Pritja e Vitit të Ri, çfarë duhet të keni në tryezë, recetat ideale

Pritja e Vitit të Ri sjell hare dhe atmosferë në shtëpitë e kujtdo dhe ajo çka i bashkon të gjithë në një tryezë janë kujtimet e mira, bisedat e ngrohta e ku nuk mungon asnjëherë shija.

Të gatuash për festa kërkon kohë dhe mund të jetë e lodhshme, por kjo shpërblehet kur të gjithë e dashurojnë atë që keni gatuar.

Ajo që e bën më të lehtë përgatitjen e ushqimeve është ndjekja e recetave me përpikmëri, në këtë mënyrë nuk do gaboni asnjëherë.

Ndaj këtë fundvit ju prezantojmë 5 recetat ideale për festa, të cilat do mbushin tavolinën dhe do t’ju kënaqin.

Shtrimi i Tryezës

Gjithçka nis me një tavolinë të shtruar bukur, e cila do të bëjë gjithçka të duket më tërheqëse. 

Shtrimi bazë i tryezës

Sipas rregullit bazë të shtrimit të tryezës, pjata e ngrënies duhet të jetë e pozicionuar në qendër të vendit të ngrënies dhe gjithçka tjetër duhet vendosur rreth saj.

Në të majtë të pjatës duhet të jetë piruni ndërsa thika dhe luga duhet të pozicionohen në të djathtë.

Maja e thikës duhet të jetë në një drejtim me pjatën, ndërkohë që gota e ujit duhet të jetë përbri thikës.

Peceta duhet vendosur nën pirun ose mbi pjatë për një dekorim informal të tryezës.

Si të shtroni tryezën për një darkë informale

Për një darkë informale, ndiqni rregullat bazë të shtrimit të tryezës, por duhet të shtoni edhe disa enë dhe pajisje të tjera.

Për shembull, nëse do të servirni sallatë, duhet të shtoni pirunin e sallatës që vendoset në të majtë të pirunit të darkës.

Nëse do të servirni supë, pjata e supës duhet vendosur sipër pjatës kryesore, ndërsa luga e supës, në të djathtë të lugës kryesore.

Gotat e ujit ose të verës duhen vendosur në anën e djathtë të pjatës.

Si të shtroni tryezën për një darkë zyrtare

Shtrimi i tryezës për një darkë zyrtare nis me vendosjen e gotave të verës dhe të ujit përbri pjatës kryesore.

Lugët për supa, ëmbëlsira apo gjellëra duhen vendosur nën anën e djathtë bashkë me thikën.

Pirunjtë në anën e majtë.

Sipër pjatës kryesore mund të vendosni pecetën dhe sipër saj pjatën e supës.

Udhërrëfyesi i një gostie perfekte

Nëse do të shtroni një gosti në shtëpinë tuaj, nxirrni mbulesat, pecetat dhe enët më të mira të kuzhinës.

Në mes të tryezës vendosni një vazo të vogël me lule por jo shumë të gjatë.

Përpara ngrënies, në dhomën e ndjenjes servirni antipasta dhe pije të ndryshme.

Përpara se të ftuarit të ulen në tryezë, sigurohuni që gotat janë të mbushura dhe buka është e ngrohtë dhe gati për servirje.

Në fillim servirni sallatën, pastroni enët e përdorura dhe më pas pjatat individuale.

Përpara servirjes së ëmbëlsirës, pastrojeni tryezën nga enët e ndotura dhe ato të përdorura.

Rregulli i fundit, por jo për nga rëndësia, është që të mos nisni larjen e enëve ndërkohë që të ftuarit janë akoma në tryezë.

Antipasta

Antipastat konsiderohen si prezantimi i parë me tryezën dhe mikëpritjen. Këtu luan një rol shumë të rëndësishëm fantasia, me të cilën mund të eksperimentoni sa të dëshironi.

Përgatitja:

Filloni duke zgjedhur djathin e mirë vendas kaçkavall e të bardhë duke mos harruar ta servirni të prerë në kubikë të vegjël e të barabrartë.

Në një tjetër anë të pjatancës tuaj shtroni proshuta apo sallame të ndryshme sipas dëshirës suaj.

