Veni, Vidi, Non Vici*
Veni, Vidi, Vici! Kështu dilte triumfues Edi Rama pas çdo vizite në Kosovë ashtu siç e përshkroi Cezari suksesin në betejën e Zelas duke raportuar para Senatit: Erdha, Pashë, Fitova!
Por, vizita e së premtes në Kosovë, Kryeministrit Edi Rama i doli ndryshe jo vetëm nga beteja e Cezarit në Zela, por, dhe nga vizitat e tjera që Rama bëri në Kosovë duke lënë të përçarë LDK-në dhe PDK-në, LDK-në e PDK-në me AAK-në, dhe, LDK-në, PDK-në e AAK-në me Lëvizjen Vetëvendosje, madje duke mos takuar as Kryeministrin Albin Kurti fare, por, duke zhvilluar takime me liderët e partive parlamentare që ai preferonte, jo në Parlamentin e Kosovës por nëpër burektore!
Dhe, për epilogun e seancës së përbashkët të së premtes të Parlamenteve të Shqipërisë dhe Kosovës, merita i takon, fatkeqësisht, vetëm liderit të Lëvizjes Vetëvendosje dhe Kryeministrit, Albin Kurti!
Kur Cezari raportoi para Senatit ai fliste për një fitore të shpejtë dhe të papritur ndaj Mbretit Farnak II, siç e ka përshkruar në veprën e tij “De Bello Gallico”, por, dëshmitarët ishin të shumtë edhe për këtë përshkrim ironik!
Por, kur Kryetari i Partisë Socialiste dhe Kryeministri Edi Rama del e flet para deputetëve të Parlamentit të Kosovës, pa kërkuar falje, për të gjitha inciativat evropiane dhe jo vetëm, që ai i ka imponuar Prishtinës zyrtare dhe për 13 vjet në pushtet nuk i ka sjellë asnjë njohje Kosovës, ndësa sanksionoi Kosovën duke i prirë vendimit të BE-së dhe duke i dhënë të drejtë në çdo rast Serbisë karshi Kosovës, dhe sot akuzon BE-në dhe i jep leksion autoriteteve kosovare të ngrijnë dialogun me Serbinë, kjo hipokrizi e Edi Ramës meritonte një përgjigje si nga opozita ashtu dhe qeveria kosovare!
Dhe jo vetëm kaq!
Kur Edi Rama flet sot për Ibrahim Rugovën e madh, ishte detyrë nëse jo e liderit që është indeferent po aq sa Rama ndaj Dr.Rugovës, e parisë që u rritë dhe bashkëjetoi në LDK me Presidentin historik, se Lidhja Demokratike e Kosovës është po ajo parti që ai dhe partia që drejton Rama e përbuzi dhe e fajësoi për raportin që kishte si me mënyrën e të luftuarit ashtu dhe marrëdhëniet me Serbinë pas saj, kur LDK ishte në pushtet!
PDK, kishte një përgjegjësi edhe më të madhe se çdo kush tjetër në këtë tokë jo vetëm pse kanë prijësin shpirtëror të përbashkët, Rexhep Qosjen, por, sepse Edi Rama ka meritat më të mëdha që bindi Kryeministrin Hashim Thaçi për të miratuar Gjykatën Speciale dhe sot akuzon po këtë Gjykatë se po na e mbaka peng mikun e tij dhe Presidentin Hashim Thaçi!
“Po ku janë sot përfaqësuesit e UÇK- së që Rexhep Qosja kërkonte me patjetër në atë udhëtim historik?Ne dimë me siguri, se ato çaste vendimmarrjesh të mëdha dhe e sotmja do t’i ngjante të shkuarës, pa UÇK, me në krye Hashim Thaçin.
Por sot që ne jemi të gjithë këtu, në Kuvendin ku u shpall e firmos këtu përpara meje pavarësia e Kosovës, Hashim Thaçi, Jakup Krasniqi, Kadri Veseli e Rexhep Selimi, vazhdojnë të mbahen peng, prej gati 5 vjetësh, në qelitë e një drejtësie ndërkombëtare, e cila, në çdo hap, ka zhgënjyer këdo që ka pritur prej saj, virtytet e drejtësisë së një shteti të së drejtës,” thotë Edi Rama pa i kërkuar falje si PDK-së dhe mbështetësve të saj ashtu dhe të gjithë neve që ishim kundër kësaj Gjykate Speciale dhe akuzoheshim nga një kastë e tërë sepse ishin karikuar nga po ky Edi Ramë se ne jemi tradhëtarë dhe nuk e duam Kosovën të ecë përpara në BE!
Dhe, sot, kur nuk i kërkon falje as deputetëve të Lëvizjes Vetëvendosje që kishte përballë së bashku me Kryeministrin Albin Kurti që ishin të vetmit që votuan kundër Gjykatës Speciale, u jep leksione si duhet ta rrëzojnë me Rezolutë këtë Gjykatë!
Kush ta rrëzoj?! Këta që e votuan kundër!
“Unë nuk rri dot po ashtu, pa ua thënë këtu vëllazërisht çudinë time për faktin që në këtë sallë nuk është ndërmarrë asnjëherë një nisëm për t’ju kërkuar përmes një rezolute të mbështetur nga të gjitha forcat politike, të paktën nga partitë shqiptare, të gjitha vendeve financuese të asaj gjykate shqetësimin e madh mbi standardet e atij procesi dhe për të kërkuar ngritjen e një misioni verifikimi lidhur me këtë shqetësim,” thotë i gjithëdituri dhe hipokriti që nuk pranon asnjë faj, Edi Rama!
