Raporti i anti-mafias italiane mbërrin në Kuvend/ Nga Shqipëria po hyn edhe heroina turke

Ministria e Brendshme italiane ka paraqitur në Parlament relacionin mbi raportin e bërë publik nga Drejtoria Antimafia lidhur me nivelin e krimit në periudhën korrik-dhjetor 2017. Raporti përfshin edhe aktivitetin kriminal të shtetasve shqiptarë, që konsiderohen si organizimi i huaj më prezent në Itali.

Në raport thuhet se kriminaliteti shqiptar ka një aftësi të madhe për rekrutimin e të rinjve.

Sipas raportit të publikuar në media, thuhet se organizatat kriminale shqiptare herë pas herë kanë sjellje të ashpër me veti të përqendruara në mënyrë të veçantë në larjet e hesapeve mbi bazën e rregullave të ashpra të Kanunit.

Kriminaliteti shqiptar në Itali nuk është aktiv dhe shumë i fuqishëm vetëm në aspektin e narkotrafikut, por edhe në atë të shfrytëzimit të prostitucionit dhe grabitjeve apo vjedhjeve.

Raporti vë në dukje lidhjet e forta të organizatave kriminale shqiptare me grupet kriminale italiane në Pulia dhe Brindizi, të cilat kanë bërë të mundur futjen nga deti Adriatik të tonelatave me marijuanë edhe gjatë vitit 2017.

Përveç kësaj lënde narkotike, vihet në dukje edhe një rrugë tjetër e futjes së heroinës nga Shqipëria drejt Italisë, në mënyrë të veçantë tipi Kobret i heroinës, që blihet në Turqi.

Në raport vihen në dukje disa nga operacionet më të famshme të antidrogës gjatë 6-mujorit të dytë të 2017 si “Griko”, “Los Blancos” dhe “Smoke Snake”. Në njërin nga operacionet e mëdha në tetor 2017 në Ferrara u kapën mbi 2 ton hashash, e cila ne treg kapte vlerën 20 milion euro.