“Nuk e sjell PD-në në pushtet”, Basha: Aleanca PD-SHBA mbetet e pacënueshme

Pas deklaratës së liderit historik Sali Berisha se Basha nuk e sjell dot Partinë Demokratike në pushtet, Kryetari i PD, Lulzim Basha, duke nënvizuar se nuk ka kthim pas tha se aleanca dhe partneriteti i PD me SHBA do të mbetet i pacenueshëm.

“Nuk kam asgjë për t’i shtuar asaj që kam deklaruar një javë më parë sa i përket kontributit të Sali Berishës për zhvillimin e Shqipërisë, demokracisë dhe aleancës me Shtetet e Bashkuara të Amerikës. Por dua të jem fare i qartë, aleanca dhe partneriteti i Partisë Demokratike me Shtetet e Bashkuara të Amerikës, duhet dhe do të mbetet i pacenueshëm në interesin më të mirë të demokratëve shqiptarë, në interesin më të mirë të së nesërmes së Shqipërisë dhe shqiptarëve,” tha Lulzim Basha i cili pasi përjashtoi Sali Berishën nga Grupi Parlamentar sot e tha qartë:

“Ne, së bashku me të gjithë shqiptarët që me zi po presim ndryshimin, do të bëjmë gjithçka për ta realizuar aspiratën e tyre për ndryshim. Nuk ka kthim pas!”

Ndryshe, pas miratimit të Qeverisë Rama 3, Kryetari i PD, Lulzim Basha, tha se 77 votat e sotme, janë formalizimi i PPP-së, Rama-Doshi-Rakipi bashkë me kriminelët e dosjes 184, të vjedhjes së zgjedhjeve në Dibër dhe të Dosjes 339 të Shijakut bashkë me Rahman Rrajën të njohur ndërkombëtarisht për rekordet e tij kriminale, janë fatkeqësia më e madhe për çdo shqiptarë, janë fatkeqësia kombëtare. E qëllimi i Partisë Demokratike është për t’i larguar këta armiq të demokracisë nga salla e parlamentit dhe për t’i kthyer shqiptarëve demokracinë, parlamentin dhe qeverisjen e vullnetit të tyre të lirë.