Edi Rama terror mbi administratën, Berisha: Nuk ka zgjidhje tjetër përveç revolucionit!

Të gjitha këto skandale do rrëzonin jo një, por tre qeveri, por, Edi Rama kalon në heshtje sikur nuk ka ndodhur asgjë, thekson sot Kryetari i Partisë Demokratike, Sali Berisha, e meqë nuk nuk ka ndonjë dorëheqje por mashtrimi vazhdon, ai thotë se nuk ka zgjidhje tjetër përveç se një revolucioni për të përmbysur këtë regjim të pashembullt.

Konferencën e përjavshme sot Kryetari i PD e nisi me skandalin e paparë ndër hajdutët qeveritarë shqiptarë, me pastruesen Rozeta Bobi e cila i vjedhi 700 mijë euro në shtëpinë e shefes së kabinetit të Zv/Kryeministrit Arben Ahmetaj, Alda Klosi.

“Ata që do shkruajnë skenarin e filmit në të ardhmen, e sigurt që po gjetën artistët, do marrin një ëmim ndërkombëtar. Rozeta, hajdute apo thjesht iu dhanë ato para, për t’i mbajtur në mirëbesim.

Po të marrim variantin e kasafortës, kodin asaj nuk ia ka dhënë asnjë njeri përveç Alda Klosit. Magjistare e bëni ju Rozetën, që të dijë të zbërthejë kasafortat? Magjistare nuk ishte ajo, ishte pastruese.

Nëse është histori e eurove në dyshek, përsëri është bashkëpunim mes Aldës dhe Rozetës.

Pse ndodhi ky bashkëpunim? Arben Ahmetaj është kandidat për në kokërr të burgut. Pas Edi Ramës dhe Engjëll Agaçit. Natyrisht, në universin e interceptimeve telefonike të tij, Alda dilte në radar.
Pra, pse unë u ndala në këto? U ndala sepse qeveria po bën gjithçka për të mashtruar qytetarët në këtë hetim,” tha Sali Berisha duke shtuar se shifra 120 mijë u caktua nga qeveria për t’u thënë nga Alda ndërsa shuma e madhe në tubat e aspiratorit u zbulua rastësisht.

“Ato të gjitha janë paratë e Aldës, të Arben Ahmetajt, të Edi Ramës. Ato janë paratë e djegësave. Edi Rama e ka shkarkuar atë vetëm pesë ditë, më datë 20, në mënyrë që ajo të mos largohej nga detyra si zyrtare e lartë. Por, edhe njëherë, Rozeta ose duhet mbrojtur, ose duhet lënë e lirë. Paratë ajo i ka marrë në mirëbesim, siç del.

Cili është ai që mund të thotë se Rozeta gjeti kodin? Nuk ka njeri që e beson këtë.

Nëse do kishte marrë një specialist për dekodimin, gjurmët do ishin aty, kamerat do tregonin gjithçka.
A ka një gjë të tillë? Nuk ka një gjë të tillë. Pra kemi të bëjmë një bashkëpunim mes Aldës dhe Rozetës për të larguar paratë nga shtëpia e Aldës. Qoftë me kasafortë, qoftë me dyshek.

Fytyra e vërtetë e qeverisë është Alda, që vjen në Tiranë me një apartament 40 metër dhe përfundon me shtatë apartamente, troje, llogari. Kushedi sa ka në Dubai ka ajo nga kontot e Arben Ahmetajt.
Ka shpërthyer vjedhja për fushë, thotë populli,” tha Berisha duke vazhduar me skandalin e radhës me Erion Veliajn, ku tenderin fiktiv në Rrugën “John Belushi” në Tiranë e zbuloi rivali i Veliajt, kandidat i PD në zgjedhjet e 14 Majit, Belind Këlliçi.

“Nuk është më pak demonstrativ, akti i pashembullt i Erion Veliajt. I cili pasi u martua në kalanë e Gjirokastrës, paratë e paguara nga vëllai me tenderat që i kishte dhënë po Veliaj.

Tani ai kalon në një akt tjetër.

Përjashton edhe vëllanë nga vjedhjet. Ka vendosur të vjedhë direkt nga arka e bashkisë në arkën e tij.
Filloi ndërtimin dhe e trumbetoi me të madhe të rrugës ‘John Belushi’.

Ndërkohë shpall tenderin që do mbyllej 20 ditë më vonë, më datën 9 janar, për asfaltimin e asaj rruge.
Çdo njeri do mendonte se ky është një tender i paracaktuar. Kjo ishte një vjedhje e tmerrshme.
Por jo, është më keq.

Nuk po ndërtonte një kompani private rrugën, por po ndërtonte bashkia. Më datë 9, Veliaj do shpallte veten fitues me një emër të ri. Dhe do fuste gjysmë milionë euro në xhep.”

