Shkrimtarja koreanojugore Han Kang fiton Çmimin Nobel në Letërsi

Autorja koreanojugore, Han Kang, është fituese e Çmimit Nobel në Letërsi, më 2024, për “prozën e fuqishme poetike që konfronton trauma historike dhe shpërfaq brishtësinë e jetës njerëzore”.

Kështu është vlerësuar ajo nga juria në ditën e shpalljes së vendimit, raporton RFE.

“Ajo e ka një vetëdije unike për lidhjet në mes të trupit dhe shpirtit, jetës dhe vdekjes, dhe stili i saj poetik dhe eksperimental është bërë inovator në prozën bashkëkohore,” tha Anders Olsson, udhëheqës i Komitetit të Nobelit, përmes një deklarate.

Han Kang, koreanojugorja e parë që fiton Nobelin për Letërsi, e ka nisur karrierën më 1993 me publikim të disa poemave, derisa me prozë ka debutuar më 1995, të titulluar “Love of Yeosu”.

Namin ndërkombëtar e ka fituar me novelën “The Vegetarian”.

Vitin e kaluar me këtë çmim është nderuar shkrimtari dhe dramaturgu norvegjez, Jon Fosse.

Çmimi Nobel ka vlerën e rreth 1.1 milion dollarëve amerikanë.

Ky çmim, që ndahet për arritje në shkencë, letërsi dhe paqe, është krijuar me dëshirën e shpikësit të dinamitit, suedezit, Alfred Nobel.

Këto çmime ndahen prej vitit 1901.

Gjatë javës, raporton RFE, janë ndarë Çmimet Nobel në Mjekësi, Fizikë dhe Kimi. Tradicionalisht, Çmimi Nobel në Ekonomi ndahet në fund.