Sot Lugina e Preshevës voton për herë të katërt, SPS e Milosheviçit bllokon procesin!

Pas vendimit të Gjykatës Administrative për përsëritjen e votimit të 27 Majit për zgjedhjet Parlamentare të Serbisë në Njësinë Nr.6 në Tërnoc të Madh, dhe vendimit të KQZ-së që ato të zhvillohen sot, votimi ende nuk ka filluar pasi Partia Socialiste e kriminelit Slobodan Milosheviç ka bllokuar procesin dhe vazhdon të qëndroj mbi Ligjin.

Televizioni Publik i Serbisë, RTS, duke ju referuar komisionit zgjedhor, raporton se për shkak të mosmarrëveshjeve ndër komisionerët e kësaj qendre të votimit dhe ndarjes së detyrave, nuk ka filluar procesi i votimit.

“Kanë raportuar komisionin zgjedhor komunal dhe organet tjera kompetente, dhe presin udhëzimet e mëtejme,” raporton RTS.

Ndërkohë lideri i Koalicionit të Shqiptarëve të Luginës, Shaip Kamberi, si kandidati kryesor për mandatin e deputetit nga kjo zonë, sqaron përmes rrjetit social Facebook arsyet e bllokimit të këtij procesi:

“Në Tërnoc, në njësinë numër 6, nuk ka filluar votimi as pas tre orë përplasjesh mes komisionerëve që ka filluar pas provokimeve të komisionerëve të SPS se ‘kjo është mbretri dhe na vendosim këtu’. Shumë zgjedhës janë kthyer nga vendvotimi dhe nuk iu është mundësuar të votojnë,” thekson Shaip Kamberi duke përfunduar:

“Ndërkohë vjen një paralajmrim për ‘bombë të vendosur në objektin e shkollës ku po mbahen votimet’, që e ka marrë drejtori i shkollës me telefonatë anonime, skenar ky për të krijuar frikë te votuesit shqiptar.”

Me paralajmërimin për bombë u vendos që procesi zgjedhor të mos zhvillohet fare deri në një vendim të dytë, vendim që për shqiptarët erdhi pas një inskenimi të qëllimshëm.

Ndryshe në qendrën e votimit Njësia Nr.6 në Tërnoc të Madh, të drejt vote kanë 1.089 qytetarë, 598 prej të cilëve votuan për Koalicionin e Shqiptarëve të Luginës ose 12 vota më pak se sa i duhet këtij koalicioni për të fituar një mandat deputeti në Parlamentin e Serbisë.