Pas takimit me Kurtin, Sorensen: Kosova nis zbatimin e Ligjit për të Huajt më 16 Mars, me masa shtesë

Pas takimit me Kryeministrin e Kosovës, Albin Kurti, Përfaqësuesi i Posaçëm i BE-së për Dialogun Kosovë-Serbi, Peter Sorensen, tha se mirëpret angazhimin e Kosovës për zbatimin gradual të Ligjit për të Huajt dhe Ligjit për Automjetet në përputhje me marrëveshjet e dialogut.

“Patëm një takim të mirë këtë mëngjes, ku mirëpritëm angazhimin e Kosovës për zbatimin e ligjit dhe vendimin e dhjetorit për të zbatuar gradualisht Ligjin për të Huajt dhe Ligjin për Automjetet, gjë që mundëson një fushatë gjithëpërfshirëse dhe të qasshme për të gjithë ata që preken,” u shpreh Peter Sorensen duke theksuar se janë marrë parasysh planet e Qeverisë së Kosovës për integrimin e shërbimeve dhe institucioneve brenda kornizës ligjore të Kosovës, në harmoni me marrëveshjet e arritura në dialog dhe angazhimet ndaj BE-së.

“Ne marrim parasysh planet e Qeverisë për të integruar shërbimet, institucionet shëndetësore dhe arsimore brenda kornizës së Kosovës, në përputhje me marrëveshjet e mëparshme të dialogut dhe angazhimet e BE-së. Angazhimi ynë përfundimtar është që zbatimi i ligjeve të lartpërmendura të lejojë një shërbim publik pa ndërprerje,” tha Përfaqësuesi i Posaçëm i BE-së për Dialogun Kosovë-Serbi, ndërsa nënvizoi rëndësinë e konsultimeve të strukturuara me përfaqësuesit e komunitetit gjatë gjithë procesit dhe bashkëpunimin e ngushtë me përfaqësuesin e BE-së për dialogun.

“Kemi këmbëngulur në konsultime të strukturuara me përfaqësuesit e komuniteteve të Kosovës për të siguruar mbështetjen e tyre. Një prioritet kyç është që Qeveria e Kosovës të sigurojë leje qëndrimi për punëtorët dhe studentët për një periudhë fillestare prej 12 muajsh, me qëllim parandalimin e ndërprerjes së shërbimeve shëndetësore dhe arsimore. Po ashtu, u kërkua që të lejohet përdorimi i letërnjoftimeve të lëshuara deri më 15 mars 2026 nga Serbia si mjet identifikimi për proceset administrative,” tha Përfaqësuesi i Posaçëm i BE-së për Dialogun Kosovë-Serbi, Peter Sorensen, duke konfirmuar se paralelisht, ai theksoi se Qeveria e Kosovës duhet të regjistrojë individët që plotësojnë kushtet në sistemin qendror të regjistrit civil, në përputhje me të drejtat e tyre të gjendjes civile.

Ndërkohë Ambasadori i BE-së në Kosovë, Aivo Orav, bëri të ditur se është rënë dakord për nisjen e zbatimit të Ligjit për të Huajt dhe Ligjit për Automjetet, duke përfshirë masa shtesë përmbajtësore.

“Zbatimi i Ligjit për të Huajt do të fillojë nga nesër. Pas bisedimeve intensive me Qeverinë e Kosovës gjatë javëve të fundit, është arritur pajtimi për zbatimin e ligjit me disa masa shtesë përmbajtjesore, veçanërisht për regjistrimin e banorëve serbë të Kosovës dhe personave me leje qëndrimi të përkohshme.”

Kryeministri Kurti: Nuk ka arsye për frikë!

Ndërsa Kryeministri i Kosovës, Albin Kurti, e bëri të qartë se Ligji për të Huajt dhe Ligji për Automjetet do të fillojnë të zbatohen nga 16 marsi, ndërsa tha se asnjë qytetar i vendit nuk ka arsye të frikësohet nga ky proces. Përkundrazi, qytetarët, sipas tij, duhet të përfitojnë nga mundësitë dhe benefitet që ai sjell.

