Dekreti, Ilir Meta emëron Edi Ramën Kryeministër

Ndonëse ende nuk është e qartë se kush është opozitë në Shqipëri pas votimit të djeshëm të Kryetares së re të Parlamentit, Kryetari i PS, Edi Rama ka vazhduar axhendën e tij sapo u betua dhe dërgoi në Presidencë propozimin për Kryeministër.

Ndryshe nga periudha para 25 Prillit, Presidenti i Republikës, Ilir Meta tashmë është më i qartë u kthye në identitet, duke dekretuar për kryeministër, kandidatin e familjes së tij socialiste, Edi Ramën.

“Zoti Edi Rama, emërohet Kryeministër i Republikës së Shqipërisë,” thuhet në Dekretin e sigluar dje nga Presidenti i Republikës, Neni 2 i të cilit thotë se hyn në fuqi menjëherë.

Dekret

PËR EMËRIMIN E KRYEMINISTRIT

Në mbështetje të neneve 93 dhe 96, pika 1, të Kushtetutës, pas zhvillimit të zgjedhjeve të përgjithshme për Kuvendin e Republikës së Shqipërisë të datës 25.04.2021, rezultati përfundimtar i të cilave është shpallur nga Komisioni Qendror i Zgjedhjeve përmes Vendimit nr. 21, datë 13.07.2021, të Komisionit Rregullator, sot më datë 10.09.2021, në fillim të Legjislaturës së X-të, pas thirrjes dhe zhvillimit të mbledhjes së parë të Kuvendit të porsazgjedhur, sipas propozimit me nr. 216 prot., datë 2.9.2021, të Partisë Socialiste të Shqipërisë, parti kjo që rezulton se ka shumicën e vendeve në Kuvend,

Dekretoj:

Neni 1

Zoti Edi Rama, emërohet Kryeministër i Republikës së Shqipërisë.

Neni 2

Ky dekret hyn në fuqi menjëherë.

Nr. Dekretit 13 210
Tiranë, më 10.09.2021

PRESIDENTI I REPUBLIKËS
ILIR META