S’keni parë gjë akoma! Tani Edi Rama mund të sjell edhe Zotin socialist në COD!
Kryetari i Partisë Socialiste, Edi Rama, u ul në fronin e Kryeministrit duke premtuar 300 mijë vende pune dhe me qeverinë socialiste u punësuan shumë më shumë se aq ndonëse qyteteve të ndryshme të Evropës dhe Amerikës, pa u ankuar pse Regjimi i Ramës i detyroi të braktisin vatanin!
Por, ishte po ky Edi Rama që mori tre mandate për Kryetar të Bashkisë Tiranë duke premtuar 24 orë ujë dhe iku nga ky fron pa garantuar as 24 minuta ujë në 24 orë pikërisht në ato zona ku votën e kishte të sigurt; Dhe, nuk u ankua njeri!
Premtoi Shëndetësi falas dhe vetëm për katër vjet shqiptarët nuk gëzuan nga qeverisja socialiste, jo falas por as shëndetësi, dhe u degdisën sporteleve të spitaleve private, aty ku e-albania nuk është kusht nëse do të pranohesh në emergjencë edhe nëse je me librezë në dorë!
E pse duhet ta mbajë premtimin kur filloi drejtimin e Bashkisë Tiranë duke premtuar Unazën e Madhe dhe pas tre mandateve ka ulë në atë fron Lali Erin që vazhdon e flet për këtë Unazë duke i lënë vend për marketing Kryeministrit për të na thënë hap pas hapi, e kilometër për kilometër, sa kanë mbetur deri te përfundimi i kësaj Unaze kur Lali po gëzon edhe mandatin e tij të tretë.
Premtoi Reformë në Drejtësi kur vetëm Gjykata e Apelit ishte e kriminalizuar në ekstrem dhe solli vettingun për të futur në sitë gjithë sistemin! Sot, pas spastrimit të Sistemit të Drejtësisë vetëm nga malokët e Saliut dhe partizanët e Likes, nuk kemi asnjë gjykatë funksionale ndërsa Apelit i shtoi damkën edhe partiake përveç se kriminale!
E pse duhet t’ju ofroj shqiptarëve drejtësi të reformuar kur në kohën që ishte në krye të Bashkisë Tiranë, ligjshmërinë e fitoi me sëpatë në dorë duke dhënë shembullin se si luftohet burokracia shtetërore e në rastin në fjalë, ajo e KESH-it; Dhe, nuk protestoi njeri! Madje po me këtë KESH, kur u bë Kryeministër çoi shqiptarët në birucë edhe që nuk kishin paguar 2.300 lekë drita; Jo për tangërllëk, por nuk kishi as ato 17-18 euro për të paguar faturën e dritave!
Premtoi një Shqipëri të pastër me mbetjet që do të përfundojnë në inceneratorë! Shqiparët nuk panë as Shqipëri të pastër dhe as inceneratorë, por vetëm akuza për vjedhje të këtyre parave! Një përjashtim të ditëve të pastra në Shqipëri bëjnë ato ku shkelin këmba e Kryeministrit ose Lali Erit ndërsa shqiptarët shohin gjithnjë e më shumë dokumenta të firmosur fap-fap-fap që çuan paratë e inceneratorëve në xhepat e qeveritarëve dhe bashkëpunëtorëve të tyre, ndërsa SPAK-u heshtë.
E pse duhet Edi Rama ta bëjë Shqipërinë e pastër kur mandati i pari si kryetar i Bashkisë Tiranë që i shkoi nga kazani në kazan, nuk i dha vota dhe iu desht partisë të vjedhin votat për të fituar zgjedhjet në mënyrë që Rama të dal fitues edhe kur përballë kishte një delirant si Spartak Ngjelën.
Premtoi një Shqipëri pa krim dhe filloi promovimin e SPAK-ut si produktin socialist më të vyer! Së fundi, ndërmori edhe operacionin më të madh duke lëshuar 50 fletë arreste për bosët e krimit, por, jo vetëm që nuk i arrestoi por u kuptua se ata kishin marrë dhenë ende pa u firmosur Urdhëri, ndërsa si Kryeministri Edi Rama ashtu dhe Ministri i Brendshëm Taulant Balla, nuk morën guximin të përmendin as emrat e bosëve të krimit, ashtu siç kërkoi deputeti i PD, Taulant Balla!
E pse duhet ta luftoj krimin kur me ndihmën e këtij krimi erdhi në pushtet, e kriminalizoi gjithë parlamentin, e kanabizoi gjithë Shqipërinë dhe nuk u ankua njeri!
Premtoi liri për grupet e margjinalizuara me theks të veçantë te LGBTQ+, që me plotë të drejtë lezbiket, homoseksualët, biseksualët, transët, queerët dhe interseksualët shqiptarë pritën ditë më të mira përveç 17 Majit meqë ishte George Soros me Shoqërinë e tij të Hapur që e solli Edi Ramën në pushtet. Dhe, çka përjetuan! Jo që nuk fituan të drejtën e martesës, siç u ishte premtuar, por as edhe një ceremoni martesore ndonëse u zhvillua në maje të Bashkisë Tiranë, ku e gjitha ishte falso, madje edhe prifti që ishte marrë me qira nga Lali Eri!
E pse duhet Edi Rama të kujdeset për LGBTQ+, kur mashtroi paraplegjikët dhe tetraplegjikët deri sa u mori votën dhe nuk do t’ja dijë që ekzistojnë! Të verbërit ngelën me letra në dorë duke u ankuar edhe për një shoqërues, e funksionimi i shoqatës as që përmendet! Ashtu siç bëri me familjet e policëve dhe ushtarëve të vrarë, dhe nuk protestoi njeri!
A doni më për Belul Kristaq Ramën?! Ka dhe shumë të tjera në një vend ku nuk ka sindikata, ku krijohet Autoriteti i Dosjeve të Sigurimit të Shtetit dhe dosjet i hapin komunistat, dhe, ku Partia Socialiste fiton edhe në qytetin më antikomunist, Shkodër!
Pra, skeni parë gjë akoma, dhe mos u çudisni kur një ditë Edi Rama ta sjellë Zotin socialist në tokën shqiptare, natyrisht për ta prezantuar fillimisht në Qendrën për Hapje dhe Dialog, COD! Kjo qendër vërtetë është hapur me qëllim të transformimit të selisë së Këshillit të Ministrave në një hapësirë në shërbim të qytetarëve, që të përçojë mesazhin e hapjes, transparencës dhe transformimit, por aty u pa gjithëfarë horri socialist të promovoj vlerat e veta, dhe nuk protestoi njeri!
E pse nuk mundet një ditë të bukur të vijë dhe të tallet në COD me shqiptarët edhe një horr socialist më shumë dhe të thotë se është Zoti socialist i shqiptarëve, pavarësisht se do të protestojnë kishat dhe xhamitë!
Shqiptarët po heshtin!
Dhe, sot, kur, Edi Rama kontrollon ujin, ajrin dhe tokën shqiptare, urojmë të mos i shkoj në mend kjo gjë sepse goja dhe shpirti shqiptar ka kohë që është shuar!
