Të shtëna në Kune-Vain Lezhë, trafikanti i drogës vret efektivin e policisë

Një polic është vrarë me armë zjarri në Lezhë. Viktimë ka mbetur efektivi 44-vjeçar Saimir Hoxha si pjesë e patrullës së policisë që kontrollonin për kultivimin e kanabisit në zonën e Kune-Vainit në Lezhë.

Mësohet se gjatë patrullimit të policisë, është konstatuar një mjet i ndaluar. Oficeri Saimir Hoxha është ulur për të shkuar pranë automjetit dhe për të bërë verifikimin e personit. Sapo i është afruar, 21-vjeçari Aldo Rama ka qëlluar me armë duke e plagosur. Plumbi e ka kapur në zemër efektivin, raporton BW, i cili ka ndërruar jetë rrugës për në spital.

Efektivë të Policisë së Lezhës, të Drejtorisë së Përgjithshme të Policisë së Shtetit, Forcat e Ndërhyrjes së Shpejtë si dhe efektivë të repartit special RENEA janë duke kryer kontrolle në zonën ku u vra sot oficeri i krimeve Saimir Hoxha ndërkohë policia ka identifikuar tashmë autorin Aldo Rama, 21 vjeç dhe është vënë në ndjekje të tij.

“Në vijim të informacionit paraprak, falë veprime të shpejta hetimore u bë i mundur identifikimi i autorit të dyshuar të vrasjes së oficerit të Policisë në Komisariatin e Policisë Lezhë.

Autori i dyshuar është shtetasi Aldo Rama, 21 vjeç, i dënuar më parë për prodhim dhe shitje të narkotikëve dhe mbajtje pa leje të armëve të ftohta, i cili është larguar me automjet nga vendngjarja. Vijon puna intensive për lokalizimin dhe kapjen e tij”, bën me dije policia.

Ndryshe, Grupi i posaçëm hetimor ndodhet në vendngjarje dhe nën drejtimin e Prokurorisë së Rrethit Gjyqësor Lezhë vijon punën për zbardhjen dhe dokumentimin e plotë ligjor të kësaj ngjarjeje kriminale.