Nga Parlamenti, Berisha: Rama-Brava votojnë për heqjen e imunitetit dhe arrestimin e kryetarit të PD

Rama-Brava votojnë për heqjen e imunitetit dhe arrestimin e kryetarit të Partisë Demokratike, tha Kryetari i PD, Sali Berisha, nga salla e parlamentit duke garantuar se ky akt i shëmtuar nuk do ta mposhtë kurrë opozitën.

“Deputetët e opozitës me vendosmëri kanë denoncuar dhe denoncojnë vjedhjet e paimagjinueshme, aferat e shekullit të Edi Ramës, familjarëve të tij, Taulant Ballës, bandave dhe ministrave e parlamentarëve të tjerë.

Deputetët e opozitës i kanë kallur tmerrin mazhorancës dhe prej javësh parlamenti ka më shumë gardistë se deputetë.

Prej shumë javësh, parlamenti defakto është shndërruar në ilegjimitet dhe antikushtetueshmëri.

Sot pas një vendimi antikushtetues të Gjykatës Kushtetuese, pas një vendimi antikushtetues të komisionit Rama-Brava, kërkojnë për heqjen e imunitetit dhe arrestimin e kryetarit të PD, duke besuar se në këtë mënyrë do të mposhtin opozitën.

Ky është një akt i shëmtuar, krim i vërtetë, por në realitet nuk do të mposhtë kurrë opozitën.

Ky akt dëshmon së pari se në Shqipëri ka një opozitë të fuqishme e cila qëndron e palëkundur kundër kësaj bande në pushtet që ka vendosur diktaturën e saj, qëndron kundër argatëve, lakejve të saj në të gjitha institucionet dhe më gjerë.

Qëndron kundër në mënyrë të padiskutueshme në fitoren e saj,” tha Sali Berisha duke siguruar se ashtu siç u zvarrit ati i tyre shpirtëror, do krrehen edhe këta nga pushteti, do i bëjnë pluhur me lëvizjen opozitare.

“Përpjekja që bënë me 9 shtator, kjo bandë me mafian ndërkombëtare të George Soros, dëshroi në mënyrën më spektakolare.

Sot opozita është në këmbë më shumë se kurrë. Sot kjo përpjekje do të arkivohet, do të dështojë me turp me përmbysjen e këtyre kriminelëve që janë sot në pushtet dhe që kanë shkatërruar Shqipërinë, shqiptarët më shumë se çdo pushtues tjetër në histori.

Këta ministra, ky kryeministër këta deputetë pasurohen si shushunja çdo ditë, çdo javë duke thithur gjakun gjakun e me të varfërve. Këta kanë përzënë nga Shqipëria 1.3 milionë banorë.

Këta i pret verdikti i madh i opozitës, i pret gjyqi i madh i kombit shqiptar dhe historisë së tij.

Këta të ardhme nuk kanë.

Sot kanë rreshtuar me dhjetëra gardistë dhe struken prapa tyre për të mbrojtur krimin e shëmtuar që kryejnë.

Por nesër, siç u zvarrit ati i tyre shpirtëror, do krrehen edhe këta nga pushteti dhe kam bindjen më të thellë se nuk ka forcë në botë që mund t’i pengojë shqiptarët për të rivendosur në piedestal idealet dhe vullnetin e tyre të lirë,” tha lideri i opozitës duke përfunduar:

“Sot pra është një ditë beteje, në të cilën ne do qëndrojmë.

Por kjo është edhe një ditë frymëzimi për ne, sepse atë që mendojnë ky grup narkotrafikantësh, ne do e bëjmë pluhur me lëvizjen tonë të fuqishme.

Ndaj dhe thirrja o sot o kurrë për të drejtat tona, për lirinë e votës, për fitoren e opozitës.”