Velipojë-Ksamil, nis aksioni i prishjes së ndërtimeve që Kryeministri Rama i konsideron “pa leje”

Ashtu siç paralajmëroi Kryeministri Edi Rama ditë më parë nga Shëngjini, sot Inspektoriati Kombëtar i Mbrojtjes së Territorit, IKMT, nisi operacionin përgjatë vijës bregdetare të prishjes së objekteve që janë vlerësuar “pa leje”. Fillimisht aksioni ka nisur nga Velipoja përkatësisht Ksamili.

Janë 15 ndërtime që do prishen nga Inspektoriati Kombëtar i Mbrojtjes së Territorit në Velipojë ku të pranishëm janë Zv/Ministri i Brendshëm, Besfort Lamallari, Drejtori i Policisë Shkodër, Niko Brahimaj me efektivë të policisë dhe inspektorë të IKMT.

Ndërsa në Ksamil do të prishen 30 objekte që IKMT thotë se janë “pa leje”

Ndërkohë Kryeministri Edi Rama ndonëse në vizitë zyrtare në Hungari u ekzaltua nga prishjet që po ndodhin në bregdet dhe postoi pamje nga operacioni “Bregdeti ynë”:

Ndryshe, më 1 Qershor Kryeministri Edi Rama paralajmëroi nga Shëngjini, fillimin e operacionit për pastrimin e bregdetit më 7 Qershor. “Bregdeti Ynë”, siç u kodua operacioni, ka për qëllim fshirjen nga harta në pasurinë më të madhe të popullit shqiptar çdo ndërtim pa leje, duke nisur me ato që janë në proces në thyerje flagrante të Kodit Penal dhe për të çuar përpara drejtësisë çdo shkelës të ligjit ndërsa kërcënoi:

“Prishni e pastroni vetë çka keni ndërtuar pa leje në dëm të pasurisë së popullit, sepse kur të përballeni me forcën e operacionit ‘Bregdeti Ynë’, do të jetë shumë vonë për ju!”