Dështoi konstituimi i Parlamentit, Kurti: Kërkesa e opozitës, të lëmë shtëpinë pa zot shtëpie!
Kërkesa e opozitës është insistim i pa matur për të lënë shtëpinë pa zot shtëpie, tha Kryeministri në detyrë, Albin Kurti, sot në mbledhjen e Qeverisë së Kosovës një ditë pas dështimit të konstituimit të Parlamentit duke shtuar se kabineti qeveritar ka dhënë dorëheqje dhe se qeveria është në detyrë.
“Ne kemi funksione të kufizuara po nuk mund të ketë asesi ndalim funksionimi. Shteti s’mund të ketë vakuum qeverisje. Qeveria s’mund të ketë ndalesë funksionimi,” tha Albin Kurti duke saktësuar se Ligji për Qeverinë e bënë të qartë se një qeveri në dorëheqje vazhdon të ushtrojë përgjegjësit e saj deri në zgjedhjen e qeverisë së re
Konstituimi i Parlamentit u pamundësua nga opozita dhe Lista Srpska
Kryeministri në detyrë, Albin Kurti, në mbledhjen e sotme të Qeverisë, tha se konstituimi i Parlamentit dje u pamundësua sepse partitë opozitare PDK, LDK, AAK dhe Lista Srpska nuk votuan për verifikimin e mandateve të tyre si deputetë.
“Në thelb ata që nuk pranuan që formalisht ta marrin mandatin e deputetit po kërkojnë nga unë që formalisht të mos jem kryeministër,” tha Albin Kurti duke përsëritur se kabineti qeveritar është në detyrë dhe efektivisht i dorëhequr që nga 23 marsi i këtij viti, kur është përmbushur mandati i rregullt dhe i plotë katër vjeçar.
“Nga ajo ditë e deri në zgjedhjen e qeverisë së re nga legjislatura e nëntë e Kuvendit të Kosovës, qeveria jonë ushtron të gjitha përgjegjësit që i takojnë pushtetit ekzekutiv në përputhje me legjislacionin në fuqi,” tha Kryeministri i Kosovës duek sqaruar se kjo e vendos qeverinë në një rol kujdestar për të garantuar vazhdimësinë, sigurinë dhe funksionimin e pa ndërprerë të shtetit në zbatim të kushtetutës dhe të ligjeve të republikës.
Në emër të kabinetit, tha ai, përmes një letre ka njoftuar Parlamentin për statusin e qeverisë pas datës 23 mars 2025 dhe për dorëheqjen e tij nga posti ekzekutiv efektiv nga ajo datë dhe sipas Kushtetutës dhe ligjeve në fuqi ndërsa përfundoi:
“Më shumë se kaq nuk është e mundur të jepet dorëheqje, më shumë se kaq do të ishte braktisje e institucionit, do të ishte vakum institucional, pa përgjegjësi politike dhe rrezikim i sigurisë kombëtare.”
