Presidentja Osmani: Familja Jashari emblemë e UÇK-së, kullat e tyre – kala e lirisë
Sakrifica e familjes Jashari është dritë udhërrëfyese për forcimin e Kosovës, tha Presidentja Vjosa Osmani pas homazheve homazhe në Kompleksin memorial “Adem Jashari” në Prekaz shoqëruar nga Kryetari i Parlamentit, Glauk Konjufca, dhe, Kryeministri Albin Kurti.
“Ata luftuan shumë më gjatë sesa vetëm përgjatë viteve të luftës, duke u shndërruar kështu në emblemë të UÇK-së si dhe duke i shndërruar kullat e Jasharëve në simbol të kalasë së lirisë, që edhe sot e mbron Kosovën, sovranitetin dhe pavarësinë. Nga këtu jo vetëm ne si breza që e përjetuam luftën, por edhe brezat e rinj, fëmijët tanë inspirohen për rrugën përpara për mbrojtjen e lirisë së arritur me sakrificë e gjak. Mbi të gjitha na përkujtohet të gjithëve se sa i lartë ka qenë çmimi për lirinë tonë,” tha Vjosa Osmani për nder të Epopesë së Ushtrisë Çlirimtare të Kosovës ku theksoi se përveç figurës së Adem Jasharit nuk duhet harruar fakti që dhjetëra gra e vajza janë flijuar nga po kjo familje, duke e bërë edhe më të shenjtë sakrificën e tyre ndërsa përfundoi:
“Kjo rrugë dhe sakrificë e tyre do të shërbej për secilin për ne si dritë udhërrëfyese për forcimin e Kosovës, e cila çdo ditë po bëhet më e fortë!”
Kurti: Epopeja e UÇK-së solidarizoi shqiptarët e ndërgjegjësoi diplomacinë
Pas homazheve në kompleksin “Adem Jashari” në Prekaz, Kryeministri Albin Kurti tha se kjo ngjarje shënoi kryengritje, solidarizim e vetëdijësim.
“Epopeja e UÇK-së i dha një hov të pandalshëm kryengritjes së armatosur dhe luftës çlirimtare, shpërthyen demonstrata gjithëpopullore dhe solidaritet i paparë historikisht ndërmjet shqiptarëve në Ballkan, por edhe gjithandej në mërgatë. Njëkohësisht u vetëdijesua e ndërgjegjësua edhe publiku shqiptar e diplomacia botërore,” tha Albin Kurti ndërsa foli për figurat e familjes Jashari tha se ata kanë vetëm ditëlindje, teksa rënia e tyre është vet Epopeja e UÇK-së ndërsa përfundoi:
“Tash ndonëse nuk e kemi kryekomandantin Adem Jashari, bacën Shaban e Hamzën dhe të gjithë të tjerët që u sakrifikuan para 27 vjetëve, e kemi bacën Rifat që do ta vizitojmë me shtëpinë plotë nipa e mbesa. Por mbi të gjitha e kemi Kosovën Republikë, me demokraci e zhvillim.”
Ndryshe, për nder të Epopesë së Ushtrisë Çlirimtare të Kosovës homazhe në Kompleksin memorial “Adem Jashari” në Prekaz bënë edhe personalitete të tjera të ekzekutivit dhe pushtetit lokal.
