Papa Leoni XIV kujton Shën Gjon Palin II: T’i hapësh zemrën Krishtit, është e nevojshme edhe sot
Në ditën kur kremtohet kujtesa liturgjike e Papës Karol Wojtyła, duke përshëndetur besimtarët polakë, Ati i Shenjtë i nxiti të gjithë të ndjekin ftesën që bëri Shën Gjon Pali II 47 vjet më parë, në homelinë e tij, gjatë Meshës së parë të papnisë: “Ne të gjithë jemi të thirrur të bëjmë detyrën tonë”
Sot kremtohet përkujtimi liturgjik i Shën Gjon Palit II. Pikërisht 47 vjet më parë, në këtë Shesh, ai i kërkoi botës t’ia hapë zemrën Krishtit. Thirrje që mbetet e vlefshme edhe sot: ne të gjithë jemi të thirrur ta bëjmë tonën.
Me këto fjalë, Papa Leoni XIV, duke përshëndetur besimtarët polonishtfolës të pranishëm në audiencën e përgjithshme, në Sheshin e Shën Pjetrit të lagur nga shiu, kujtoi Meshën e parë të papnisë së Gjon Palit II.
Ishte 22 tetori 1978 kur, në homelinë e tij të parë si Ipeshkëv i Romës, Wojtyła i bëri thirrje mbarë botës “t’ia hapë dyert për Krishtin”.
Kjo shprehje u bë, më vonë, shenjë dalluese e papnisë së tij. E kur, më 27 prill 2014, Papa Françesku e shenjtëroi Gjon Palin II, Kongregacioni i atëhershëm për Adhurim Hyjnor vendosi që përkujtimi liturgjik i Papës polak të festohej më 22 tetor, në vend të ditës së vdekjes së tij, 2 prill.
Risim i bashkëpunimit në misionin e Kishës
Në përfundim të audiencës, Papa kujtoi se “muaji tetor na fton të përtërijmë bashkëpunimin tonë aktiv në misionin e Kishës”.
“Me forcën e lutjes, me potencialin e jetës martesore dhe me energjinë e freskët të rinisë, qofshi misionarë të Ungjillit, duke ofruar mbështetjen tuaj konkrete për ata që ia kushtojnë jetën ungjillëzimit të popujve”, tha ai, duke iu drejtuar të rinjve dhe të sapomartuarve.
Falënderim “Miqve të Atit të Shenjtë”
Duke përshëndetur besimtarët anglishtfolës, Leoni XIV falënderoi veçanërisht grupin donator “Miqtë e Atit të Shenjtë” nga Britania e Madhe lidhur me dhurimin e “studios së lëvizshme për përdorim nga shërbimet informative të Vatican News”.
