Vendimi për të hyrë në parlament s’është i lavdishëm! Berisha: Edi Rama do festonte nëse nuk do futeshim!

Vendimi për të hyrë në parlament nuk është i lavdishëm, tha sot Kryetari i Partisë Demokratike, Sali Berisha duke ju drejtuar demokratëve nga Grupi Parlamentar i PD, duke theksuar se Edi Rama rrëmbeu mandatin e katërt dhe misioni i PD është që ai të mos e gëzojë këtë mandat

Sa i përkest kandidates për Kryetare të Bashkisë Tiranë, Ogerta Manastirliu, që e shpalli Edi Rama në Asamblenë e PS, Kryetari i Partisë Demokratike, tha se Rama i çoi Tiranës korbën e korrupsionit, e cila duhej dënuar me burgim të përjetshëm për atë që bëri gjatë pandemisë.

“Për të shmangur burokracinë, shmanga një shtrëngim duarsh me të gjithë ju, që do e bëja me gjithë kënaqësinë.
Sot, ne jemi para një momenti shumë të rëndësishëm, konstituimit të grupit parlamentar dhe përcaktimit të programit, apo strategjisë tonë në jetën parlamentare.
Duhet të jemi fare i hapur me demokratët dhe demokratet, se vendimi i kryesisë për të hyrë në parlament, nuk është një vendim i lavdishëm dhe se jo të paktë janë ata demokrate e demokratë që kanë shkrirë dhe shkrijnë të gjithë energjitë e tyre në mbështetjen tonë, të cilët me mesazhe dhe në mënyra të ndryshme kanë shprehur pakënaqësi me vendimin e kryesisë.
Për mua, nuk kishte asgjë të papritur sepse të hysh në një narko-parlament, ku kartelet e drogës janë më të përfaqësuara se kurrë, ku grupin e partisë së krimit e kryeson njeriu që me dokumente ka porositur vrasje.
E kryeson njeriu që me dokumente zyrtare ka liruar terroristë siç janë ata që i vendosin tritolin Lulzim Kullës. Njeriu që ka liruar kriminelë nga komisariatet. Njeriu që figuron në dokumente zyrtare se është implikuar në dhjetëra afera korruptive të Klement Xhaferit. Një ushtar i vërtetë i Suel Çelës.
Njeriu që me Marion, vëllain e Suel Çelës, përcakton sipas dokumenteve zyrtare, numrin e votave që do marrë, me kusht që t’i arrestojë kundërshtarët politikë. Dhe i arreston. Ky është Taulant Balla.
Imagjinoni se përkarshi kujt ulemi ne. Nuk është problemi Sara Mile, Arkend Balla, Drazhi, ata janë lule në krahasim me çfarë janë Balla, Xhafaj dhe grupi tjetër kriminal.
Dhe unë mirëkuptoj, sepse është e vërtetë që praninë tonë Edi Rama e shfrytëzon, njeriu që nxori sot teorinë e pushtetit të vazhdueshëm, e pushtetit permanent, praninë tonë e shfrytëzon si stoli.
Kjo, të mos kemi iluzion. Sepse sot, ai në mënyrë të hapur, para shqiptarëve dhe botës, tregoi se ç’mendon ai për rotacionin. Se rotacioni është diçka që nuk ka lidhje me të,” tha Sali Berisha para seancës konstituive të legjislaturës së XI-të të Parlamentit të Shqipërisë, e cila pritet të zhvillohet nesër, duke mirëkuptuar demokratët që kanë instinkte politike shumë të zhvilluara, integritet dhe mendojnë se ne po bëjmë një gabim të rëndë që po hyjmë në parlament.
“Tani, unë i ftoj ata të ndalen në një moment fondamental. Dhe që ne demokratët për fatin më të keq, në tërësi nuk e kemi parasysh. Efektin shkatërrimtar të censurës mbi ne.
Ne mendojmë se flasim me njëri-tjetrin, dalim edhe në një studio diku dhe komunikuam me zgjedhësit, në një kohë kur studimi tregon se aksionet tona të komunikimit janë as një e dhjeta e atyre të qeverisë.
Në këtë kontekst, unë në emër tuaj u them demokrateve dhe demokratëve, që mbetën zemërthyer nga vendimi i djeshëm i kryesisë, se prania jonë në parlament, duke qenë zëri i tyre, është absolutisht në kushtet e territ të narko-diktaturës, e një rëndësie në vlerësimin tim jetik për realizimin e qëllimeve tona.
Dhe u garantoj të dashur miq që na ndiqni dhe që më keni dërguar mesazhe, se Edi Rama do festonte sonte në qoftë se ne do kishim vendosur të mos ishim në parlament.
Por nuk injoroj asnjë nga arsyet dhe shkaqet që ju rreshtoni për të mos qenë në parlament.
Por gjithmonë ka në shkaqe dhe pasoja një hierarki dhe ti je i detyruar të gjykosh mbi bazën e hierarkisë së tyre.
Unë u them këtyre miqve tanë, me shumë respekt, se duam apo nuk duam ne, pasqyra mediatike kryesore është parlamenti.
Është pasqyrë, ndaj dhe në qoftë se duam ta mbyllim për opozitën këtë pasqyrë dhe në bindjen time më të thellë- ndoshta jam gabim sepse nuk jam i pagabueshëm- ne do bënim një gabim me pasoja shumë ët rënda për opozitën. Pra, është një gjë madhore shumë.
Demokrate e demokratë, nuk duhet të harroni kurrë se diktaturat nuk kanë armë më të fuqishme se sa censurën dhe terrin informativ në të cilin e zhytin shoqërinë.
Merrni ju lajmet e medieve kryesore, pyesni ata qëjanë në moshë më të shtyrë se ju a kanë një dallim nga televizioni i diktaturës këto mediat kombëtare, që fillojnë se erdhi jahti i një filan princi, ngjarje që nuk kanë asnjë lidhje me qytetarët shqiptarë. As me jetën e tyre, as me rrogën e tyre, as me pensionin e tyre, me asnjë gjë. Kanë vetëm me lustrën e narkodiktatorit.
Ndaj dhe, me gjithë vështirësitë e atij vendimi, do të ishte, për mua, ua them këtu, jashtëzakonisht me pasoja për opozitën në betejën e vështirë shumë që ka ajo për të realizuar qëllimin e vet,” tha lideri i opozitës para Grupit Parlamentar të PD duke shtuar se misioni i tyre është që Edi Rama të mos gëzoi mandatin e katërt që rrëmbeu.

