LSI kundër shembjes së Teatrit Kombëtar/ Vasili: Rama i pacipë, grabit truallin publik…

Deputetët e LSI do të votojnë kundër draftit ligjor të qeverisë, që i hap rrugën shembjes së godinës së Teatrit Kombëtar dhe ngritjes së kullave nga firma Fusha.

Kryetari i Grupit të LSI, Petrit Vasili, tha se LSI do ta shprehë këtë në parlament dhe në protestat që do të mbahen para Teatrit, pasi kështu u vendos në mbledhjen e Grupit.

“Grupi parlament i LSI mori në shqyrtim momentet politike më të rëndësishme ditët e fundit dhe shqyrtoi edhe vendimarrjet e tij politike lidhur me seancën e ardhshme në Kuvendin e Shqipërisë. Fatkeqësisht, seanca e ardhshme zhvillohet menjëherë pas një dështimi të jashtëzakonshëm siç ai i mos hapjes së negociatave.

Në vend që të kishte një reflektim të thellë për mënyrat arrogante dhe korruptive të një qeverisjeje të kriminalizuar, përkundrazi, kemi një akt tjetër shembullor të një pacipësie pa fund, që lidhet me grabitjen në mes të ditës të pronës shtetërore dhe dhunimit të boshtit kulturor shqiptar: është pikërisht ligji për Teatrin, ligj që paraprakisht po informojmë opinionin publik se Grupi parlamentar i LSI do ta votojë tërësisht kundër dhe ky është vendim unanim i Grupit, shumë i motivuar.

Lidhur me të mund të thuhet se më në Shqiëpri nuk mbizotëron shteti i së drejtës, por antiligji që është ulur këmbëkryq në Kryeministrinë e vendit dhe udhëhiqet nga kryeministri i vendit. Ky ligj është ditë e zezë për Shqipërinë”, theksoi Vasili.