Komisioni i Rithemelimit PD: Lulzim Basha do njoftohet me shkrim për ratifikimin e shkarkimit

Komisioni i Rithemelimit të Partisë Demokratike sot mbajti mbledhjen e radhës ku lideri historik i PD Sali Berisha kishte mesazh si për Kryetarin e shkarkuar Lulzim Basha ashtu dhe Policinë e Shtetit. Komisioni i Rithemelimit të PD, tha Sali Berisha, ka vendosur që deputetit Lulzim Basha ti komunikohet me shkrim vendimi i Referendumit për ratifikimin e shkarkimit të Kryetarit të Partisë Demokratike ndërsa paralajmëroi policinë se nuk do të tolerojë asnjë akt dhune ndaj protestuesve, ndërsa shtoi se mbrëmjen e kaluar, deri në orën 01:00 të natës, janë mbajtur nëpër qeli adoleshentë 15-vjeçarë dhe të moshuar 84-vjeçarë.

Duke denoncuar dhunën policore ndaj të rinjëve e të moshuarve pas protestës së zhvilluar mbrëmjen e kaluar kundër ardhjes së Presidentit Aleksandar Vuçiç në Tiranë, Sali Berisha shtoi:

“Së pari, nëpërmjet jush dua t’iu përcjell një përshëndetje të përzemërt, të falënderoj me shumë mirënjohje, ata mijëra e mijëra protestues, që mbushën mbrëmë bulevardin “Dëshmorët e Kombit” në një akt historik të protestës së dytë, që nga viti 1998, të partive politike për interesin e tyre kombëtar. Prej 8 vitesh interesi kombëtar mbeti jetim. Ai u nëpërkëmb e u tradhtua në mënyrën më flagrante nga Rama dhe me heshtjen u tradhtua pothuajse njësoj nga ish-kreu i opozitës, që me program e statut duhet të mbronte këtë interes, Lulzim Brava. PD e ringritur, rithemeluar, mbi vlerat konservatore, u dëshmoi mbrëmë shqiptarëve dhe botës se interesi kombëtar në këtë vend ka një avokat të fuqishëm në opozitën shqiptare dhe në PD.

Edhe njëherë theksoj, kjo nuk është një protestë kundër bashkëpunimit rajonal, por kundër aleancës të Beogradit me vasalët e tij Tiranën e Shkupin, e cila absolutisht nuk mbjell bashkëpunim, por konfliktualitet, ushqen nacionalizmat dhe largon Ballkanin nga Evropa, vendos hegjemoninë serbe në rajon dhe rajonin si zonë të influencës ruse. Aq më tepër, kjo përbën një rrezik serioz, po të kemi parasysh se dy vende vasale të Beogradit, që janë kyçur në këtë aleancë, janë vende anëtare të NATO-s dhe e kanë bërë këtë akt pa marrë asnjë miratim nga Aleanca Euroatlantike e Veriut. Të gjitha këto përbënin motive madhore, së bashku me përpjekjen për të mbajtur Kosovën në një darë armiqësore të klikave në pushtet Beograd-Shkup-Tiranë, ishin motivi i protestës sonë, protestë që pati jehonë të gjerë botërore,” tha Sali Berisha duke dënuar dhunën policore:

“Dënoj disa akte brutale të narkopolicisë, e cila ka arrestuar mbrëmë njerëz të pafajshëm, i ka keqtrajtuar adoleshentët, në furgonët e makinës. Veçanërisht narkobanditë të komisariatit nr. 2. Jam sot këtu për të paralajmëruar narkopolicinë se revolucioni ynë paqësor nuk do të tolerojë dhunimin e të drejtave të njeriut dhe keqtrajnimin çnjerëzor të pjesëmarrësve në protesta apo në lëvizjet revolucionare. Mbrëmë gjer në orën 1:00 të natës në qelitë e komisariateve, me urdhër të Ramës, janë mbajtur adoleshentë 15-vjecarë, por edhe burra të moshuar 84-vjecarë.”

Ne jemi lëvizje paqësore, tha Ish-Presidenti Sali Berisha, dhe parimi përfundimtar është të mos dhunojë asnjë jetë njerëzore.

