Pianistja Eda Vllaco në koncertin prestigjioz të laureatëve në Paris

Pianistja e re nga Kosova, Eda Vllaco, më 27 prill, do të paraqitet në një ndër skenat më të njohura muzikore të Parisit – Konservatorin Serge Rachmaninoff, ku do të interpretojë në Concert of Young International Laureates, një ngjarje që bashkon talentet e rinj më premtues nga Evropa dhe Azia.

Në këtë koncert të veçantë, që fillon në ora 15:00, ajo do të interpretojë dy vepra të mëdha nga repertori pianist: “Jeux d’eau” nga Maurice Ravel dhe “Preludin Op. 23 nr. 2” nga Sergei Rachmaninoff, duke dëshmuar nivelin e saj të lartë artistik dhe ndjeshmërinë interpretative.

Eda Vllaco, 19 vjeçe, është përfaqësuesja e vetme nga Kosova në këtë koncert ndërkombëtar ku marrin pjesë fitues të garave prestigjioze të moshës 9 deri në 25 vjeç. Ajo tashmë është e njohur për stilin e saj të veçantë dhe përkushtimin e thellë ndaj muzikës klasike.