Shtatë orë debat në Grupin e PD, Berisha: Alibeajn nuk e lë Rama të tërhiqet, është në mision!

Shtatë orë debat në mbledhjen e Grupit Parlamentar të Partisë Demokratike nuk shërbyen për asnjë moment për bashkimin e PD, siç paralajmëroi Kryetari i Grupit, Enkelejd Alibeaj, madje mund të thuhet se se kjo mbledhje i shërbeu më shumë bashkimit të Partisë Socialiste përkundër ideve që u hodhën ndër deputetë.

Kështu si fillimi ashtu dhe fundi rezultuan pa një mendim që i përbashkon dy grupet, ku njëra vazhdon dhe mendon si Lulzim Basha dhe tjetra më idealiste e cila edhe sot mendon se mund të flas në emër të një Komisioni të Rithemelimit dhe kur i kërkohet Gazment Bardhit dhe të ngjashmëve që Grupi Parlamentar të vazhdoj funksionimin si një i tërë.

Dhe, atë që Gazment Bardhi e emëroi Kryetar dhe paralajmëroi bashkimin, Enkelejd Alibeaj, me përfundimin e mbledhjes tha se shumica dërrmuese e deputetëve ishin të mendimit se një proces i njëanshëm nuk çon drejt bashkimit të Partisë Demokratike.

“Zoti Berisha erdhi dhe si gjithmonë unë i thashë të njëjtat gjëra, siç e keni marrë vesh. Vura re që shumica dërrmuese e kolegëve konstatuan disa gjëra të thjeshta që konstatojnë gjërat që çojnë te bashkimi. Një proces i njëanshëm nuk të çon në bashkim, ky është konstatimi i parë.

Një shumicë dërrmuese kërkoi që bashkimi të realizohet në bazë të një procesi të përbashkët ku mos të ketë përjashtime.

Riorganizimi të fillojë nga qeliza, seksioni e më pas të grupseksioni e kështu me radhë. Kjo u tha nga deputetët të cilët e ofruan këtë zgjidhje. Unë ju ofrova deputetëve që nesër çdo deputet të propozojë në mënyrë shtjelluese propozimin e tij,” tha Kryetari i Grupit Parlamentar të PD, Enkelejd Alibeaj.

Por përfundimi i mbledhjes ishte i ngjashëm me fillimin e kësaj mbledhje, me kundërshtitë Berisha-Alibeaj. Lideri historik i PD, Sali Berisha, tha se Enkelejd Alibeajn do ta ndjekë fati i Lulzim Bashës dhe se është e qartë që ai nuk tërhiqet nga apelimi i vendimit të Gjykatës që njohu Kuvendin e ish-kryeministrit, pasi nuk e lë Edi Rama.

“E domosdoshëm për konsolidimin e PD. Predominoi totalisht shqetësimi i deputeteve për një proces gjithëpërfshirës dhe transparent. dhe unë e vlerësova shumë. Mund t’ju them se kontrastonte me qëllimet e të gjithë deputetëve, i vetëshpalluri kryetar i PD që kur apo të themi, më shumë i vetëshpallur, por kur ke mendje në kokë, e kupton se qesharak s’mund të bëhesh. Duke besuar se është kryetar PD-je, u përpoq në mënyrat vulgare të manipulojë. Edhe grupin, por dështoi në çdo përpjekje,” tha Sali Berisha duke shtuar se Enkeljed Alibeaj është në mision.

“Alibeajn nuk e lë Rama të tërhiqet, është në mision. Do ta ndjekë fati i Bashës. E vë veten në një pozitë të papërshtatshme,” tha lideri historik i PD deri sa për Lulzim Bashën dhe deputetët e PD tha se do të jenë pjesë e Këshillit Kombëtar.

“Deputetët e PD, përfshi edhe Lulzim Bashën do të jenë anëtarë të Këshillit Kombëtar. Çdo njeri është i lirë të marrë vendimin e tij,” tha Berisha duke u kujdesur edhe për kuriozitetin e atyre që “nuk i zë gjumi” dhe përmes gaztearëve pyesin nëse do të jetë në mbledhjen e radhës së Grupit Parlamentar të PD:

“Patjetër, do jem në çdo mbledhje!”

Edhe në këto rrethana, lideri historik i PD, Sali Berisha, u pyet për kushtin e SHBA, nëse ai do të jetë në krye të PD, amerikanët nuk do të kenë asnjë marrëdhënie me të.

“Së pari duhet ta dish mirë se s’kam bërë asnjë përpjekje për negociata, çdo ofertë e kam refuzuar në mënyrë të prerë, kam zgjedhur atë rrugë që kam zgjedhur,” tha Sali Berisha duke e bërë të qartë se është në dijeni dhe ka dëshmi mbi presionin që i bëhet gjykatës për vendimi i cili do të vendos për fatin e Partisë Demokratike:

“Edi Rama po i përdor si mashë, po bëhen presione të jashtëzakonshme në gjykatë, të gjithanshme. Nëse s’do kisha dy burime nuk do ta thosha. Po e ndjek. Paralajmëroj se qeveritarë dhe jo vetëm kanë ndërhyrë fuqishëm në gjykatë. Diplomatë e ambasadorë. Kam siguruar dy burime. Kjo është shumë e rëndësishme. Nuk do të përtoj t’i bëj publike.”