Gazmend Bardhi.

Ata do të pyeten nga prokurorët P. Kulluri G.Osmanaj.