Por, regjimi i Edi Ramës përveç parave zot kanë dhe drogën, dhe kjo u konfirmua me trafikimin që bëjnë dhe drejtuesit e lartë, e rasti i fundit është ai me drejtoreshën e AKSHI, Erisa Fero.

“Skandal tjetër madhor, Erisa Fero, një kapobandë e vërtetë, drejtoreshë e kujt? E Mirlindës së mistershme. Mirlinda e mistershme është drejtoresha e AKSHI, një nga kampionët më kryesore si hajdute në historinë e këtij shteti.

Ajo është autore e 250 e ca prokurimeve sekrete publike. Mirlinda e Ramës, se varet direkt prej tij, është autore e shpenzimeve për mbrojtjen e mbi 200 milionë eurove për mbrojtjen e rrjeteve dixhitale, me zero efekt, sepse 80 përqind janë vjedhje.

Erisa bëhet drejtoreshë vetëm pse ndan me të, paratë e drogës. Nuk kishte asnjë meritë, asnjë kulturë, asnjë formim, asnjë arsim për të qenë drejtoreshë në AKSHI. Ky është një shtet i kalbur. Seriali i skandaleve nuk ka fund.”

Për skandalin e fundit, atë të Ministrisë së Financave me 1.2 milionë euro, Berisha tha se janë dy variante dhe Partia Demokratike po bënë verifikimet.

“Në treg është edhe një skandal tjetër, për të cilin ka dy variante dhe ne po e ndjekim.

Sipas njërit variant, Ministria e Financave dhe Sekretari i Përgjithshëm i saj ka paguar dy herë të njëjtin objekt.

Sipas një varianti tjetër, kjo nuk është e vërtetë. Ai ka zbatuar një vendim gjykate dhe kjo është hakmarrje mes zyrtarësh në nivele të dyta.

Nëse është varianti i parë, është një krim i shëmtuar. Nëse është varianti i dytë, përbën përsëri një krim shumë të rëndë. Sepse organizohen kurthe që nuk i shërbejnë luftës kundër korrupsionit, por të kundërtës.
Sapo të bëjmë verifikimet, do kemi qëndrimin përfundimtar.”

Në fund, Sali Berisha, dënoj me forcën më të madhe, terrorin dixhital mbi administratën shqiptare nga Edi Rama dhe qeveria e tij.

“Gjatë javës që shkoi është shpërndarë një aplikacion, që do e quaja aplikacioni i terrorit dixhital, funksioni i të cilit është regjistrimi dhe përllogaritja e ‘like-eve’.

Ky përbën një terror psikologjik dixhital.

Ky vendim absurd, primitiv, u mor nga Edi Rama pasi e pa veten të tejkaluar tërësisht nga Berisha në bilancin e botës dixhitale.

Me gjithë blerjen, me gjithë dhjetëra-mijëra euro që ka shpenzuar për të blerë ‘like’ dhe llogari false, kalon në një hap të paimagjinueshëm që të detyrojë punonjësit e administratës të bëjnë ‘like’ dhe t’ua masë këtë me aplikacion,” tha Kryetari i Partisë Demokratike duke i bërë thirrje Mark Zuckerberg, Elon Musk, të ndëshkojnë këtë praktikë të abuzimit në rrjetet sociale nga një njeri që nuk ka asnjë parim, që terrorizon punonjësit e thjeshtë, dhe të heqin këtë të drejtë derisa të anulojnë këtë aplikacion famëzi të kontrollit të qytetarëve.

“Të gjitha këto do rrëzonin jo një, por tre qeveri. Por Rama kalon në heshtje sikur nuk ka ndodhur asgjë.
Në vend të ndonjë dorëheqje, vazhdojnë mashtrimin çdo ditë ndaj qytetarëve. Atëherë fjala u takon qytetarëve. Nuk ka zgjidhje përveç një revolucioni për të përmbysur këtë regjim të pashembullt.

Edi Rama organizon darkën famëzezë me shefat e policisë në vend, në shkelje me çdo ligj dhe parim për policinë. Darka ishte një përpjekje e Edi Ramës për të shtrënguar radhët përpara stuhisë së revolucionit. Darka ishte një element kriminal elektoral. Pasi ai nuk ka ndërmend të veprojë ndryshe, përveçse të shkelmojë votën e shqiptarëve. Ftoj çdo demokrat të hapë një regjistër të veçantë për çdo shef komisariati dhe të regjistrojë çdo akt të tij. Një libër për krimet e Policisë së Shtetit,” tha Kryetari i Partisë Demokratike, Sali Berisha, duke përfunduar:

“Udhëzimet e dhënë nga Edi Rama janë goditja e mëshirës për këtë institucion.

Qytetarë, ju e shihni vetë se kush qeveris dhe ku shkojnë taksat tuaja. Zgjidhjen e jep dhe do ta japë vetëm revolucioni demokratik.”