Para të falsifikuara, Europol: Personi i arrestuar në Kosovë, punonjës i MPB-së Maqedonisë Veriut

Agjencia Evropiane e Policisë, Europol, tha se personi që u arrestua më 4 gusht në Kosovë për prodhimin e qindra mijërave monedhave false në vlerë prej dy eurove “është identifikuar si punonjës i Ministrisë së Brendshme në Maqedoninë e Veriut”.

Një ditë më parë, autoritetet në Kosovë thanë se ndaj të arrestuarit është caktuar masa e ndalimit prej 48 orëve.

“Arrestimi i tij është kulmimi i operacionit disamujor mes autoriteteve kosovare dhe maqedonase me mbështetjen e Europolit dhe Agjencisë Bashkimit Evropian për Bashkëpunim në Drejtësinë Penale, Eurojust,” tha Europol përmes një njoftimi.

Agjencia e BE-së tha se 34-vjeçari i arrestuar në Prishtinë, dyshohet se ka falsifikuar qindra mijëra monedha prej 2 eurosh në dy vjetët e fundit.