Tiranë-Durrës/ Për katër orë, Policia Rrugore e Tiranës bllokon 13 patenta
Policia Rrugore e Tiranës ka vijuar edhe gjatë kësaj fundjave me kontrolle të rrepta por thekson se edhe pse kontrollet me Radar vijojnë sistematikisht për të parandaluar shpejtësinë tej normave të lejuara, përsëri konstatohen drejtues mjetesh që fluturojnë në rrugë.
Vetëm në një pikë të vendosur sot në orët e mëngjesit në rrugën interurbane Tiranë-Durrës, Policia Rrugore e Tiranës për katër orë ka pezulluar 13 patenta.
Policia Rrugore e Tiranës bënë të ditur se 13 drejtuesve të mjeteve të cilëve iu është pezulluar Leja e Drejtimit qarkullonin me shpejtësi që varionte nga 139 km/h deri në 175 km/h, ku limiti i lejuar është 90 km/h.
“175 Km/h, shpejtesi e frikshme, rrezik i madh per jeten e drejtuesit te mjetit dhe te perdoruesve te tjere te rruges. Gjate 4 oreve te fundit jane evidentuar 13 drejtues mjetesh te cileve iu eshte pezulluar Leja e Drejtimit pasi qarkullonin me shpejtesi qe varionte nga 139 km/h deri ne 175 km/h, ku limiti i lejuar eshte 90 km/h.
Per Policine Rrugore eshte primare parandalimi i aksidenteve e jo pezullimi i patentave. Udheto i sigurt duke respektuar rregullat e qarkullimit rrugor,” thekson Policia Rrugore e Tiranës në faqen e saj në “Facebook”.
