U akuzua për falsifikim, Gjykata e Apelit e shpall të pafajshëm ish-anëtarin e Gjykatës së Lartë
U shkarkua nga vettingu se kishte fshehur një dënim për vjedhje, por Gjykata e Apelit e shpall të pafajshëm ish-anëtarin e Gjykatës së Lartë, Admir Thanza,
Thanza akuzohej për falsifikim, pasi sipas prokurorisë nuk kishte deklaruar në Formularin e Vetëdeklarimit vendimin penal të Gjykatës së Pizas, Itali, pikërisht dënimi për të cilin u shkarkua nga vettingu.
Gjykata e Apelit Tiranë, informon se Prokuroria pranë Gjykatës së Shkallës së Parë Tiranë, me datë 12.07.2018 i ka kërkuar Presidencës së Republikës Formularin e Vetëdeklarimit për Garantimin e Integritetit të Persona që zgjidhen, emërohen ose ushtrojnë funksione Publike, plotësuar nga anëtari i Gjykatës së Lartë z. Admir Thanza, i cili dyshohet të këtë kryer veprën penale “Falsifikimi i vulave, stampave ose i formularëve”. Për shkak se nuk ka deklaruar në Formularin e Vetëdeklarimit vendimin penal të Gjykatës së Pizas, Itali.
Në Gjykatën e Rrethit Gjyqësor Tiranë, u zhvillua gjykimi lidhur me çështjen penale të pandehurit Admir Thanza, i akuzuar për kryerjen e veprës penale të “Falsifikimi i vulave, stampave ose i formularëve”, të parashikuar nga neni 190/1 të K.Penal.
Gjykata e Rrethit Gjyqësor Tiranë, me vendimin nr. 1411, datë 31.05.2019 ka vendosur:
-Deklarimin fajtor të të pandehurit Admir Thanza për veprën penale “Falsifikimi i vulave, stampave ose i formularëve”, të parashikuar nga neni 190/1 i Kodit Penal dhe në baze të kësaj dispozite, dënimin e tij me 9(nëntë) muaj burgim.
-Në zbatim të nenit 59 të Kodit Penal, Gjykata urdhëron pezullimin e ekzekutimit të vendimit të dënimit me burgim, duke e vënë në provë të pandehurin Admir Thanza për një periudhë kohe prej 18(tetëmbëdhjetë) muaj, me kusht që të mbajë kontakte të rregullta me Shërbimin vendor të Provës Tiranë.
-Çështja në apel u shqyrtua mbi bazën e ankimit të bërë nga i pandehuri Admir Thanza, i cili kërkoi ndryshimin e vendimit, deklarimin e pafajshëm për veprën penale “Falsifikimi i vulave, stampave ose i formularëve”.
Në përfundim të gjykimit, Gjykata e Apelit Tiranë, e përbërë nga trupi gjykues me Relator Gjyqtar z. Genti Shala dhe anëtarë znj. Emona Muçi dhe znj.Irida Kacerja, me vendimin nr. 853, datë 26.09.2022 vendosi:
– Ndryshimin e Vendimit Nr. 1411, date 31.05.2019, të Gjykatës së Rrethit Gjyqësor Tiranë, në këtë mënyrë:
– Deklarimin e pafajshëm të të pandehurit A.Th, akuzuar se ka kryer vepër penale te parashikuar nga Neni 190/1 te K/Penale.
Ndryshe, Prokuroria e Tiranës kishte kërkuar 1 vit e 6 muaj burg për Ish-gjyqtarin e Gjykatës së Lartë, Admir Thanza, i cili akuzohej për falsifikim të formularit të dekriminalizimit. Hetimi për gjyqtarin nisi pas seancës dëgjimore të Komisionit të Pavarur të Kualifikimit ku konstatoi se Admir Thanza është dënuar me vendim të formës së prerë për grabitje në Itali.
Vetë gjyqtari ka pretenduar se procesi ndaj tij nuk është ligjor dhe ai nuk ka pasur detyrim të deklaronte një fakt të tillë por DSIK e nxori të papërshtatshëm për vazhdimin e detyrës .
