Ndahet nga jeta Ish-Deputeti Gerti Bogdani, Berisha: Lajm i zi, humbje e madhe për PD-në dhe shoqërinë shqiptare
Një lajm i zi në këtë moment më erdhi këtu në tavolinë. Ky është një lajm shokues, këto janë fjalët me të cilat Kryetari i Partisë Demokratike, Sali Berisha, priti lajmin ndërsa ishte në një konferencë për media të cilën u detyrua ta ndërpres me lot në sy pas nderimit me një minutë heshtje së bashku me gazetarët prezent.
“Gerti Bogdani ka qenë dhe do të mbetet në memorien time, njëri nga personalitetet e reja të PD-së më të njohura, më të shquara. Ka qenë një politikan demokrat, me civilitet, me formim me përgatitje, me ndershmëri, me urtësi, në shkallën më të lartë. Kjo është një humbje e madhe për PD-në, por është një humbje e vërtetë për shoqërinë shqiptare. Gerti Bogdani ishte nga ata të rinj, pasardhës i një familje të shkëlqyer, të rreshtuar që në fillime me PD,” tha Sali Berisha për ish-deputetin e Partisë Demokratike të shkolluar me rezultatet më të larta në shkollat më të mira të SHBA.
“Ai midis një të ardhme në vendin ku u shkollua, ku kaloi vitet e rinisë studentore, dhe kontributet për vendin e tij dhe PD, zgjodhi këtë të fundit. Ky lajm shokues për mua dhe çdo demokrate e demokrat, por edhe çdo qytetare e qytetar që e ka njohur Gerti Bogdanin më erdhi në këtë moment si rrufe ne qiell të hapur. Dy net më parë e kam ndjekur në një studio televizive,” tha Kryetari i Partisë Demokratike, Sali Berisha, duke përfunduar:
“Mendoj se në rast se ka një njeri që njoh unë, i cili tek çdo qytetare dhe qytetar, mik, shok i njohur, ka lënë vetëm përshtypje pozitive në çdo takim, në çdo komunikim, ky është Gerti Bogdani, ndaj dhe ju ftoj të ngrihemi dhe të mbajmë 1 minutë heshtje kujtimin e ndritur të këtij personaliteti të shquar, të ri, të PD.
I paharruar kujtimi i tij!”
Ndërkohë u ndëpre edhe Mbledhja e Komisionit të Mandateve me kërkesë të Kryetarit të Grupit Parlamentar të PD, Gazment Bardhi, sapo u erdhi ky lajm tronditës dhe shumë i rëndë.
“Sapo është konfirmuar se kolegu ynë, Gert Bogdani sapo ka ndërruar jetë. Ky lajm është tronditës dhe shumë i rëndë për ne kolgët e tij në PD, besoj për kolegët e tij në Kuvendin e Shqipërisë. Kërkoj ndërprerjen e mbledhjes,” tha Gazment Bardhi ndërsa kryetarja e Këshillit të Mandateve, Elisa Spiropali, shprehu ngushëllimit për ndarjen nga jeta të ish-deputetit demokrat.
“Të prehet në paqe kolegu ynë Gert Bogani. Ngushëllime nga zemra, familjes së tij u pretë në paqe,”
