Nga Rruga e Shpresës, Berisha: Të ngrihemi, të përmbysim këtë regjim, të çelim dyert e mbyllura të BE!

Kryetari i partisë Demokratike, Sali Berisha, u bëri thirrje mbështetësve të tij nga “Rruga e Shpresës”, që çdo ditë janë gjithnjë e më shumë, të ngrihen të përmbysin këtë regjim për të çelur dyert e mbyllura të Europës për Shqipërinë.

“E ardhmja europiane e Shqipërisë është e ardhmja më e shkëlqyer. Integrimi ynë në familjen evropiane është interesi absolut i çdo shqiptari. Ndaj dhe populli i opozitës, popull i vokacionit perëndimor të kombit shqiptar, të marrim në dorë fatin e Shqipërisë dhe jo t’ia lëmë atë një armiku të shqiptarëve, kryehajdutit të kombit, një të keqe të madhe që po shfaros, që po largon, që po poshtëron, që po varfëron, që po mjeron më shpejt dhe më shumë se çdo pushtim tjetër, shqiptarët dhe vendin tonë,” tha Kryetari i Partisë Demokratike para mbështetsëve të tij që vazhdojnë të kundërshtojnë vendimin e SPAK dhe GJKKO me arrest shtëpie për liderin e tyre ndërsa kishte një mesazh për Kryeministrin:

“Përsëri do t’i drejtohem Edi Ramës, armikut të egër të Shqipërisë së gjitha kohërave, nga Skënderbeu gjer më sot. Edi Rama, struku por je i pashpresë! Kjo rrugë, prozhektorët e saj të shpresës, të dritës, po ngrohin dhe po ndriçojnë çdo ditë e më shumë zemrat e shqiptarëve.

Ty të pret fati i etërve të tu biologjikë, të pret fati i Noriegës, fati i narkodiktatorëve në të gjithë botën,” tha Kryetari i Partisë Demokratike, Sali Berisha, ndërsa i bëri thirrje atyre demokratëve që nuk gjunjëzohen para këtij regjimi dhe që në ditën e parë ishin dhjetëra, dhe sot numërohen me mijëra dule e bërë krenar “Rrugën e Shpresës”:

“Të ngrihemi të shpëtojmë shoqërinë shqiptare nga kthetrat e egra të krimit që e kanë kapluar. Të ngrihemi të përmbysim këtë regjim për të çelur dyert e mbyllura të Europës për Shqipërinë.”

Fjala e plotë:

Mirëmbrëma dhe përshëndetjet më të përzemërta, ju misionarëve të vërtetë, djemve dhe vajzave, burrave dhe grave që qendroni të pamposhtur, qendroni të vendosur, qendroni të sigurt në misionin tuaj, në fitoren tuaj, në fitoren e opozitës shqiptare, fitoren e Shqipërisë.

Sot, shqiptarët kudo që janë, nderojnë me adhurimin më të madh, prijësin e tyre të të përjetshëm, Skënderbeun në ditën e përjetësisë së tij.

Miqtë e mi!

Skënderbeu i doli zot Shqipërisë dhe kombit në një kohë kur rajoni dhe Europa dridhej para fuqisë së Perandorisë Otomane.

Ky shqiptar, ky atdhetar, ky princ i lirisë, besoi tek shqiptarët, besoi tek trimëria dhe guximi i tyre, besoi te forca dhe fuqia e armëve të tyre dhe bëri beteja për 25 vite me radhë, të cilat bënë historinë e kohës, jehuan në të katër anët e planetit dhe Skënderbeu mori përjetësinë.

Natyrisht, ajo kohë ishte kohë perandorish, ishte kohë shekuj më parë, por Skënderbeu mbetet për çdo shqiptar, frymëzimi i tij. Skënderbeu mbetet engjëlli që ruan Shqipërinë dhe shqiptarët në çdo kohë. Skënderbeu i vetëm, por u ngrit dhe mundi një perandori. Forca e vërtetë e tij qëndronte në të vërtetat që mbronte. Në idealet për të cilat ai luftonte dhe luftoi. Ndaj dhe për ne, ai është dhe mbetet frymëzuesi i çdo shqiptari, që beson të vërtetën, që është i vendosur të sakrifikojë për të.

Ju jeni të pathyeshëm, sepse ju po mbroni të vërtetat e mëdha të kombit.

