Sërish sulmon SPAK, Rama: Klotilda Bushka e mësoi nga televizori se ishte person i dyshuar!

Pas sulmit të pashembullt nga Prokurorisë së Posaçme për arrestimin e Kryetarit të Bashkisë Tiranë, Erion Veliaj, sot Kryeministri Edi Rama mblodhi Grupin Parlamentar të Partisë Socialiste për të sulmuar sërish SPAK-un pse mori nën hetim Kryetaren e Komisionit të Ligjeve dhe deputeten e PS, Klotida Bushka.

“Ky është një takim jashtë radhe i Grupit me kërkesë të kryetares së Komisionit të Ligjeve, gjë që e kemi pranuar për faktin se të gjithë jemi të befasuar që kryetarja e Komisionit figuron në atë aktakuzë për kryetarin e Bashkisë dhe bashkëshorten e tij.

Ndërkohë që kryetarja e Komisionit të Ligjeve e ka marrë vesh për përfshirjen e saj në këtë aktakuzë si person i dyshuar nga televizori, as nuk është thirrur, as nuk është pyetur dhe as nuk është dëgjuar,” tha sot Edi Rama por të njejtën gjë nuk e tha kur u arrestua lideri i opozitës Sali Berisha pa u marrë në pyetje, por tha se po vepron Drejtësia e re.

“Nuk do të japim pafajësi për askënd që hetohet nga drejtësia, por ndryshe nga deri dje nuk do të heshtim më përballë shkeljeve të kujtdoqoftë që ushtrimin e forcës së konsoliduar tashmë të pavarësisë, sepse vetëm një maskara mund të thotë që paskëtaj ne kontrollojmë drejtësinë.

Jo ne kemi marrë zyrtarisht certifikatën që duart tona janë larg drejtësisë. Por nuk jemi hunj gardhi që të përcjellim lajme e të mos themi asgjë kur biem në gjurmë me ose pa dashje të episodeve si ky,” tha Kryetari i PS dhe Kryeministri Edi Rama ndërkohë që militantët e tij po prostestojnë para SPAK duke penguar madje dhe hyrjen e furgonave me të arrestuar në GJKKO.

Ndërsa Kryetarja e Komisionit të Ligjeve, Klotilda Bushka, që kërkoi këtë mbledhje të Grupit Parlamentar të PS, pasi u mburrë për miqësinë me Erion Velinë e pranois që kishte ndërhyrë tek Ina Goxhaj, ashtu siç pretendon SPAK, por tha se pse e kishte kritikuar kushërirën e saj që ishte drejtoreshë në orgizatën e Veliajve.

“Sa i përket pretendimit për pengesë të së vërtetës. Po e kam takuar vajzën në fjalë si person që kam punuar më parë dhe kam lidhje gjaku. Ina Goxhaj është kushërira ime. E kam qetësuar duke e këshilluar të thotë të vërtetën dhe i kam sugjeruar si juriste një kushërire të drejtat e saj. vetëm kaq, nuk e kam penguar të thotë asgjë, as kam tentuar të fsheh ndonjë të vërtetë sepse jam e para e interesuar që e vërteta të dalë. E kam kritikuar kushërirën time për faktin se adresa e organizatës ku ajo ishte drejtoreshë nuk ishte ndryshuar nga viti 2017 edhe pse ia kisha kërkuar disa herë këtë gjë. Nuk di të shpjegoj çfarë ka ndodhur në prokurori apo çfarë trysnie ka ndjerë kushërira ime, që në bisedat tona private ajo i ka sjellë me kontekst tjetër. Kjo është e vërteta ime, por për këtë nuk jam thirrur kurrë”, tha Bushka.

Ndryshe, pasi dha detaje për procedurën hetimore të Erion Veliaj dhe veprave të tij kriminale, në fund Prokuroria e Posaçme tha se po kryen hetime paraprake ndaj deputetes së Kuvendit të Shqipërisë, Klotilda Bushka.

“Emri i kësaj të fundit është regjistruar në regjistrin përkatës të njoftimeve si person i dyshuar për kryerjen e veprës penale të “Veprime që pengojnë zbulimin e së vërtetës”, parashikuar nga neni 301 i Kodit Penal. Deri në këtë fazë konstatohet se ekzistojnë të dhëna konkrete të cilat të çojnë tek dyshimi i arsyeshëm se personi nën hetim K. B. ka kryer veprime aktive të kundërligjshme të cilat kanë interferuar me hetimin e organit procedues në lidhje me procedimin penal nr. 27 të vitit 2024,” përfundoi Prokuroria e Posaçme Kundër Korrupsionit dhe Krimit të Organizuar ndërsa falenderoi Policinë e Shtetit për bashkëpunimin në fazën e ekzekutimit të masave të sigurisë.