BE kthen frutat dhe perimet nga Serbia me Chlorpyrifos dhe Metalaxyl! Po, Shqipëria?!

Kur filloi promovimi i Ballkanit të Hapur, si Kryeministri Edi Rama ashtu dhe Presidenti i Serbisë, Aleksandar Vuçiç flisnin për bezdinë që krijonte për tregtarët analiza fitosanitare, por, sot në vendkalimet kufitare evropiane bezdinë më të madhe po e krijojnë, Chlorpyrifos i identifikuar në kumbulla dhe pjeshka nga Serbia, si dhe Metalaxyl në kastraveca, që për Sistemin evropian për alarmim të shpejtë në tregtinë e ushqimit, RASFF, është e papranueshme dhe nuk mund të konsumohet.

Po çfarë ndodhë me kumbullat dhe kastravecat serbë që “liria” e Ballkanit të Hapur, përveç se i ka shmangur kontrollin sanitar, po shkatërron dhe bujqësinë shqiptare përmes konkurrencës së pandershme, siç bëri për dy jvet me blegtorinë.

Kështu, gjatë këtyre ditëve nga kufiri me Slloveninë në Serbi është kthyer një sasi me kastraveca të freskët për shkak të pranisë së Metalaxyl Fungicide, që nuk është dhe hera e parë gjatë kësaj vere që prodhimet serbe nuk kalojnë kufirin pas kontrollit të BE!

Sistemi evropian për alarmim të shpejtë në tregtinë e ushqimit, RASFF, bëri të ditur se kastravecat nuk kanë kaluar kufirin për shkak të nivelit të madh të substancës së dëmshme, dhe u dha urdhër që sasia në fjalë të shkatërrohet.

Por, ky nuk është rasti i vetëm. Në fillim të muajit gusht një dërgesë e patatinave serbe nuk u lejua të shpërndahet në Kroaci sepse përmbante nivel të lartë të Acrylamidit kancerogjen.

Prodhuesi “Chips Way” ka sqaruar se fjala është për 33 paleta të patatinave me spec, paketimi 150 gram, të cilat me rastin e zhdoganimit, analiza tregoi mospërputhshmëri sa i përket nivelit të Acrylamidit.

Por vetëm pas ca ditësh nga kufiri kroat u kthyen dhe pjeshkë ku u gjetë sasi më e madhe e pesticidit se sa që është e lejuar.

Megjithatë, kjo nuk ishte hera e parë se dërgesa me pjeshkë të kthehet mbrapsht në Serbi. Në fillim të muajit korrik, nga vendkalimi i Sllovenisë u kthyen pjeshkë të prodhuara në Serbi, për shkak të nivelit të lartë të pesticidit Chlorpyrifos.

Nga fundi i muajit gusht, nga vendkalimi i Kroacisë, për shkak të mbetjeve të pesticidit Chlorpyrifos dhe rrezikut potencial për shëndetin, u kthyen kumbullat e prodhuara në Serbi. Një muaj më parë, nga po ky vendkalim kufitar u kthye një dërgesë e Salmonit të tymosur që vinte nga Serbia, për shkak të prezencës së bakteries që shkakton listeriozë – Listeria monocytogenes.

Kthimi i mallit nga Serbia nuk ka të bëjë vetëm me ushqimin, por dhe për produkte tjera, si për shembull, pije alkoolike dhe produkte hoteliere prej letre.

Kjo ka bërë që të alarmohen konsumatorët serbë, që vënë në dyshim cilësinë e produkteve që konsumojnë në Serbi, por kjo nuk ndodhë edhe në Shqipëri ndërsa në Kosovë aktualisht janë të “mbrojtur” për shkak të ndalimit të importeve serbe.

Presidenti i Organizatës Kombëtare të Konsumatorëve në Serbi, Goran Papoviç, u shpreh për të përditshmen serbe “Danas” se konsumatorët tani kanë frikë nga konsumimi i disa mallërave të caktuar.

“Qytetarë kanë frikë sepse malli po kthehet për shkak të niveleve alarmante të pesticideve, por dhe për shkak të mungesës së përgjigjes se në çfarë mënyre kryhet në Serbi kontrolli i produkteve ushqimore. Ndonëse Ministria duhet të përzgjedhë laboratorin ku duhet të kontrollohet ushqimi i prodhuar, opinioni publik ende nuk e din se ku bëhet kontrolli dhe kur,” thekson Presidenti i Organizatës Kombëtare të Konsumatorëve në Serbi duke shtuar se problemi kryesor me praninë e lartë të substanceve të dëmshme kimike është mungesa e kontrolleve të farmacive bujqësore, përkatësisht sasisë së produktit që shesin.

“Meqë ekziston e-Drejtoria ku pronarët e tokave bujqësore lajmërojnë prodhimin e tyre, nuk është e qartë se pse nuk kontrollohen ato dhe kujt i shesin farmacitë bujqësore, dhe nga ana tjetër, çfarë importohet. Në fakt, nëse një prodhuesi për një arë ose vreshtë i duhet gjysmë litri produkt që përmbanë pesticide, farmacitë nuk guxojnë t’ju japin pesë litra,” thotë Papoviç duke sqaruar se në Serbi kontrollohet prania e pesë-gjashtë pesticideve deri sa në vendet e BE, dhjetëra prej tyre, dhe malli i kthyer nga Serbia do të dëmtoj shëndetin e konsumatorëve serbë.

Ministria e Bujqësisë Serbisë u mjaftua me faktin se Serbia nuk është shteti i vetëm që i kthehet malli nga kufiri i BE ndërsa të dhënat e RASFF flasin se në fillim të këtij muaji nga Sllovenia dhe Kroacia është kthyer edhe gjëja e gjalllë nga Serbia për shkak të pranisë së salmonellës.

A përfundon ky mall i kthyer nga kufijtë evropian në tregun serb, këtë mundësi e ka eliminuar Ballkani i Hapur, pasi këto produkte mund të përfundojnë si në tregun e Serbisë, ashtu dhe Maqedonisë Veriore dhe Shqipërisë!

Në fund, meqë Kryeministri Edi Rama është kujdesur për minimizimin e humbjeve të këtij malli të dëmshëm serb, dhe prodhuesit shqiptar ankohen për çmimet e produkteve serbe që po bëjnë konkurrencë të pandershme, mbetet në dorën e konsumatorëve të kujdesen për shëndetin e tyre!

Ose, meqë të dhënat e RASFF e dëshmojnë, nëse shqiptarët vendosin të konsumojnë produkt të jashtëm, të paktën të jetë nga Bullgaria, meqë asnjë dërgesë bullgare e produkteve ushqimore gjatë këtij viti, nuk kishte problem për kalimin e kufirit!