Ideale në këtë pjatë do të ishin sallamet e thata dhe djathrat e stazhionuar pasi shkojnë më së miri edhe me pijet që zakonisht serviren në fundvit.

Mund të zgjidhni salaminit e vegjël të cilët nuk kanë nevojë të gatuhen, salçicet e veçanta me djathë brenda të cilat mund t’i skuqni apo piqni në furrë apo ato klasiket që përdorni në shtëpi zakonisht.

Mos harroni të shtoni proshutën, pasi shtrimi i një pjate të tillë e kërkon patjetër.

Provoni atë me fileto pule, proshutën krudo, Milanezin apo të famshmin Pairizier që është një nga produktet më të shitura tek Shqiptarët.

Djathë i bardhë i pjekur në furrë

Një tjetër specialitet që nuk duhet të mungojë si antipastë në tryezën tuaj është Djathi i Bardhë i Furrës me vaj ulliri e spec djegës. 

Përbërësit

700g djathë i bardhë

Vaj ulliri

1 spec i kuq djegës

Rigon

Piper i zi

Përgatitja

Pika kyçe e kësaj recete është pikërisht përzgjedhja e djathit.

Ai që duhet të përdorni është djathi i lopës apo i deles, pasi gjithçka lidhet me nivelin e yndyrës.

Duke qenë se djathi do të piqet në furrë ai ka nevojë për yndyrë në mënyrë që të qëndrojë i butë dhe të mos thahet.

Pasi të keni përzgjedhur djathin mund të vazhdoni me hapat e thjeshtë të recetës.

Merrni një tavë jo shumë të madhe dhe spërkateni atë me vaj ulliri.

Mundohuni që të krijoni një shtresë të mjaftueshme pasi djathi nuk duhet të ngjitet në fundin e tavës.

Nëse nuk keni tavë balte mund të përdorni qelqi ose edhe metalike, vetëm duhet të tregoni kujdes gjatë pjekjes.

Vendosni djathin në tavë dhe spërkateni me vaj ulliri, spec djegës të cilin e keni grirë imët, piper të zi.

Rigonin ruajeni për në fund pasi nëse digjet ai i jep një shije të hidhur djathit duke e prishur recetën.

Futeni tavën për t’u pjekur në furrë të ngrohur me 180-200 gradë dhe lëreni për 15-20 minuta.

Kur të shihni që sipërfaqja e djathit ka marrë një ngjyrë të artë është koha për ta larguar djathin nga furra.

Zakonisht kjo recetë shërbehet e ngrohtë ashtu siç është në tavë.

Por nëse dëshironi mund ta vendosni edhe në një pjatë, por sigurohuni që ta spërkatni me lëngun e mbetur në tavë.

Tani mjafton që ta shijoni me të dashurit tuaj për më shumë shije gjatë vakteve në familje.

Qofte krokante me patate

Disa qofte krokante të ngrohta e të shijshme nuk bëjnë dëm. Përkundrazi, të gjithë do të lëpijnë gishtat me këtë pjatë. 

Përbërësit:

(Recetë për katër persona)

1 kg patate

2 filxhanë të vegjël me miell

4 kokrra vezë

50g gjalpë

Dy lugë gjelle djathë kaçkaval i grirë ose djathë i bardhë

Piper

Majdanoz

Galetë (Dy filxhanë kafeje me bukë të thekur të grirë në rende)

Vaj (Për një gatim të shëndetshëm, ju këshillojmë të përdorni vaj ulliri)  

Përgatitja

Qërojmë patatet dhe i hedhim në një tenxhere me ujë të nxehtë me kripë.

Pasi i zjejmë, i kalojmë në mixer për t’i bërë në formën e puresë.

Purenë e hedhim në një tas, shtojmë djathin kaçkavall ose të bardhin, miellin, dy nga vezët në recetë, gjalpin, piperin, majdanozin.

I përzjejmë të gjitha bashkë, derisa masa të bëhet e njëtrajtshme.

Brumi i qofteve me patateve ndahet në toptha të vegjël sa një kokërr arrë.

Kalohen në miell, pastaj në vezët e mbetura që i keni rrahur me pak ujë, më pas në galetë dhe skuqen në vaj të nxehtë. 