I gjithë procesi, tha Kryeministri i Kosovës do të zhvillohet në koordinim të ngushtë me Përfaqësuesin Special të BE-së dhe me përfaqësuesit e komunitetit serb lokal.

“Qëllimi final i inkorporimit nuk është kufizimi i ndonjë të drejte, por fuqizimi i tyre. I gjithë ky proces do të bëhet në koordinim të ngushtë me Përfaqësuesin Special të BE-së për Dialog dhe në koordinim të vazhdueshëm me serbët lokalë. Për ne është me rëndësi që gjatë legalizimit, qytetarët serbë të besojnë në përfitimet nga procesi dhe detyrimet që burojnë nga marrëveshjet e Brukselit dhe korniza ligjore e Kosovës,” tha Albin Kurti duke siguruar se Qeveria do të kujdeset që gjatë këtij procesi të mos ketë pengesa në ofrimin e shërbimeve bazike, veçanërisht në arsim dhe shëndetësi.

“Jam i sigurt se të gjithë ne do të dalim fitues nga zbatimi i këtyre dy ligjeve. Besoj fuqishëm se më së shumti do të përfitojnë ata të cilëve u drejtohet ky ligj, qytetarët e huaj, të cilëve rregullat e përcaktuara me ligj do t’u ofrojnë më shumë siguri gjatë qëndrimit, më shumë parashikueshmëri dhe më shumë efikasitet gjatë përpunimit të aplikimeve të tyre,” tha Kryeministri Kurti duke e bërë të qartë se qytetarët që vijnë nga Lugina e Preshevës nuk duhet të shqetësohen sepse qëllimi i ligjit nuk është ndërprerja e shërbimeve, por legalizimi i tyre brenda kornizës ligjore të Kosovës.

“Nga zbatimi i këtij ligji do të preken edhe qytetarët që vijnë apo qëndrojnë në Kosovë nga Presheva, Medvegja, Bujanoci dhe qytetet e tjera të Serbisë. Shumë prej tyre janë të angazhuar në ofrimin e shërbimeve shëndetësore dhe edukative në sistemin paralel të financuar nga Serbia.

Dua të theksoj fuqishëm se nuk është interesi i Kosovës që zbatimi i ligjit të krijojë pengesa në ofrimin e shërbimeve bazike, por po ashtu nuk duhet të ekzistojnë mekanizma ilegalë të financuar nga një shtet që nuk e njeh Republikën e Kosovës,”

Duke fol për rëndësinë e inkorporimit të plotë të sistemit arsimor dhe atij shëndetësor në komunat me shumicë serbe, Kurti tha se kjo do të përkthehet në më shumë cilësi shërbimesh, më shumë financim, prezencë dhe siguri për qytetarët.

Qeveria do të pajiset me listat e stafit akademik dhe shëndetësor për dhënien e lejeve të përkohshme të qëndrimit 12 mujor, ndërsa e njëjta procedurë do të vlejë edhe për studentët e huaj.

“Studentët e huaj që qëndrojnë në Kosovë për qëllime studimore do të regjistrohen nga krerët komunalë dhe, pas aplikimit të suksesshëm, do t’u ofrohet leje e përkohshme qëndrimi me afat 12 muaj, me mundësi vazhdimi në rast të vazhdimit të studimeve. E njëjta procedurë do të aplikohet edhe për aplikantët e rinj në vitet akademike të ardhshme,” tha Kryeministri i Kosovës duke bërë të ditur se gjatë periudhës së aplikimit, kartat e identifikimit të lëshuara nga strukturat jo legale do të pranohen për identifikim ndërsa përfundoi me saktësimin:

“Ministria e Punëve të Brendshme do të nxjerrë udhëzime të detajuara për regjistrimin e këtyre të dhënave brenda sistemit qendror të regjistrit civil të Kosovës.”