OKB, 3 Maj, Të mbajmë pushtetin nën kontroll: Media, Drejtësia dhe Sundimi i Ligjit

Sot është 3 maji, Dita Botërore e Lirisë së Shtypit, përcaktuar nga Asambleja e Përgjithshme e Kombeve të Bashkuara në vitin 1993.

Në Ditën Botërore të Lirisë së Shtypit temë në Organizatën e Kombeve të Bashkuara është: “Të mbajmë pushtetin nën kontroll: Media, Drejtësia dhe Sundimi i Ligjit” dhe rëndësia i kushtohet rolit të gjyqësorit të pavarur që siguron garanci ligjore për lirinë e shtypit dhe ndjekja ligjore e krimeve kundër gazetarëve.

Freedome House ka analizuar të dhënat nga 195 vende, në vitin 2017, ku 88 vende radhiten në mesin e vendeve të lira, 59 janë me liri të pjesshme dhe 49 radhiten në mesin e vendeve jo të lira.

Raporti i Freedom House vlerëson se Shqipëria dhe  Kosova radhiten në mesin e vendeve pjesërisht të lira, së bashku me Maqedoninë, Bosnje e Hercegovinën dhe Malin e Zi. Ndërsa Serbia dhe Kroacia, radhiten në mesin e vendeve të lira.

Asociacioni i Gazetarëve të Kosovës ka mbajtur protestë në sheshin ‘Zahir Pajaziti’, duke shënuar Ditën Botërore të Lirisë së Shtypit. Ata kërkuan ndëshkim të atyre që cenojnë mediat dhe pengojnë punën e tyre ditore.

Në raportin e saj të fundit, për vitin 2017, për lirinë e medies Freedome House thotë se mediat janë duke u përballur me kërcënime të reja në demokracitë e mëdha, si dhe në shtetet shtypëse, ku autoritetet po përqendrojnë përpjekjet e tyre në mediat sociale dhe platformat e tjera në internet pas goditjes së pavarësisë së medieve tradicionale.