Kritika Kosovës, Rama nga Ohri: SHBA ka hedhur dy bomba atomike në Japoni, sot një nga aleancat më të forta

Ashtu si Presidenti i Serbisë, Aleksandar Vuçiç, edhe Kryeministri i Shqipërisë, e bëri të paditurin në Ohër lidhur me faktin që ministri i Jashtëm i Rusisë e bëri të qartë se “Ballkani i Hapur” është projekt serb por nuk harroi të kritikon Kosovën pse nuk i bashkohet kësaj nisme. Dhe, shembullin që mori për ilustrim tregon se sa dashakeq ndaj Kosovës është Edi Rama, dhe jo siç e cilësojnë disa, të paditur në diplomaci.

Pra, sipas “vëllaut të Vuçiçit”, kur Japonia u bë aleat i forë i SHBA edhe pse kjo e fundit i hodhi dy bomba atomike, pse Kosova nuk bëhet aleate e Serbisë, tha Edi Rama i cili në fjalën e tij u mor më shumë me ndihmën që i ka dhënë Serbia, që sipas tij u paska shpëtuar shqiptarëve edhe shpirtin dhe numrin e turistëve serb se sa barrierat e Serbisë, ku Aleksandar Vuçiçit i pengon edhe malli i cilësuar si “Made in Kosova”.

“Sot jemi këtu pikërisht sepse duam të vazhdojmë të shkojmë drejt të ardhmes pa i mbyllur sytë ndaj problemeve ende të pazgjidhura por të bindur se ato mund të zgjidhen vetëm nëse ne afrohemi dhe kuptojmë sa të rëndësishëm jemi për njëri tjetrin.

SHBA ka hedhur dy bomba atomike në Japoni, dhe sot një nga aleancat më të forta është aleanca e këtyre shteteve, dhe ja ku është sot Japonia, dhe nuk do ishte nëse do qëndronte me kurriz nga SHBA, duke kërkuar më parë që SHBA të ulej në gjunjë për bombat e tyre. Ku janë sot Franca dhe gjermania, çfarë po bën Izraeli dhe Emiratet e Bashkuara? Janë bashkë për të fituar reciprokisht nga shtrëngimi i duarve.

Më lejoni të ndalem të disa fakte. Kontratat e grurit kur filloi lufta në Ukrainë, mes importuesve të grurit në Shqipëri nga Serbia, që e kanë bërë historikisht dhe që nuk u bllokuan siç fare mirë do ishin bllokuar nëse nuk do ishim në Ballkanin e Hapur. Sepse Serbia ka marrë përsipër detyrime dhe reciprocitet. Mos vallë duhet ndonjë imagjinatë për të menduar se çfarë do ndodhte nëse ne nuk do e merrnim dot atë sasi gruri. Me retorikën e konfliktit apo thirrje për tu futur në luftë?!

Vazhdojmë me energjinë. Sot jemi në një teh thike dhe jo vetëm ne këtu në rajon, por në gjithë botën, por ne jemi shumë më vulnerabël se shumë të tjerë, ndërkohë që në horizont është një dimër ku problemi do jetë se s’do ketë energji fare për ta blerë. Kemi luksin të qëndrojmë me kurriz ndaj njëri tjetrit? Unë nuk besoj.

Dhe këtu do jemi dhe si me grurin do provohet se Ballkani i Hapur nuk është as imi, as i Vuçiç, as i Kovaçevski, as i Abazoviçit, dhe askujt tjetër, është i njerëzve,” tha Edi Rama dhe pas leksionit që i tha Kosovës pse nuk është pjesë e “Ballkanit të Hapur” nuk e fshehu lumturinë për një fakt:

“Në Ohër janë me Ne edhe kryeministri i Malit të Zi, Dritani si dhe përfaqësuesi nga Bosnja, komisioneri Varhelyi, përfaqësuesi i KE drejtpërdrejt për rajonin tonë dhe miku ynë Gabriel Escobar i cili është i pranishëm përmes ekranit”

Të gjitha që tha Kryeministri Edi Rama për Serbinë, edhe sikur të qëndrojnë kur ai i pranon, nuk është e qartë pse nuk e pranon edhe faktin se “Ballkani i Hapur” është projekt serb, dhe siç e saktësoi ministri i Jashtëm i Rusisë, Sergej Lavrov, si një zhvillim i shpejtë i partneritetit strategjik Rusi-Serbi.