Përpjekje për të frikësuar gjyqtarët, Kim: Koha për të thyer modelet e vjetra!

Reforma në Drejtësi ka ecur përpara por nuk kanë ndaluar joshjet dhe frikësimet e prokurorëve dhe gjyqtarëve, situatë për të cilën Ambasadorja e SHBA në Tiranë, Yuri Kim, e bëri të qartë se Shtetet e Bashkuara si prijëse të kësaj reforme shumë të rëndësishme, janë të vetëdijshme, por, është koha për të thyer modelet e vjetra të korrupsionit dhe ndikimit të paligjshëm në sistemin gjyqësor.  

“Ne jemi të vetëdijshëm për më shumë përpjekje për të joshur ose frikësuar gjyqtarët dhe prokurorët, për të shtrembëruar drejtësinë, për të këmbëngulur në mosndëshkimin e të fuqishmëve, me fjalë të tjera, për t’i tërhequr në të kaluarën. Gjyqtarët dhe prokurorët duhet të kryejnë detyrat e tyre në përputhje me ligjin, me integritet,” shprehet Ambasadorja amerikane Yuri Kim, në reagimin e saj përmes rrjetit social Twitter duke përfunduar:

“Është koha për të thyer modelet e vjetra të korrupsionit dhe ndikimit të paligjshëm në sistemin gjyqësor.  Duhet të ecë përpara, jo mbrapa, madje as të qëndrojë në vend.  Po i kushtojme vëmendje të gjitha zhvillimeve dhe do të vazhdojë të mbështesë fuqishëm zbatimin e reformës në drejtësi.”