Këtu jo vetëm që mungoi zëri i PDK-së kundër hipokrizisë së Edi Ramës kundër Gjykatës Speciale por qoftë dhe një nga Parlamenti i Kosovës për të kërkuar sqarim pse ky njeri jep leksione për Rezoluta kur ai vetë me partinë që drejton refuzoi miratimin e Rezolutës që kishte miratuar Parlamenti i Kosovës, vetëm pse ishte kërkuar nga PD në Tiranë!
Dhe, çuditërisht, ndonëse një zë i ashpër për marrëdhëniet që Kosova ka me BE u dëgjua në këtë seancë, i Ish-Kryeministri Ramush Haradinaj, ai ishte i dedikuar për Kryeministrin e Kosovës, Albin Kurti si “fajtor”, edhe pse vinte nga një njeri që u akuzua nga vetë Kryeministri Edi Rama kur i vendosi masa Serbisë!
Madje, akuzat ndaj Kryeministrit Kurti, Ish-Kryeministri Haradinaj nuk i kurseu edhe pse para syve kishte njeriun që i pari në glob i vendosi sanksione Kosovës, Edi Rama, anuloi takimin e dy qeverive në Gjakovë, dhe më pas Kosova u sanksionua nga BE!
Edhe pse ndodhi ajo që ishte arsyeja pse Albin Kurti mbante forca speciale në veri të Kosovës, agresioni serb ndaj Kosovës, askush nuk i kërkoi falje Kryeministrit Kurti, si Rama, BE e liderët opozitarë të Kosovës; Dhe, Kosovës iu vunë sanksione! Ato sanksione që Edi Rama i kërkoj ndaj Kosovës për inatin e Albin Kurtit dhe sot i quan absurditet!
“Sanksionet janë një absurditet. Kemi kërkuar që masat ndaj Kosovës të hiqen dhe kemi kërkuar që fondet e BE që janë për Kosovën të lëvdrohen. Duhet të bindim edhe vendet që nuk njohin Kosovën në BE, që ta njohin si shtet të pavarur. Në sytë e BE barra e fajit për begradimit për dialogun duhet t’i bjerë vetëm Serbisë. Ne duam që Kosova të njihet, përfshirë dhe nga vetë Serbia, që Kosova e ka mundur me luftë,” tha Kryehipokriti i PSSH, Edi Rama, si zakonisht pa dinë e imanë!
Në fund, ky avokati i vetëm i Presidentit të Serbisë në Evropë, pasi na lodhi me mediat që ka nën kontroll në Tiranë dhe Prishtinë, atë që nuk thuhet, sepse i tha në sy Aleksandar Vuçiçit, “Kosova është e pavarur”, dhe mbylli sytë dhe gojën me batonë e buzhalë edhe ndaj sulmit terrorist në Banjskë sepse nuk po fliste as Berlini dhe as Brukseli me Washingtonin, tani i thotë armikut kryesor të integrimit evropian sepse po mbronë Kosovën, Albin Kurtit, se sot duhet ngrirë pa afat dialogun me Serbinë!
As tempora, as mores, por, hipokrizi par excellence, që vetëm një njeriut si Edi Rama mund ti dal nga goja!
“Lejomëni të ndaj këtu sot opinionin tim, tanimë të konsoliduar ku ç’nuk kam parë dhe shumë kam mësuar nga marrëdhëniet me miqtë dhe aleatët e me jo dashamirësit tanë, se në këtë faze kaq vendimtare për të Kosova duhet ta ngrijë, ta ftohë, pa afat dialogun bilateral me Serbinë dhe normalizimin e marrëdhënieve me fqinjin verior duhet ta synojë përmes dialogut me BE, duke këputur kërthizën e reciprocitetit nacionalist me Serbinë dhe duke lidhur kërthizën e reciprocitetit europianist me BE.”
Shumë shqiptarë mund ta kenë kritikuar fjalën e ftohtë të Kryeministrit Albin Kurti në këtë situatë, por, sot kur gjaku është ftohur nga fjalët që dolën nga goja e hipokritit par excellence, Edi Rama, mund të konstatohet se në seancën e së premtes Rama shpenzoi bojë, fjalë dhe kohë kot, sepse, thjeshtë, nuk mbështeti qëndrimet e Albin Kurtit, dhe ndodhi kjo që ndodhi!
Albin Kurti nuk i tha në sy “ndodhi sepse nuk më ndëgjove”, por, fatmirësisht, Edi Rama i dha fund kësaj radhe vizitës në Kosovë, jo si zakonisht, si Cezari! Mund të jetë hakërryer, nëse po, aty e ka dhe përgjigjen pse u largua në këtë mënyrë ndonëse është shkruar shumë vjet më parë nga Ali Asllani, kur Serbia vetëm mund të ketë shpresuar se një mitër shqiptare edhe mund të lindë lider të këti soji:
“…ju që s’keni pasur as nevoj’ as gjë të keqe,
më përpara nga të gjithë, ju i thatë armikut: “Peqe!”
Që të zinit një kolltuk, aq u ulët u përkulët,
sa në pragun e armikut vajtët si kopil u ngulët!
As ju hahet, as ju pihet, vetëm titulli ju kihet…”
*Erdha, Pashë, Unë nuk fitova