Sallata

E çfarë është darka e festave të fundvitit pa një sallatë shumëngjyrëshe dhe të freskët? Lakra e kuqe e kombinuar me portokallin sëbashku me pak limon e kripë, padyshim që ofron larmishmëri. 

Përbërësit

Gjysmë lakër e kuqe (madhësia mesatare)

Një karrotë

Një kokërr portokalle

Vaj ulliri

Lëngu i gjysmë kokrre limoni

Pak kripë

Uthull balsamike

Përgatitja

Në një tas shtojmë dy lugë vaj ulliri, lëngun e limonit, pak uthull balsamike. Nëse preferoni një shije të athët në të ëmbël të sallatës mund të shtoni një lugë të vogë mjalti.

Përzjeheni masën derisa të bëhet e njëtrajtshme dhe vendosnei mënjanë për ta përdorur më vonë për marinimin e sallatës.

Pastroni me ujë të rrjedhshëm lakrën e kuqe dhe përmes një thike të mprehtë grijeni në rripa të hollë në gjatësinë e 3-4 centrimetrave.

Shtojeni lakrën e grirë në tasin e qelqit dhe të njëjtën gjë bëni edhe me karrotën

Pasi e keni grirë bashkoni karrotën e grirë me lakrën e kuqe të grirë. Kaurdisini dhe hidhin sipër masën e vajit të ullirit me përbërësit e tjerë.

Në fund shtojini kripë sipër dëshirës.

Rosto me Mish Viçi

Një ndër gatimet tradicionale të këtyre festave është rosto e mishit të viçit, e cila kërkon mjeshtëri në përgatitje.

Përbërësit më poshtë janë për 4-5 persona)

500 gr mish viçi tul

4 lugë gjelle vaj ulliri

5-6 thelpinj hudhra

1-2 kokrra qepë

1-2 karrota

Piper kokërr

1 lugë gjelle miell

Kripë

½ e gotës së ujit me verë të kuqe

Përgatitja

Për përgatitjen e rostos së viçit duhet të merret pjesa e anëshme ose e jashtëme e kofshës. Kjo pjesë e mishit pastrohet me kujdes përmes një thike të mprehtë nga cipat dhe damarët.

Më pas, mishi shpohet me thikë të hollë me majë në disa vende në të gjithë pjesën dhe mbushet në çdo vrimë me nga një thelpi hudhër, pak piper kokërr edhe kripë.

Pjesa e mishit vendoset në tavë, sipër mbulohet me qepë dhe karrota të grira, pak piper kokërr, kripë dhe vaji i ullirit.

Futet në furrë të piqet me 200 gradë përreth një orë e gjysmë. Gjatë procesit të pjekjes kujdesemi që mishin herë pas here ta spërkasim me lëngun e vet.

Kur të piqet kullohet nga lëngu dhe pritet në të kundërt të fijeve të mishit.

Skuqim në një tigan miellin me pak gjalpë dhe shtojmë aty lëngun e mbetur në tavën ku poqëm mishin dhe më pas roston e presim në feta feta e ndajmë në pjata dhe e spërkasim sipër me salcën e përgatitur.

Gjatë pjekjes së rostos kur shteron lëngu duhet shuar me verë dhe më vonë shtohet pak ujë i nxehtë, me qëllim që mishi të ketë vazhdimisht pak lëng.

Përshesh me Gjel Deti

Kurora si pjata më e mirë e festave i takon përsheshit me gjel deti. Aroma, përbërësit dhe shija që kjo pjatë sjell të ngroh shpirtin. 

Përgatitja:

Si fillim vendosim pulën të ziejë në një tenxhere me ujë dhe kripë. Kur mishi i pulës të jetë gati, lëngun e saj e ruajmë mënjanë pasi do përdoret për përgatitjen e përsheshit.

Ndërkohë nisim përgatitjen e kulaçit, për të cilin do të duhet 1 kg miell, 1 lugë çaji sodë buke, dy vezë, kripë dhe ujë i vakët.

Nisim përgatitjen e brumit duke hedhur miellin në një tepsi. Bëjmë një gropë në mes dhe hedhim, kripën, sodën dhe vezët.

Kulaçi

Brumin e punojmë me dorë deri në momentin që masa do të bëhet kompakte por jo shumë e ngurtë.

Përmes furçës së gatimit lyejmë një tepsi me pak vaj dhe shtrojmë brumin.