“Por, të dashur miq, e nisa me këtë, mund të kisha shumë problematika, por në radhë të parë janë demokratët dhe ata që na kanë prurë ne këtu dhe me ta do e nisja dialogun.
Përgjegjësia jonë është e jashtëzakonshme.
Qenia jonë në parlament si zëdhënës të tyre, të problematikave të tyre, të interesave të tyre, të idealeve dhe parimeve që ata mbrojnë, është rruga e vetme për të krijuar impaktin pozitiv maksimal dhe për të vazhduar këtë betejë kundër këtij regjimi që sado duket sot i gjithëpushtetshëm, u garanton se Lanën, me punën tonë që do bëjmë, nuk do ta ketë të largët.
Në qoftë se ne hyjmë në mision, që si misionarë të bëjmë gjithçka për të shpëtuar Shqipërinë nga ky narkoregjim, nga kjo diktaturë autoritare që ka uzurpuar të gjitha pushtetet, atëherë ne do justifikojmë edhe besimin e atyre që na kanë sjellë këtu, por do u japim me prova dhe fakte dëshmitë se futja jonë në parlament, sado e dhimbshme, sado në një strofull kriminelësh, përfaqësuesish të Troplinëve, të Hakmarrjes për Drejtësisë, Çopjave, Çelëve, Bajrëve, Tukëve, Dervishëve, me radhë të gjithë. Aty janë, ata e kanë pushtuar parlamentin.
Por ne do do qëndrojmë si përfaqësues të qytetarëve. Ne do të jemi aty për të gjithë interesat dhe problemet e tyre.
Por ne do mund të justifikojmë vendimin që kemi marrë kur të jemi në çdo kohë të mundshme tek zgjedhësit tanë. Po nuk njohëm problematikat, për ne është detyrim madhor që secili prej nesh, atë kohë që ka jashtë parlamentit, tek zgjedhësit tanë.
Në këtë mënyrë ne do ngrihemi në lartësitë e pritshmërive dhe së bashku me demokratët që janë shumë të mërzitur, të dëshpëruar, të zhgënjyer, ne përmbushim kësaj here misionin më të rëndësishëm të jetës tonë.
Edi Rama rrëmbeu mandatin e katërt. Misioni ynë është të mos e gëzojë këtë mandat. Ai nuk mund ta gëzojë këtë mandat.
Po shihja sot spote kundër korrupsionit të qeverisë komuniste të Nepalit. Dhe u kishin nxjerrë ato ornamentet, syze 500 euro, këpucë 1 mijë euro, xhaketat 700 euro, po të gjitha ato të marra së bashku nuk kushtojnë sa çantat e Lubisë apo e Spiropalit. Apo çanta e Uluzi Manjës.
Të gjitha të marra nuk kushtojnë aq. Se këta nuk i fshehin, përkundrazi krenohen me vjedhjet e tyre.
Ndaj dhe ne, them se do u faktojmë mbështetësve tanë se vendimi për të hyrë në parlament dhe për të mbrojtur interesat e tyre ishte vendimi i tyre. Beteja do bëhet në të gjitha hapësirat që ne kemi.”

