Ministrat dhe kryebashkiakët e PS që rrezikohen nga “llogaridhënia”, premtimet dhe denoncimet online

Kryeministri Edi Rama dhe më pas Kreu i Grupit Parlamentar socialist Taulant Balla kanë paralajmëruar ndryshime në kupolën drejtuese të Partisë Socialiste, qeveri, por edhe për kandidatët për kryetarë të bashkive në zgjedhjet e ardhshme vendore.

Sipas drejtuesve më të lartë të PS-së, i gjithë proçesi do të kalojë përmes asaj që socialistët e konsiderojnë si “llogaridhënia përpara publikut”.

Takimet me qytetarë të organizuara me kujdes kanë nisur në 1 maj, që përbën edhe fazën e parë të proçesit të paralajmëruar.

Paralelisht do të zhvillohen anketime lidhur me ministrat, kryetarët e bashkive dhe drejtuesit kryesorë të institucioneve në nivel lokal dhe qendror, lidhur me performancën e institucioneve, përmbushjen e premtimeve apo në raport me pritshmëritë.

Zyrtarisht mësohet se po përpunohen të dhënat e mbledhura përmes portalit që Edi Rama e ka pagëzuar “Portali i Bashkëqeverisjes”.

Rama po e shet në publik këtë inisiativë, të nisur në tetor 2017, si një risi, por në fakt një portal i ngjashëm ka qenë në funksion prej 2015-ës, ku qytetarët ftoheshin të denonconin rastet e korrupsionit. Në atë kohë, inisiativa ishte e Ramës dhe e Bled Çuçit, që mbante postin e ministrit të Pushtetit Vendor.

Rezultatet nuk ishin shumë larg pritshmërive, jo se mungonte informacioni apo denoncimi, porse në shumicën e rasteve, ato ose “asgjesoheshin” ose nuk u shkohej deri në fund për shkak të implikimeve të zyrtarëve të niveleve të ndryshme. Madje ka dyshime që një pjesë e denoncimeve shërbenin edhe për të bërë presion brenda llojit apo për presion politik mes aleatëve.

Referuar disa të dhënave qeveritare, në “portalin e bashkëqeverisjes”, që duket se këtë rradhë do të përdoret për “prerje kokash” në rradhët e socialistëve, apo spastrim të administratës nga ato që Rama i konsideron “të papërshtatshëm për të përfaqësuar socialistët, apo qytetarët që votëbesuan qeverinë e tij” , denoncimet kryesore kanë të bëjnë me ALUIZNI-n, Hipotekat, spitalet, mbifaturimet e energjisë dhe ujit, burgjet.

Pothuajse në të njëjtat nivele janë denoncimet lidhur me funskionimin e njësive vendore, shërbimeve online, mungesës së transparencës dhe moskthimit të përgjigjeve në kohë nga institucionet lidhur me problemet që ngrihen.

Të gjitha këto të dhëna dhe të tjera që do të denoncohen në kuadër të takimeve me qytetarët do të përbëjnë bazën e analizës dhe vlerësimit për ministra e kryebashkiakë.

Gjithashtu pohohet se në një fazë të mëvonshme do të ketë anketime të drejtpërdrejta për figurat e kryebashkiakëve në detyrë, të cilat duket se do të përdoren për të vendosur se cilët prej tyre nuk do të rikandidohen nga socialistët.

Në selinë e socialistëve askush nuk mund të thotë sot me siguri se cilët do të jenë ministrat qëdo të largohen në shtator apo se cilët kryebashkiakë do të humbasin të drejtën e një rikandidimi, ndërsa duket se gjithçka do të vendoset nga Rama me një konsultë me drejtuesit e qarqeve dhe kryesinë e grupit parlamentar.

 

Premtimet e pambajtura

 

Nëse realisht ndryshimet në qeveri do të bazohen mbi performacën në raport me premtimet, i pari që rrezikon postin është vetë Kryeministri.

Premtimi i parë i pambajtur është ai për uljen me 6 % të taksës së faturës së energjisë elektrike. Jo vetëm që taksa nuk u ul, por pati një rritje të çmimit dhe heqjen e fashës mbrojtëse prej 300 kë.

Mbështetje me pension për policët e rënë në krye të detyrës, ishte një tjetër premtim, që rezulton i pambajtur. Premtimet përfshinin nga mbështetja me dhurim shtëpie, në mbështetje me pensione të konsiderueshme për një jetesë dinjitoze. Megjithatë, një pjesë e vogël e familjarëve të policëve të rënë në krye të detyrës marrin më shumë sesa një ngushëllim për Krishtlindje e Vit të Ri.

