Shkodra zgjohet me lëkundje të forta të tokës, panik edhe në Podgoricë

Qarku i Shkodrës sot është zgjuar me lëkundje të forta të tokës. Sipas Qendrës Mesdhetare Sizmologjike, EMSC, tërmeti me magnitudë 4.1 të shkallës Rihter ra në orën 04:19, me thellësi 20 km dhe epiqendër 12 kilometra nga Kopliku.

Tërmeti ka shkaktuar panik ndër banorët e Koplikut por ende nuk raportohet për dëme materiale dhe në njerëz.

Ndërkohë tërmeti ka shkaktuar panik edhe ndër qytetarët e Podgoricës, e cila, sipas EMSC, është vetëm 26 km nga epidendra e tërmetit.

Enti Sizmologjik i Malit Zi raporton se epiqendra e tërmetit ishte 11 kilometra në lindje të Podhumit, komuna Tuz.

“Në bazë të modelit teorik të fush makrosizmike të këtij rajoni, magnitudat e tërmetit dhe thellësisë së hipoqendrës, ky tërmet nuk ka pasur mundësi të shkaktoj dëme materiale në rajonin e epiqendrës,” thekson Enti Sizmologjik i Malit Zi ndërsa raporton për një pasgoditje pas 20 minutave me magnitudë 3.4 të shkallës Rihter.

Ndërkohë Instituti i Gjeoshkencave në Tiranë, IGJEUM, raporton edhe për dy pasgoditje tjera:

Vetëm pas 9 minutave u regjistrua një tërmet me magnitudë 2.1 dhe 4 orë e 55 minutave më pas me magnitudë 2.1 të shkallës Rihter, ndërsa IGJEUM raporton se që të dy tërmetet ishin me thellësi 25 kilometra dhe epiqendër 17 kilometra nga Kopliku.