Presidenti dekreton rritjen e pagës së tij, Qeverisë, deputetëve dhe administratës

Presidenti i Republikës, Bajram Begaj, sot ka dekretuar rritjen e pagës së tij, të Kryeministrit, ministrave, deputetëve dhe administratës publike.

Nga kjo rritje e pagave do të përfitojnë 130.330 punonjës të administratës ndërsa do të preken edhe 250 funksionarë politikë që e kanë pagën të lidhur me presidentin.

Kështu, paga e Presidentit ishte 257.000 lekë dhe do të bëhet 425.000 lekë; Paga e Kryetarit të Parlamentit ishte 228.730 lekë dhe do të bëhet 393.125; Paga e Kryeministrit ishte 228.730 lekë dhe do të bëhet 393.125 lekë Paga e Zv.Kryeministrit ishte 187.000 lekë dhe do të bëhet 330.000 lekë; Paga e Ministrave ishte 174.760 lekë dhe do të bëhet 318.750 lekë; Paga e Deputetit ishte 156.770 lekë dhe do bëhet 310.250 lekë; Dhe, në fund, paga e Specialistit ishte 69.219 dhe do të bëhet 191.250.

Ndryshe, në seancën plenare të 25 Majit, Projektligji për “Për disa ndryshime në ligjin nr. 9584, datë 17.07.2006, “Për pagat, shpërblimet dhe strukturat e institucioneve të pavarura kushtetuese dhe të institucioneve të tjera të pavarura, të krijuara me ligj”, të ndryshuar”, u miratua me 95 vota për , 3 kundër, 0 abstenime, ndërsa Projektligji “Për kompetencat për caktimin e pagave, trajtimeve të tjera financiare dhe përfitimeve të të punësuarve në institucionet e administratës publike, si dhe të pagës bazë minimale në shkallë vendi” u miratua me 97 vota për , 2 kundër dhe 0 abstenime.