Komiteti i Helsinkit në Serbi: Rehabilitimi i Drazha Mihailoviçit, i papranueshëm!
Komiteti i Helsinkit për të Drejtat e Njeriut në Serbi ka dënuar rifillimin e fushatës për rehabilitimin dhe glorifikimin e të dënuarit për krime lufte dhe bashkëpunëtorit të okupatorit në luftën e dytë botërore, gjeneralit çetnik Dragolub Drazha Mihailoviç.
“Hapja e muzeut privat dhe vendosja e përmendores në Beograd kushtuar liderit kolaboracionist të fashizmit dhe komandantit të lëvizjes që ka kryer gjenocid ndaj popullsisë myslimane gjatë luftës së dytë botërore është edhe një hap drejt fashizimit të përshpejtuar të shoqërisë,” thekson Komiteti i Helsinkit në Serbi.
Komiteti i Helsinkit, raporton Agencia serbe e lajmeve Beta, thekson se për këto trende negative, përgjegjësit janë të shumtë, e në masën më të madhe pushteti aktual dhe Presidenti Aleksandar Vuçiç, por dhe Kisha Ortodokse Serbe, KOS, si dhe një pjesë e elitës akademike dhe kulturore serbe.
Komiteti i Helsinkit në Serbi tërheq vërejtjen se glorifikimi i Drazha Mihailoviçit provokon edhe më shumë fqinjët në rajon dhe kjo ndikon pashmangshmërisht në rritjen e nivelit të pasigurisë tek të gjitha nacionaliteteve joserbe në Serbi, në veçanti rajonit fragjil, Sanxhakut!
Në këtë kontekst, thekson Komiteti i Helsinkit në Serbi, edhe “filmi revizionist” mbi shpëtimin e pilotëve amerikanë në luftën e dytë botërore, edhe pse kishte mbështetjen e Ambasadës së SHBA në Beograd, ishte një hap prapa në stabilizimin e rajonit dhe demokratizimin e Serbisë.
Braktisja e vlerale liberale
Komiteti i Helsinkit në Serbi rikujton se forcat çetnike nën komandën e Drazha Mihailoviçit janë përgjegjëse edhe për krime të rënda të luftës ndaj civilëve në Serbinë e okupuar, ndërsa thekson se shqetësuese është që me rehabilitimin e Drazha Mihailoviçit dhe marrëdhënieve jokritike ndaj fashizmit, po braktisen vlerat liberale mbi të cilat bazohet Evropa moderne e ku thuhet se pretendon edhe Serbia.
Ndryshe, Dragolub Drazha Mihailoviç, i njohur si Çiça, ishte komandant i ushtrisë mbretërore jugosllave në atdhe gjatë luftës së dytë botërore që ndër popull njiheshin si kasap çetnik, është dënuar me pushkatim në vitin 1946 për shkak të krimeve të luftës dhe bashkëpunimit me okupatorin.
Numri i saktë i viktimave shqiptare, boshnjake, kroate dhe kombeve tjera joserbe të cilat janë ekzekutuar nga çetnikët kurrë nuk është përcaktuar zyrtarisht, e sipas disa vlerësimeve bëhet fjalë për disa dhjetëra mijëra viktima.
