Ra kjo dhunë e Kryeministrit të Zegjinesë dhe e pamë…
Kjo foto nuk është zgjedhur pa qëllim për të simbolizuar dhunën e protestës së mbrëmshme të opozitës, që detyroi Policinë e Edi Ramës të shkaktoj dhunë dhe dhimbje aq të madhe ndër shqiptarë që guxuan të protestojnë, pasi ajo është zgjedhur nga kokat e mëdha të Laboratorit të Propagandës së Qeverisë së Zegjinesë, RTSH, kur dhuna kishte arritë kulmin!
Dhe, cila ishte kjo “pikë kulmore”?! Dy molotov të vetëm dhe disa fishekzjarre, si kulmi i dhunës opozitare i dhanë të drejtën Policisë së Edi Ramës të nisin inkuizicionin kundër atyre që mendojnë ndryshe dhe kishin filluar të largohen nga protesta, pa kursyer jetën e asnjërit, si rasti i deputetit Luçiano Boçi, dhe atij që guxoi ta ndihmoj këtë deputet ndërsa ishte sulmuar, aktivisti Aulon Kalaja!
Më pas viktimat filluan të renditen dhe të mbushin spitalet e kryeqytetit me protestuesit që e kishin dëgjuar një ditë më parë konfirmimin nga Policia e Edi Ramës se u lejohet protesta nga 19:00-22:00 h, ndërsa filluan të goditen nga kafshët e pushtetit kur akrepat ishin larg edhe orës 21:00!
Dhe jo vetëm kaq! U goditën edhe nga njerëz pa uniformë, u tërhoqën zvarrë nga ky llum patronazhistë i cili vazhdoi dhe guxoi të arrestoj njerëz nëpër trotuaret e kryeqytetit sepse askush nuk po i kundërshtonte!
Çuditërisht as kafshët shqiptare të rrjeteve sociale të cilët në masë të madhe reaguan për dhunën e Imperializmit Amerikan në Teheran, nuk ishin të shqetësuar me dhunën e Imperializmit të Edi Ramës në qendër të Tiranës dhe po gajazeshin me shpirtin e këputur të Zegjinesë në rrjetet sociale!
Ndërkohë televizionet kombëtare dhe jo vetëm nën kontrollin e Edi Ramës, ndryshe nga shqetësimi që kishin me pallatin që po digjej te QSUT disa netë më parë dhe nuk po shikonin deputetë të opozitës që reagojnë, nuk u shqetësuan për reagimet kriminale të deputetëve të mazhorancës kur deputetët e opozitës po rriheshin si kafshë nga Policia e Kryeministrit të Zegjinesë, ndërsa më shumë ujë kishte për të fikur një molotov se sa një pallat që po digjej pa mëshirë nga flakët!
Dhe, kur, jemi te flakët, asnjëri nga anëtarët e 35 familjeve që iu dogj apartamenti për teket e pushtetarëve të Edi Ramës, nuk reagoi të paktën për mospërdorimin e topit të ujit tek halli i tyre, kur u pa në protestë aftësia e tij me hedhjen e ujit dhjetëra metra, distancë të cilën nuk e mbërriti dot ai zjarrfikësi i shkretë mbi shkallë dhe zorrën e shpuar ndërsa po shikonte se si pallati pas asnjë kusht kundër zjarrit, po i digjej para syve!
Ra kjo dhunë e Kryeministrit të Zegjinesë dhe e pamë se edhe arsyetimet tjera për përdorimin e dhunës policore për shkak të protestave të dhunshme të opozitës, ishin një mashtrim i Edi Ramës si gjithë të tjerat, pasi inkuizicioni i policisë filloi pas gjuajtjes së vetëm një molotovi i cili u fik ma shpejtë se sa u gjuajtë!
Ra kjo dhunë e Kryeministrit të Zegjinesë dhe e pamë se njëri prej deputetëve, Luçiano Boçi, u godit pa prekur njeri por vetëm se u foli policëve, madje neutralizimi me gaz lotësjellës hodhi poshtë të gjitha mashtrimet e mëparshme të Policisë së Shtetit se deputetët e dhunuar të opozitës kishin goditur policinë në krye të detyrës!
Ra kjo dhunë e Kryeministrit të Zegjinesë dhe e pamë se Policia e Edi Ramës dhunon edhe ata që ndihmojnë këta deputetë të dhunuar nga policia, si rasti i Aulon Kalasë, të cilit iu rrezikua edhe jeta!
Ra kjo dhunë e Kryeministrit të Zegjinesë dhe e pamë që të gjitha televizionet kombëtare dhe jo vetëm janë nën kontrollin e Edi Ramës, sepse të gjitha pa përjashtim, nuk pasqyruan as momentin kur filloi inkuizicioni i kësaj policie kriminale dhe nuk kishte dhunë, as fundi i tij ndërsa familjarët e viktimave po vërdalloseshin nëpër spitale, kur u pa në orën 00:00 se dikush po festonte me fishekzjarre por nuk u pa njeri të tërhiqen zvarrë si “njerëzit e Saliut”!
Ra kjo dhunë e Kryeministrit të Zegjinesë dhe e pamë se kafshët shqiptare të rrjeteve sociale që u shqetësuan aq shumë ndaj dhunës që vërejtën ndaj popullit iranian në Teheran dhe akuzonin me të madhe Imperalizmin Amerikan, mbrëmë ishin tretur! Dhuna ndaj popullit shqiptarë për ta nuk konsiderohet dhunë edhe në qendër të Tiranës, ndërsa mbyllin sytë kur shohin Imperalizmin Kriminal nga viti 2013 sepse Edi Rama nuk u ka dhënë leje ta shohin!
Ra kjo dhunë e Kryeministrit të Zegjinesë dhe e pamë se policë të plagosur gjithmonë ishin sajesë e Edi Ramës, pasi mbrëmë për shkak të rasteve të shumëta dhe njerëzve prezent nëpër spitale u arrit të evidentohet se “policët e plagosur” shkojnë në spitale pas protestës si në darkën e vitit të ri, dhe shfaqen para kamerave me allçi dhe fasho!
Ra kjo dhunë e Kryeministrit të Zegjinesë dhe e pamë se Edi Rama është në panik edhe kur protesta është me numër shumë më ulët të pjesëmarrjes se herë të tjera, pavarësisht se çfarë i thonë Vjollca, Sandri e Carlo!
Ndryshe, dy molotov nuk mund të ishin arsye për të arrestuar 11 persona, dhe për të proceduar në gjendje të lira 15 të tjerë, siç thotë zyrtarisht Policia e Shtetit mes tyre edhe dy të mitur.
Dhe, në fund, ra kjo dhunë e Kryeministrit të Zegjinesë dhe e pamë se Protesta Paqësore për të cilën vazhdon dhe flet Kryetari i Partisë Demokratike, Sali Berisha, më nuk ka kuptim!
