Dita e Falënderimeve, Hovenier: Mirënjohës, për ushtarët tanë që shërbejnë në Kosovë

Në Ditën e Falënderimeve, Ambasadori amerikan në Prishtinë, Jeff Hovenier, ka falënderuar ushtarët amerikanë, që shërbejnë larg familjeve të tyre duke kontribuar për një Kosovë të qetë dhe të sigurt.

“Mirënjohës që festova falënderimet këtë vit me anëtarët e shërbimit amerikan në Kosovë dhe i nderuar që më janë bashkuar Presidentja Vjosa Osmani dhe miqtë tanë kosovarë. Thellësisht falënderues për ushtarët tanë, që shërbejnë larg familjeve të tyre, të cilët çdo ditë po kontribuojnë për një Kosovë të qetë dhe të sigurt,” shprehet Ambasadori Jeff Hovenier në urimin e tij përmes rrjetit social Facebook duke përfunduar:

“I uroj të gjithëve Gëzuar Ditën e Falënderimeve!”

Ndryshe, Dita e falenderimeve filloi si traditë kur erdhën kolonët evropianë në Amerikë. Ata mblodhën të korrat, festuan dhe dhanë falenderimet për ushqimin. Kolonë pelegrinë nga Anglia e festuan për herë të parë Ditën e parë të Falenderimeve në vitin 1621.

Me shtimin e kolonive amerikane, festimet për falenderimet u përhapën edhe më shumë, por vetëm pas 250 vjetësh, Presidenti Abraham Lincoln e shpalli të enjten e fundit të nëntorit si festë kombëtare. Më pas Kongresi e deklaroi se kjo ditë do të festohej çdi vit të enjten e katërt të nëntorit.

Shkrimtari amerikan William Sydney Porter i njohur si O. Henry e ka quajtur Ditën e Falënderimeve si të vetmen festë krejtësisht amerikane.