Korrupsion, pastrim parash, kreu i SPAK: Patjetër që ka, duhet…

Kreu i SPAK, Arben Kraja e pranoi para Këshillit Kombëtar të Integrimit se korrupsioni dhe pastrimi i parave është një fenomen i pranishëm, ashtu siç e pranoi se ishte kundër OFL ndërsa raportoi me krenari se Prokuroria e Posaçme që ai drejton në vitin 2021 ka bllokuar 70 mln euro asete të krimit të organizuar deri sa buxheti i kësaj prokurorie është rreth 6 milionë euro.

I pyetur për 21 Janarin tha se nuk mund të japë përgjigje.

“Nga perceptimi ynë padiskutim që ka korrupsion në të gjitha strukturat, në të gjitha fushat. Duhet punë e madhe për t’i luftuar dhe duhet një koordinim i gjithanshëm . Ne si prokurori kemi pasur prioritet pjesën e korrupsionit, hetime të zyrtarëve të nivelit të lartë,” tha Kraja duke shtuar se ka një nivel të lartë bashkëpunimi me strukturat e tjera ligjzbatuese në vend dhe ndarje të informacioneve të vlefshme.

“Kemi vendosur kontakte dhe kemi bashkëpunim shumë të mirë me të gjitha strukturat e larta të shtetit. Shkëmbejmë informacione. Në bashkëpunim me KLSH kemi ndjekur të gjitha çështjet që lidhen me fenomenet e fondeve publike, nga ku kërkojmë informacion nga KLSH. Kemi pika kontakti të përbashkëta.”

I pyetur nga deputeti i PD, Enkelejd Alibeaj, nëse struktura që ai drejton ka qenë e mbingarkuar apo jo nga operacioni i OFL-së në vitin 2020, Kraja ishte i prerë:

“OFL ka qenë një mbingarkesë pune dhe ka pasur shumë problematika. Ne si prokurori kemi qenë kundër. Ka pasur mbingarkesë për arsye të afateve shumë precize që kishte për tu zbatuar. Në kushte të tilla ne na u desh ti bënim prioritet. Kanë qene 251 raste të referuara nga policia dhe vazhdon hetimi për disa raste që janë kërkesë për konfiskim,” tha kreu i SPAK duke folur në fund edhe për efektivitetin e SPAK.

“Gjatë vitit 2021, kemi arritur të konfiskojmë pasuri të paluajtshme, makina dhe monetare rreth 70 milionë euro. Ndërkohë që buxheti i SPAK për një vit është 6 milionë euro. Në këtë sens jemi munduar të jemi efektiv, padyshim ka shumë për të bërë sepse është strukturë e re që po krijohet, kjo kërkon edhe mentalitet, ngritja e një strukturën të nivelit të dytë.”