Miratimi në datë 31 korrik 2014, i ligjit të ri për Policinë e Shtetit nr 108/2014, nuk solli asnjë ndryshim sa i përket premtimeve për rishikim pensioni apo pension të veçantë për policët e rënë në krye të detyrës, si dhe sigurim jete për policët që punojnë ende në polici.

Goditja e monopoleve, çka do të garantonte një konkurencë të ndershme mes bizneseve rezulton një tjetër premtim i pambajtur. Në këtë drejtim, qeveria premtoi prishjen e një sërë konçensionesh të dhëna nga parardheset saj, por jo vetëm që nuk mbajti premtimin, po përkundrazi, shtriu konçensionet apo PPP në pothuajse të gjitha fushat, përfshi këtu edhe shëndetësinë.

Përmirësimi radikal në sistemin e Shëndetësisë, ishte një premtim tjetër, që sot jo vetëm rezulton i pambajtur, por përkundrazi ka një përkeqësim në pothuajse të gjithë treguesit.

Pavarësisht ndërhyrjeve në çmimin e barnave, paketave shëndetësore, furnizimin e spitaleve publike me ilaçe si dhe nisjen e fushatës së “check up-it”, ndërhyrjet në sistem konsiderohen sipërfaqësore/arnuese dhe jo thelbësore për ndryshimin apo reformimin radikal të sistemit.

Goditja e të korruptuarve në Institucionet Publike, rezulton të jetë nga premtimet kryesore të qeverisë Rama 1 dhe Rama 2. Por rezultatet tashmë dihen dhe i vetmi rast që mazhoranca mund të tregonte vullnet për të goditur zyrtarët e lartë ishte ai i ish-ministrit të Brendshëm, Sajmir Tahiri, i marrë në mbrojtje me shumicë votash, duke rrëzuar kërkesën e prokurorisë për arrestimin e tij.

E njëjta situatë paraqitet edhe me disa zyrtarë të tjerë, ndërsa operacionet e zhvilluara me shumë bujë kanë rezultuar flluska sapuni, qoftë edhe në rastet e zyrtarëve të niveleve të ulëta.

Reforma në polici gjithashtu rezultoi një dështim, pasi shumë funksionarë të policisë rezultojnë sot ose të dyshuar si të përfshirë në kultivimin e drogës, ose se kanë ndihmuar trafikantët e saj.

Statusi i minatorëve është një tjetër premtim i pambajtur, madje i refuzuar nga qeveria për t´u miratuar.

Rruga e Arbrit, një tjetër premtim i pambajtur. Pavarësisht se u artikulua në fillim të mandatit të parë qeverisës, u ripërsërit në 2015-ën, gjatë fushatës së zgjedhjeve vendore dhe gjithashtu në 2017 u premtua po nga Rama.

Për të mos përmendur këtu premtimin për rritjen e fondit të mbështetjes sociale, ndërkohë që mbi 20 mijë familje rezultojnë të kenë dalë jashtë skemës në mënyrë abuzive.

U premtua ulja e akcizës për naftën që përdoret nga fermerët, gjë që edhe sot e kësaj dite mbetet një kërkesë e vazhdueshme e tyre.

U premtua se Vlora, qarku ku Rama është deputet, do të ishte laborator për ekonominë dhe zhvillimet sociale. Në fakt Kryeministri e mbajti fjalën, duke e bërë Vlorën laborator të drogës dhe kanabisit.

Në Tiranë u premtua Biblioteka e Re dhe një kopësht i ri Zoologjik, gjë që vështirë që mund të realizohen, ndërsa në pikëpyetje është vënë godina e Teatrit Kombëtar, për të cilën si Rama ashtu edhe Erjon Veliaj kanë deklaruar prishjen dhe dhënien me konçension të ndërtimit të godinës së re. Gjithashtu Veliaj deklaronte se nuk do të lejohej ndërtimi i kullave, një premtim që rezultoi mashtrim, përderisa janë disa dhjetra leje ndërtimi për shumëkatëshe që pritet të pushtojnë madje edhe qendrën e Tiranës.

Në Durrës u premtua vlerësimi i monumenteve të kulturës. Në fakt ndodhi krejt e kundërtua. Prej kohësh shoqëria civile dhe qytetarë ndodhen në një proçes gjyqësor me Vangjush Dakon për Velierën.

U premtua që nuk do të lejohej derdhja e ujrave të zeza në det, gjë që sot rezulton ende problematike dhe një premtim i pambajtur, madje qeveria ka ngritur edhe një Task Force në prag të nisjes së sezonit turistik për situatën.

Një tjetër premtim i pambajtur nga pothuajse të gjithë kryebashkiakët është ai i uljes së papunësisë dhe nivelit të varfërisë. Pavarësisht se mund të konsiderohet një premtim në nivel qeveritar i pambajtur, ai u artikulua në zgjedhjet vendore nga pothuajse të gjithë kryebashkiakët.