Tiranë, ra ky rinumërim dhe e pamë…
Nuk ka shqiptarë në këtë tokë që ka shpresuar se “rinumërimi” i votave të 11 Majit do të sjellë ndonjë ndryshim thelbësor në rezultat, por, gjithsesi, ky rinumërim dha disa përgjigje që rrëzojnë disa nga idetë që njohësit e betejave elektorale ka kohë që i promovojnë, si dhe rezultatin që me shumë lehtësi e pranojnë OSBE-ODIHR.
Kështu, ra ky rinumërim dhe e pamë që pak rëndësi ka nëse komisionerët dhe numëruesit janë nga administrata, nga ministria e brendshme siç kanë propozuar disa koka të kodeve elektorale, ose nga partitë, kur hajduti më i madh i votave në kryeqendër rezulton të jetë Ministri i Brendshëm, Ervin Hoxha, me 309 vota të përvetësuara.
Ra ky rinumërim dhe e pamë se kur vjedh vota Ministri i Brendshëm, ligjërohen gjithë akuzat për ndikimin e policëve në zgjedhjet e 11 Majit dhe jo vetëm, që tejkalojnë dhe autorizimin që u kishte dhënë Kryeministri i i Pekishtit, Vorës dhe gjithë Shqipërisë, Edi Rama, pasi ata ta kenë mbaruar orarin e shërbimit!
Ndërsa filmat e Edi Ramës me Kuç e me Maç, rrëzojnë dhe projeksionin e tij duke konfirmuar vesin prej hajduti që ka partia të cilën ai drejton, dhe shumë kohë më parë e ka përkufiuzar dhe ish-kryeparlamentari tashmë i ndjerë, Pjetër Arbnori:
Këta nuk janë socialista, këta janë specialista!
Për Zyrën e deputetit Erion Braçe janë thurrur shumë legjenda, u pa në TV edhe një drejtoreshë me një çantë hajdutësh që ia fut vrapit kur përballet me kamera, por rinumërimi na thotë se nuk bëhet fjalë për legejnda sepse Ish-Zv/Kryeministri i Shqipërisë i ka vjedhë 170 vota! Me zemër apo organ gjenital pak rëndësi ka, KQZ tashmë e certifikon edhe si hajdut votash!
Një ngjarje e rëndë është shënuar gjatë numërimit të votave parapëlqyese në një KZAZ në Yrshek, ku njëri prej vëzhguesve të kandidatit të PS, Ornaldo Rakipi, goditi me grusht kryetarin e Komisionit Zonal të Administrimit të Zgjedhjeve, KZAZ. “Grushti” u arsyetua me tensionin në prag të marrjes së mandatit të deputetit Ornaldo Rakipi që kishte 6.793 vota ndërsa kishin mbetur të numërohen votat edhe të 360 Qendrave të Votimit ku Xhemal Qefalia po e ndiqte pas me 6.504 vota!
Por, ky rinumërim tregon se nuk është Rakipi që i vjedh vota Qefalisë, por që të dy vjedhin vota, se kujt ata e dinë. Gjithësesi, rezultati përfundimtar i rinumërimit na tregon se me vesin e tyre socialist, Ornaldo Rakipi arriti të zhvatë 136 ndërsa Xhemal Qefalia 128 vota!
Ra ky rinumërim dhe e pamë se nga banda e Erion Velisë njëri ngeli në klasë. Si mund të jesh në krah të Lali Erit dhe të të vjedhin 49 vota, këtë jo Etjen Xhafa si viktimë, por, sot, as Edi Rama nuk e kupton!
Gjithsesi, kjo është një fitore e madhe e PS-së, kur tipa si ky që nuk dinë të vjedhin vota nuk e morën mandatin; Çfarë i duhen partisë!
Ja p.sh. Klotilda Bushka dhe Fatmir Xhafaj, vërtetë janë në krah të Lali Erit por kur vjen momenti për të vjedhur nuk të falin dekikun! Fatmiri, si Baba i Reformës në Drejtësi arriti të vjedhë 234 vota por për tu turpëruar nuk u turpërua as ajo që drejtonte Komisionin e Ligjeve, Klotilda me përvetësimin e 123 votave. Ca hajdut elektoral mund të relativizojnë këto shifra se nuk janë gjë, por kur shohim kuotat e një vote në bursën e 11 Majit 2025 që varionin nga 100-1000 nuk është për t’u nënvlerësuar!
Në këtë grup të Lali Erit, hajdut mbeti edhe Plarent Ndreca ndonëse i turpëruar me vetëm 16 vota të vjedhura. Se si ka abuzuar ky njeri me tendera dhe klasifikohet ndër vjedhjet intelektuale sipas kreut të SPAK, Altin Dumani, një zot e dinë!