Në fund, Kryetari i Partisë Demokratike, komentoi dhe shkarkimin e Kryetarit të arrestuar të Bashkisë Tiranë, Erion Veliaj, dhe shpalljen e Ogerta Manastirliut si kandidate e Partisë Socialiste në garën për kreun e kryeqytetit.

“Një personazh, që nuk po ia them emrin, para 40 vitesh, u thoshte të tjerëve që unë dhe Enveri këtë nuk e dimë. Edhe ky i thoshte deleve që ndodh kjo e kjo, shprehte dhembshuri për Erion Veliajn.
Njëherë në radhë të parë duhet ta përgëzoj degën e Tiranës dhe Belind Këlliçin që për 46 javë nuk iu ndanë atij hajduti, ndër më të poshtrit që ka Shqipëria dhe që e ka emrin Erion Veliaj.
Kurse, asnjë diskutim që Rama atë nuk e donte kurrë dhe të gjitha ato që i bëhen atij në burg, dhe që janë çnjerëzore, ua them unë këtu, ne jemi parti e të drejtave të njeriut, se thonë po e mbron, unë nuk e mbroj fare, unë mbroj atë që besoj dhe unë besoj tek të drejtat e njeriut. Pra, të gjithë ato dhunime dhe poshtërime që i bëhen, i bëhen nga Edi Rama dhe Ulsi Manja, sepse donte ky faqezi donte të zgjidhej edhe njëherë dhe e përdorte Altin Troplinin si karrem. Nuk bëhen kurrë ndaj të burgosurit ato.
Pra, ju e patë teatrin që bëhej aty, se jo fëmija, jo ky, jo ai. Dhe ky që i kishte bërë të gjitha vetë. Me urdhër,” tha Kryetari i Partisë Demokratike, Sali Berisha, duke përfunduar:

“Dhe kë i çoi Tiranës? I çoi korbën e korrupsionit.
I çoi njeriun që me qëndrimet që mbajti ndaj Covidit, meriton në mënyrë absolute, minimumi dënim të përjetshëm. Janë 22 mijë vdekje që ajo i fshihte. Plus gjërat e tjera. Janë 500 milionë euro, të avulluara, të dhëna për Covid-in. Dhe ky e çon atë për qytetarët e Tiranës sikur ta ketë Tiranën kopshtin e PS.”

Ndryshe, në konstituimin e Kryesisë së Grupit Parlamentar u vendos që Kryetar të jetë, Gazment Bardhi, Nënkryetarë, Belind Këlliçi dhe Tomor Alizoti, Sekretare Elda Hoti, dhe Zëdhënëse, Ledina Aliolli.
Nënkryetar i Legjislatur së XI të Parlamentit të Shqipërisë nga radhët e PD do të jetë, Agron Gjekmarkaj.