E fusim në furrë dhe e pjekim derisa në sipërfaqe të marrë një ngjyrë të artë në të kuqërremtë.

Më pas e nxjerrim nga furra dhe e mbështellim me një pecetë kuzhinë, e vendosim mbi një pjatë dhe e lëmë që të kullojë.

Përsheshi

Për përgatitjen e përsheshit baza është kulaçi i thërrmuar dhe lëngu i pulës.

Gjithashtu do të duhen 4-5 qepë të njoma, gjalpë ose vaj ulliri, kripë dhe nenexhik.

Në një tenxhere shtojmë vajin e ullirit dhe pak gjalpë, shtojmë qepët e njoma të grira hollë. I kavërdisim derisa volumi i tyre të bjerë.

Kulaçin të cilin e kemi thërrmuar më parë në copëza të vogla e shtojmë në tiganin ku kemi qepët dhe e kavërdisim pak.

Më pas, nga pak të hidhni lëngun e pulës derisa sipërfaqja e kulaçit të jetë mbuluar. Shtoni erëzat dhe kripën. Përsheshin mbulojeni me kapak derisa lëngu të ketë avulluar dhe të jetë bashkuar me kulaçin.

Përsheshin e shërbejmë të ngrohtë, të shoqëruar me një copë nga mishi i të pulës.

Ëmbëlsira

E fundit por jo nga rëndësia është ëmbëlsira e cila do përmbyllë darkën e shumëpritur të vitit. Ju mund të përgatisni kadaif ose baklava, por ju sugjerojmë një tjetër recetë të famshme me të cilën mund të shpalosni talentin tuaj. 

Përbërësit:

350 gramë rrush të thatë,

100 gramë kumbulla të thata pa bërthamë,

100 gramë sheqer kaf,

4 lugë gjelle rum ose konjak

100 gramë arra të copëtuara

100 gramë bajame

100 gramë bajame të bluara

100 gramë thërrime buke,

50 gramë miell shumë-përdorimësh,

100 gramë gjalpë

Gjysëm luge çaji arrëmyshk,

1 lugë çaji kanellë pluhur,

100 gramë qershi për kokteile

Përgatitja:

Në një enë qelqi përzieni rrushin e thatë, kumbullat e thata, sheqerin kaf dhe rumin ose konjakun.

Lërini për 24 orë.

Më pas, përzieni arrat, bajamet, pluhurin e tyre, thërrimet e bukës, miellin, gjalpin, erëzat dhe vezët dhe shtoni frutat e thata të njomura në rum.

Teksa përzieni, mos harroni të shprehni një dëshirë për festa.

Mbulojeni enën me letër kuzhine dhe lëreni mënjanë në një vend të freskët për 24 orë.

Me të mbaruar 24 orët, lyeni pak tavën e ëmbëlsirës me gjalpë.

Për këtë ëmbëlsirë, nevojitet një tavë në formën e tasit të thellë.

Sipër vendosni letër pjekjeje të cilën gjithashtu duhet ta lyeni me pak gjalpë.

Derdheni brumin në tavë, duke e shtypur herë pas here që të zëjë vend.

Pasi t’i keni dhënë formën, mbulojeni tavën me një letër të madhe pjekjeje dhe më pas me letër alumin të cilën duhet ta siguroni mirë me një filospangë.

Më pas, merrni një tenxhere të madhe të cilën duhet ta mbushni me ujë deri sa të mbulojë një të tretën e tenxheres.

Fusni aty tavën e ëmbëlsirës por sigurohuni që uji nuk e mbulon atë dhe as nuk i afrohet sipërfaqes.

Lëreni ujin të marrë valë, dhe kur të ndodhë kjo uleni temperaturën dhe lëreni të ziejë ngadalë për 5-6 orë.

Gjatë kësaj kohe, sigurohuni që kur uji të avullojë, të shtoni më shumë, pra tenxherja nuk duhet lënë pa ujë.

Kur keku të jetë gatuar, hiqeni tavën e thellë dhe lëreni të ftohet.

Për ta servirur, nëse ju pëlqen i ngrohtë, ndiqni të njëjtën metodë si më lart, ose nëse jeni të paduruar për shijen, ngroheni në mikrovalë./AgroWeb/