Skënderbeu luftoi një pushtim të huaj, kurse ju po luftoni një pushtim të brendshëm më barbar se sa çdo pushtim tjetër që kanë njohur shqiptarët. Po luftoni një pushtim të brendshëm si pushteti i një kryehajduti që në 8 vite varfëroi, mjeroi duke vjedhur shqiptarët në mënyrë të pamëshirë dhe duke u pasuruar vetë me miliarda, me qeveritarët e tij, me suitën e tij.

Edi Rama me regjimin e tij në 8 vite rrokullisi shqiptarët në njerëzit më të keqpaguar në rajon.

Prej muajsh e muajsh është dërguar në parlamentin e krimit ligji për minimumin jetik në mënyrë që shqiptarët të mos vuajnë për vaktin e ushqimit. Por ky ligj refuzohet, sepse Edi Rama e di se duke i varfëruar shqiptarët, ata ose nënshtrohen gjithnjë e më shumë, ose largohen nga vendi i tyre.

Edi Rama në urrejtjen e tij për opozitën, përdori të gjitha mjetet për asgjësimin e saj. Përdori çdo mjet për t’i mbyllur asaj gojën. Por dështoi. Kjo rruga është sot rruga e parlamentit të lirë të shqiptarëve. Oratorët e kësaj rruge janë parlamentarët e fjalës së lirë. Janë përfaqësuesit e shkëlqyer të qytetarëve, të të vërtetave të tyre.

E gjithë beteja që zhvillohet sot mes kleptokratëve, hajdutëve, trafikantëve qeveritarë dhe ju, popullit të opozitës, popullit guximtar, ka vetëm një motiv kryesor: Edi Rama kërkon të fshehë krimet e tij. Ka tmerr dhe ferr nga krimet e tij, ndaj dhe është i aftë të bëjë gjithçka duke urdhëruar mercenarët e tij në SKAP që të mbajnë në arrest shtëpie Sali Berishën.

Ai goditi me korrupsionin e tij, goditi me sistemin e vjedhjeve të tij, me krimet e tij, antikorrupsionin. Mendoi të godasë zërin e fuqishëm që e ka denoncuar në çdo akt, në çdo vjedhje, në çdo poshtërsi, në çdo tradhti.

Miqtë e mi!

Edi Rama është kryeministri i vetëm në historinë e këtij vendi, që nga kryetar hajdut i Bashkisë së Tiranës, u bë kryeministër me një vilë 57 metra të gjatë, me një oborr 5 mijë metra katror. Ndërkohë kishte të deklaruara 3800 euro dhe 400 mijë lekë.

Edi Rama u bë kryeministër, ndërkohë që zonja e tij solli në pajë pallatin 5-katësh të ndërtuar pa asnjë qindarkë fatura bankare, ndërtimi, tatimi, dogane etj. Gjithçka në truall, sikundër në Surrel, mbiu nga vjedhja, vjedhja dhe vetëm vjedhja.

Edi Rama mendoi se do mbyllë vjedhjen e tij duke shkarkuar drejtuesen e institucionit të deklarimit të pasurive, një njeri të ndershëm, me integritet, e cila në përputhje me ligjin nisi hetimin e tij dhe të bashkëshortes së tij.

Por unë sot jam këtu para jush, Edi Rama, ti dhe bashkëshortja nuk do shpëtoni kurrë nga vila me themelet 57 metër dhe pallati 5-katësh të ngritur me vjedhje, vjedhje dhe vetëm vjedhje.

Edi Rama mori pushtetin për të varfëruar shqiptarët dhe pasuruar veten e tij. 200 milionë euro do e akuzonte OSBE se ka depozituar në bankat offshore. Nuk guxoi të përgënjeshtrojë, nuk guxoi të thotë një fjalë, por heshti si fija e barit sepse ata i tregonin llogaritë. Por hajdutët nuk ngopen kurrë me vjedhjet e tyre. Ai vazhdoi, me firmën e tij u realizuan vjedhjet e shekullit.

Edi Rama firmosi themelin e djegësve, për të cilët shqiptarët, po të mos ishte opozita, do paguanin 1 miliardë euro për Edi Ramën dhe Erion Veliajn. Edi Rama firmosi dhënien e tyre pa garë, në kundërshtim me ligjin. Edi Rama firmosi bonusin 8 përqind për djegësin e Tiranës.

Pra, Edi Rama është arkitekti i vërtetë i vjedhjes së shekullit.