“Sot Komisioni i Përkohshëm i Rithemelimit të PD-së pas diskutimeve ka vendosur të fillojë menjëherë nga puna për zbatimin e vendimeve të Kuvendit të 11 dhjetorit të Rithemelimit të PD-së. Deri në datën 22 mars të gjitha strukturat e kësaj partie duhet të shndërrohen në strukturat e anëtarëve të PD ku ata do të vendosin me votën e lirë për drejtuesit dhe forumet e tyre. Kjo është një punë intensive dhe duke u angazhuar në këtë proces, demokratët e Shqipërisë janë të vetëdijshëm se janë në një revolucion të pandalshëm, të një anësie jetike për fatin e demokracisë e të shoqërisë shqiptare. Ata mbetet të gatshëm për të përmbushur çdo detyre që do të kërkohet në avancimin e kauzës sonë,” tha Berisha duke shpallur dhe vendimin më të rëndësishëm të këtij Komisioni:

“Komisioni i Përkohshëm i Rithemelimit të PD-së vendosi t’i komunikojë deputetit Lulzim Basha vendimet supreme të anëtarësisë të PD-së në aktin më historik të lirisë gjatë pluralizmit si referendumi i datës 18. Ky akt ishte shkarkimi, ratifikimi i shkarkimit që vendosi me votë të fshehtë. Deputeti Basha do t’i dërgohet një shkresë ku do të njoftohet për këtë vendim. Për të gjithë anëtarët që votuan më datën 18 dhjetor për të gjithë shqiptarët në Shqipëri dhe kudo ku ndodhen Komisioni vendosi të njoftojë se anëtarësia e PD është në këmbë dhe e vendosur të zbatojë vendimin e saj. Vendimi i marrë do të zbatohet pa asnjë lloj hezitimi.”

Duke njohur mirë Lulzim Bashën dhe afërsinë që ka me Edi Ramën, lideri historik i Partisë Demokratike paralajmëroi Kryetarin e shkarkuar të PD-së që as mos ta imagjinojë t’i kundërvihet vendimit të Referendumit.

“Anëtarët kanë vendosmërinë për të zbatuar vendimin. Komisioni do bëjë detyrën e tij për zbatimin e vendimit. Ftoj çdo deputet të PD, që e ndjen vehten deputet të kësaj force politike dhe jo deputet të lulzim Bravës, ftoj çdo deputet të PD që e ndjen veten njeri të lirë dhe jo të lancuar nga interesa të ndryshme, të vijë të marrë dosjen e votimit të degës nga e cila është zgjedhur deputet, dhe të marrë vendimet e duhura. Çdo akt në kundërshtim me këto vendime, përbën një mungesë të plotë besnikërie, politike ndaj atyre të cilët kanë derdhur lumenj djerse ndaj një deputeti apo një deputeti tjetër,” tha Sali Berisha ndërsa i bëri ftesë çdo deputeti t’i bashkohet.

“I garantoj se do të gjejë një PD krejt tjetër nga ajo që kanë përjetuar këto 2 muaj. Do të të gjejë një PD të njerëzve të lirë të anëtarëve të lirë dhe unë në emër të Komisionit i mirëpres ata,” tha lideri historik i PD, Sali Berisha duke i bërë të qartë Kryetarit të shkarkuar të PD-së, Lulzim Basha, të cilin e quajti “Lul Brava: se atë dhe përfaqësuesit e tij nuk i ndalin as ndryshimi i bravave apo dhe forca ndërsa përfundoi.

“Kur një pakicë mendon të shtypë një shumicë, ajo ose është pakicë totalitare, ose është pakicë terroriste. Ose është pakicë banditeske. Mbyllja e dyerve të selisë për PD nga pengbasha, apo Lul Brava është akt i shëmtuar. Siç është i shëmtuar, futja e eksponentëve të armatosur te qeverisë dhe banditë në selinë e demokratëve. Kjo është selia e lirisë, dhe jo e armëve. Në këtë kontekst, nuk është Sali Berisha as këta zotërinj të përkohshëm që ka bërë lojë me brava. Ka bërë lojë me brava në mënyrë të turpshme. E ka nisur dhe bitisur Lulzim Brava. S’ka bravë, forcë, s’ka asgjë që mund të ndalojë këtë revolucion pa zbatuar vendimet e anëtarëve të tij. Edhe një herë, besoj se u shpreha qartë.”