Vendimi, KAS: Të rinumërohen votat në Gramsh dhe Peqin

Komisioni i Ankimimeve dhe Sanksioneve, KAS, ka vendosur të hapë kutitë e votimit në bashkitë Gramsh dhe Peqin, pas kërkesës së Partisë Demokratike – Aleanca për Shqipërinë Madhështore.

Koalicioni Partia Demokratike – Aleanca për Shqipërinë Madhështore ka paraqitur dyshime për parregullsi në procesin zgjedhor, të bazuara në pamje filmike nga numërimi i votave.

Përfaqësuesi i PD në KAS, Marash Çefa, u shpreh se në video janë vërejtur veprime që mund të përbëjnë manipulim apo shkelje të procedurave zgjedhore.

Vendimi për rinumërimin u mbështet nga dy anëtarët e PD-së në KAS, të cilët kërkuan verifikim të mëtejshëm të rezultatit në këto zona.

Ndryshe, Koalicioni Partia Demokratike – Aleanca për Shqipërinë Madhështore ka depozituar pranë Komisionit Ankimimeve dhe Sanksioneve, KAS, kërkesën ankimore me objekt: 1. Kundërshtimi i vendimit nr. 1328, datë 24.05.2025, të KSHZ, “Për miratimin e Tabelës Përmbledhëse të rezultatit të votimit në zonën zgjedhore Qarku Elbasan, për subjektet zgjedhore dhe kandidatët për deputetë në zgjedhjet për Kuvendin, të datës 11 maj 2025”; 2. Pavlefshmëria e zgjedhjeve të zhvilluara në datën 11 maj 2025 në zonën zgjedhore Qarku Elbasan; dhe, 3. Zgjidhjen e pasojave duke urdhëruar përsërtijen e zgjedhjeve për Kuvendin e Shqipërisë në të gjithë zonën zgjedhore Qarku Elbasan”.