Me rritjen e çmimit të energjisë elektrike humbasim investimet

Rritja e taksave me paketën fiskale dhe e çmimit të energjisë elektrike do të jenë faktorët kryesorë që do të ndikojnë në uljen e prodhimit dhe konkurrueshmërisë së produkteve shqiptare. Presidenti i Qendrës së Eksporteve Shqiptare, Alban Zusi, tha në një intervistë për “Monitor” se rritja e parashikuar e çmimit të energjisë pritet të frenojë investimet e eksportuesve dhe do të zhysë në kolaps financiar shumë sipërmarrje. Për këtë arsye do të ketë rritje të ndjeshme të importeve. Zusi nënvizon se edhe zhvlerësimi i monedhës Euro, për shkak të pastrimit të parave, do të frenojë aftësinë riinvestuese të kompanive eksportuese, të hapjes së vendeve të reja të punës dhe rritjes së pagave.

Si do të jetë ecuria e industrisë agropërpunuese ushqimore në 2022?

Industria pati një ringritje të lehtë në vitin 2021. Viti 2022, nëse nuk goditet nga vendimmarrje publike, siç mund të jetë rritja artificiale e çmimit të energjisë elektrike, premton për të pasur vijimësi të rritjes së industrisë. Në rast se ndodh goditja nga rritja e çmimit të energjisë elektrike, disa prej bizneseve do të kalojnë në kolaps.

Do të ketë rritje të ndjeshme të importeve, frenim të eksporteve, veçanërisht frenim të investimeve për eksportuesit. Kompanitë eksportuese mund të qëndrojnë në këmbë, por rezistenca e tyre do të jetë vetëm sa për të vijuar aktivitetin.

Nuk ekziston asnjë shans që me rritjen e planifikuar të çmimit të energjisë elektrike nga qeveria, pa krijimin e një burse, pa dyshim që do të godasë gjithë industritë shqiptare, duke i bërë më pak konkurruese se industritë e vendeve të rajonit dhe BE-së. Në anën tjetër, rritja e çmimit të energjisë elektrike do të rrisë paaftësinë e kompanive shqiptare për t’u ringritur.

A do të preket konsumatori nga rritja e çmimeve për shkak të kostove të prodhimit?

Absolutisht që konsumatori do të preket, sepse industritë vendase do të rrisin kostot e prodhimit dhe çmimet. Importuesit do të përfitojnë nga kjo situatë edhe ato do të bëjnë një rritje të lehtë të çmimeve, pasi më tepër do të përfitojnë për të hyrë në treg.

Mbi të gjitha, dëmi më i madh që i bëhet industrisë vendase do të jetë mungesa e investimeve, siç ndodhi edhe në vitin që lamë pas. Kostot që do të marrë rritja e çmimit të energjisë elektrike e paargumentuar deri tani, do të thithin gjithë investimet e nevojshme, të cilat do të shërbenin për riinvestime dhe hapje të vendeve të reja të punës dhe rritje të pagave të punonjësve.

Cilat do të jenë efektet e rritjes së taksave që nga vendosja e TVSH-së te inputet bujqësore deri te heqja e skemës së TVSH-së së kreditueshme?

Nga këto ndryshime do të preket më tepër prodhimi industrial bujqësor që do të jetë përsëri më i shtrenjtë, do të rëndojnë te buxheti i konsumatorit, por njëkohësisht do të nxisë rritjen e importeve. Rritja e importeve do të favorizohet edhe nga zhvlerësimi drastik i Euros, gjë që do ta bëjë edhe më të vështirë konkurrueshmërinë e bizneseve shqiptare.

Që në dhjetor të vitit 2021, monedha Euro ka arritur në limitet e saj më të ulëta historike që nga 2007-a. Nuk shohim asnjë masë monetare apo ligjzbatuese për ta rikuperuar dhe për të shmangur fluksin e parave të papastra që mund të jenë duke e shkaktuar këtë fenomen.

Fuqizimi i Lekut nuk lidhet me tregues të qartë të zhvillimit ekonomik të vendit. Në këtë kontekst do të jetë faktori i dytë që do të kërcënojë aftësinë riinvestuese të kompanive vendase, të hapjes së vendeve të reja të punës dhe rritjes të pagave.