Edi Rama është njeriu që me Beqën e tij dhe muratorin të cilit i dha sterilizimin, rriti 83 herë çmimin e kësaj procedure. Përjashtoi nga mundësia e operacionit për shkak të kostos së lartë, çdo muaj të paktën 1 mijë shqiptarë.

Hajduti nuk ngopet kurrë. Pasi e pa se për vilën e tij 57 metra të gjatë, sarajet e tij, se për pallatin 5-katësh në sheshin e pallateve, se për aferën 1 miliardëshe të djegësve, se për aferën qindra milionë të sterilizimit dhe të check-up nuk i hyri ferra në këmbë, sepse Skapi është një degë e turpshme kriminale e ekzekutivit të Edi Ramës, ai vazhdoi me Portin e Durrësit.

Miqtë e mi!

Edi Rama në Portin e Durrësit po vjedh një pasuri kombëtare, e cila shkon më së paku 4 miliardë euro. 1.4 milionë metër katrorë tokë. Pa llogaritur basenin përreth.

Atëherë, si ka mundësi që shqiptarët të pajtohen me këtë gjë?

Opozita, PD, Sali Berisha i kanë denoncuar dhe do i denoncojnë çdo natë.

Por ju bëj thirrje të gjithë atyre që na ndjekin. Mos prisni kurrë që t’i presë kush dorën me gërshërën e ligjit kryehajdutit të kombit, Edi Ramës. Vetëm gërshëra e qytetarëve, vetëm ju, vetëm guximi juaj do i japë atij përgjigjen që meriton.

Shqipëria sot fton çdo shqiptar të ngrihet në këmbë në mbrojtje të saj. Fton çdo shqiptar të ngrihet në këmbë për dinjitetin e tij, për fëmijët e tij, për të ardhmen e tyre në Shqipëri. Askush nuk do vijë ta përmbysë për ne Edi Ramën.

Miqtë e mi!

I pyesni pak ata që përmbytën diktaturën komuniste: Kush erdhi me ne me 21 shkurt kur zvarritëm diktatorin rrugëve të Tiranës? Kush ishte me studentët çlirimtarë kur u përballën dhëmb për dhëmb me diktaturën e Ramiz Alisë? Askush përveç vetes së tyre, idealeve të tyre, vendosmërisë së tyre për t’i dalë zot Shqipërisë.

Ndaj dhe njëherë, Skënderbeu frymëzon çdo shqiptar të qendrojë në të vërtetat që beson. Të qendrojë në idealet që beson. Të qendrojë i pamposhtur, sepse ai qëndroi kundër perandorisë më të fuqishme të kohës dhe triumfoi. Ai qëndroi kundër hordhive më të mëdha të kohës dhe triumfoi.

Beteja e tij ishte në të vërtetë një betejë për Shqipërinë në Perëndim, ishte një beteje për Shqipërinë në Europë, dhe kjo është përsëri një thirrje për çdo shqiptar, të ngrihemi, të nxjerrim këtë tokë të bekuar nga kthetrat e mafies pa mëshirë.

Të ngrihemi të shpëtojmë shoqërinë shqiptare nga kthetrat e egra të krimit që e kanë kapluar. Të ngrihemi të përmbysim këtë regjim për të çelur dyert e mbyllura të Europës për Shqipërinë.

Miqtë e mi!

E ardhmja europiane e Shqipërisë është e ardhmja më e shkëlqyer. Integrimi ynë në familjen evropiane është interesi absolut i çdo shqiptari. Ndaj dhe populli i opozitës, popull i vokacionit perëndimor të kombit shqiptar, të marrim në dorë fatin e Shqipërisë dhe jo t’ia lëmë atë një armiku të shqiptarëve, kryehajdutit të kombit, një të keqe të madhe që po shfaros, që po largon, që po poshtëron, që po varfëron, që po mjeron më shpejt dhe më shumë se çdo pushtim tjetër, shqiptarët dhe vendin tonë.

Së fundmi, përsëri do t’i drejtohem Edi Ramës, armikut të egër të Shqipërisë së gjitha kohërave, nga Skënderbeu gjer më sot.

Edi Rama, struku por je i pashpresë!

Kjo rrugë, prozhektorët e saj të shpresës, të dritës, po ngrohin dhe po ndriçojnë çdo ditë e më shumë zemrat e shqiptarëve.

Ty të pret fati i etërve të tu biologjikë, të pret fati i Noriegës, fati i narkodiktatorëve në të gjithë botën.

Rrofshi ju, rroftë Shqipëria!

Fitore, fitore, fitore!