Do të ishte e pandershme të mbyllim sytë para PD-së, sikur atje asgjë nuk ka ndodhur kur u ligjërua një fakt i madh që të gjithë e thonë nëpër kafene! Legjendë urbane mund të jetë që Jorida Tabakun e ndihmoi Edi Rama, por nga rinumërimi rezulton se ajo ka 250 vota më shumë, se kush i ka vjedhur edhe kjo ka përgjigje!
Por, edhe Ilir Alimehmeti për të cilin e gjithë dynjaja i qante hallin rezulton se ka 139 vota të përvetësuara. Kush është hajduti nuk u tha, gjithsesi ato shkuan në koshin e Dr.Alimehmetit!
Personi më i dëmtuar në PD rezulton të jetë Ilda Zhulali me 34 vota të vjedhura, dhe ndryshe nga Jorida dhe Dr.Alimhmeti, zonja Zhulali vazhdon dhe paguan koston e kundërshtive intensive të saj kundër Lali Erit dhe Partisë Socialiste.
Risi me rinumërimin e votave të koalicionit Partia Demokratike-Aleanca për Shqipërinë Madhështore pa dyshim është Ish-Presidenti dhe Ish-Kryeministri Ilir Metaj që deri në uljen në fron të Edi Ramës, gëzonte titullin e hajdutit më të madh të këtij vendi. Por, jo, rinumërimi i votave të 11 Majit tregoi se Likja arriti të vjedhë vetëm 54 vota! Shumë analistë të kriminologjisë, vjedhjen kaq të dpbët e arsyetojnë me faktin se ndodhet në burg, por, po këta analistë nuk arrijnë të shpjegojnë fenomenin se si trafikantët më të mëdhenjë të drogës kanë rritur trafikun e tyre me dhjetëra herë vetëm pasi janë futur në qeli!
Situatë dëshpruese është edhe tek satelitët e Edi Ramës që morën pjesë në këtë proces elektoral!
Kur Edison Abazi nga Mundësia e Agron Shehajt u pa me Edi Ramën që i kishte vu dorën në krah disa ditë para zgjedhjeve të 11 Majit, ai reagoi menjëherë duke thënë se s’ka lidhje me të dhe se ishte i angahzuar në një projekt si artist. Ku e vuri dorën Ei Rama ndërsa po përgatitej për Komitetin e Politikave, e dinë ai vetë, ashtu siç e dinë se pse i vodhi 57 vota më 11 Maj për Edisonin. Gjithsesi, nuk i prishi punë njeriu!
Partia tjetër që synon pushtetin, Lapaj-Shabani, vazhdojnë të heshtin për zgjedhjet e vjedhura, por në dy partitë e tyre rezulton se vetëm këta të dy janë të vjedhur, Adriatik Lapaj 92 vota ndërsa Endri Shabani 66 vota!
Për partitë tjera nuk ja vlenë të flitet dhe është turp që ekzistojnë, siç është turp që sponsori i paguan dhe shteti paguan numërues dhe rinumërues për të tharë gishtat kot me numrin e votave të tyre të papërfillshme!
Përfaqësuesit e KAS-it shpesh kanë fol për rastësi, por që të përkufizohet “rastësia” te numërimi i votës, rinumërimi na mëson se shembulli i vetëm që i përafrohet këtij absurditeti është Lëvizja Bashkë e Arlind Qorit.
Nga votat e kandidatëve vetëm 10 prej tyre rezultojnë me shumicë votash që variojnë 2-5 vota, gjë që mund të futet edhe në atë budallallikun socialist “gabim njerëzor”, nëse mbyllim sytë me ato që kanë ndodhur në shtetet e Bashkimit Evropian, aty ku Edi Rama ka bindur idiotat e tij të dobishëm se do të anëtarësoj Shqipërinë në vitin 2030.
Në të gjitha rastet tjera, kandidatët e Arlind Qorit janë të vjedhur nga 1 deri në 82 vota, që përjashton edhe mundësinë e “gabimit njerëzor”!
Në fund, nuk dihet nëse SPAK do të marr ndonjë masë pas këtij rinumërimi, gjë që askush nuk pret më nga kjo Prokurori e Posaçme e dështuar, por, rinumërimi i dha një leksion të madh këtij mileti:
Pak rëndësi ka nëse rinumërohen votat kur Kryeministër vazhdon të jetë njeriu që kurrë nuk organizoi zgjedhje të lira dhe të ndershme, Edi Rama!
