Të hënën qytetarët i japin ultimatum, Berisha: Edi Rama duhet të largohet!
Dorëheqja e Edi Ramës është kushti i të gjitha kushteve që Shqipëria të rigjejë paqen që meriton, tha sot Kryetari i Partisë Demokratike, Sali Berisha, në një bashkëbisedim me qytetarët në rrjetet sociale ku u shpreh i hapur për Adritaik Lapajn dhe Agron Shehajn, por vlerësoi se ambiguiteti i tyre tregon se janë opozitë e opozitës
Zgjidhja e vetme ligjore dhe kushtetuese kundër kësaj qeverie, ishte i prerë Kryetari i Partisë Demokratike, është qytetari shqiptar me revoltën dhe zemërimin e tij.
“Edi Rama rrugën ligjore e mbylli. E mbylli sepse në këtë vend, si fjalë e fundit është Gjykata Kushtetuese të cilën ai, po të përdor një term figurativ, e ekzekutoi të parën dhe e asgjësoi me korrupsion të paimgjinueshëm.
Kështu që zgjidhja e vetme ligjore dhe kushtetuese është qytetari shqiptar me revoltën dhe zemërimin e tij. Ai tani ka të drejtë në ligj, kushtetutë e moral, të marrë çdo hap, të përdorë çdo mjet për largimin e kësaj bande nga pushteti, pasi kjo bandë është faktuar se nuk ka asnjë legjitimitet.
Dua të ju them qytetarëve, siç dëgjuan për AKSHI-n, kopshtin privat të Edi Ramës, që është një dosje edhe më e zezë se sa tuneli i Llogarasë dhe dosjet që janë paraqitur gjer sot për Lubi Ballukun, por ndër të tjera, tek AKSHI është një ndër mekanizmat kriminal më kryesorë të grabitjes së votës.
Aty është gatuar dhe fermentuar i tërë procesi i manipulimit dhe plaçkitjes së votave të shqiptarëve,” tha Sali Berisha ndërsa protestën e së hënës e konsideroi si ditë kur qytetarët i japin ultimatum Edi Ramës, se duhet të largohet që Shqipëria të rigjejë paqen e merituar.
“Nga protesta e të hënës, qytetarët shprehin revoltën e tyre dhe japin ultimatum Edi Ramës.
Edi Rama duhet të largohet.
Dorëheqja e Edi Ramës është kushti i të gjitha kushteve që Shqipëria të rigjejë paqen që meriton.”
Qytetarë të shumtë ishin të interesuar për opozitarët e shfaqur së fundi, Lapaj dhe Shehaj, ashtu siç u shfaqën para zgjedhjeve të 11 Majit dhe përçanë opozitës, dhe Berisha sqaroi se Lapaj u ftua të ishte i pranishëm në protestën e PD-së, por ai refuzoi.
“Unë e kam mbështetur publikisht jo njëherë, por disa herë dhe e kam përgëzuar Lapajn për protestën e tij. Natyrisht ai përfaqëson një parti politike dhe protestën e bazon tek partia e tij.
PD siç e patë ju, filloi protestën e saj të fuqishme, ka filluar protestën e saj javore para kryeministrisë me qëllim dhe e dyta në parlament.
Me datën 22 PD dhe elektorati, mbështetësit, aleatët e saj janë në shesh.
Për ta ditur Lapaj është ftuar të ishte i pranishëm në protestën tonë, madje edhe mund të fliste, por ai ka programuar protestën për partinë e tij,” kryedemokrati duke u shprehur të hapur si për Lapajn ashtu dhe Shehajn, por sqaroi se ambiguiteti i tyre tregon se janë opozitë e opozitës.
“Ne kemi ftuar të gjithë partitë. Ka një problem, opozitë dhe pseudopozitë apo opozitë e opozitës.
Ju e patë kur përfundoi Shabani, në gjirin e Edi Ramës. Pretendonte se është opozitë.
Unë përshëndes zotin Lapaj që proteston aty, jep shembull personal.
Jemi të hapur ndaj partisë së tij, jemi të hapur ndaj partisë së zotit Shehaj, por ambiguiteti i tyre dhe krahasimi që bëjnë midis PD dhe PS, midis Edi Ramës dhe Sali Berishës, dëshmon se janë në një pozicion opozite e opozitës.
Se të krahasosh PD-në apo udhëheqjen e PD me të PS-së, në një farë mënyrë direkt apo indirekt, i bën shërbim asaj partie në një kohë kur ke qenë në këtë parti dhe i njeh shumë mirë gjërat,” tha lideri i opozitës duke e cilësuar protestën e së hënës si fillimin e madh të stinës, e cila ndalet vetëm me largimin e Edi Ramës.
“Protesta të hënën është fillimi i madh i stinës, e cila ndalet vetëm me largimin e Edi Ramës.
Ne dalim në protestë të hënën për të shënuar fillimin e revoltës popullore për largimin e Edi Ramës,” tha Kryetari i Partisë Demokratike duke ftuar qytetarët që në protestën e 22 Dhjetorit të tregojnë para shqiptarëve dhe botës zemërimin e thellë.
“Për fatin më të keq, në qoftë se ka një sektor… se këtu njerëzit me të drejtë duartrokasin veprimet që bën prokuroria speciale kundër ministrave, por ama të mos harrojmë se në këtë kohë kur miliardat vidhen apo futen nga droga, janë sekuestruar gjithsej 60 milionë euro. 60 milionë euro janë sa një kafe.
Do merrni vesh dhe do mësoni të dashur qytetarë gjëra që kurrë nuk mund të mendoni se mund të ndodhnin në një shtet. Por këto janë në zhvillim. Ne na takon të ndahemi një minutë e më parë,” tha Kryetari i Partisë Demokratike, Sali Berisha, ndërsa përfundoj me një ftesë:
“Ndaj dhe u ftoj që me 22 dhjetor të tregojmë para shqiptarëve dhe botës zemërimin tonë të thellë, revoltën tonë shpirtërore, protestën e fuqishme kundër kësaj organizate kriminale që ka vjedhur Shqipërinë dhe shqiptarët në 12 vite në ato proporcione që ka vjedhur Bokaso, Mobutu apo Gedafi vendet e tyre.”
