Refuzimi i ofertave nga opozita, Kurti: I pakuptimtë

Pas refuzimit të ofertave nga Partia Demokratike e Kosovës dhe Lidhja Demokratike e Kosovës, duke deklaruar përfundimisht se çështja për zgjedhjen e Presidentit është e mbyllur për ta, Kryeministri i Kosovës, Albin Kurti, tha se rezultati zgjedhor duhet të respektohet nga të gjitha palët.

“PDK-ja duhet ta kuptojë që i ka 22 deputetë dhe duhet ta mirëkuptojë edhe pozitën time të vështirë. Në vitin 2026 duhet të sillemi në përputhje me këtë rezultat,” tha sot Albin Kurti duke shtuar se ka ofruar disa opsione për bashkëpunim institucional, duke përfshirë edhe një ndryshim të posteve.

“I kam ofruar kryetarit Bedri Hamza që të bëhet një rrokadë mes Albulena Haxhiu dhe Vlora Çitaku. Pra, PDK-ja mund ta bëjë Bedri Hamzën kryetar të Kuvendit, ose Vlora Çitakun ndërsa  Albulena Haxhiu të marrë vendin nënkryetare,” tha Kurti duke përsëritur se përfaqësuesit e Lëvizjes Vetëvendosje kanë marrë më shumë vota se disa nga liderët e partive opozitare, dhe kjo duhet të reflektohet në ndarjen e përgjegjësive institucionale.

Në raport me LDK-në, ai tha se ka ofruar mundësi të gjera për përfshirje në qeveri.

“Kryetari i LDK-së mund të bëhet zëvendëskryeministër, por edhe ministër i Jashtëm, si dhe të marrë tri ministri të tjera. Madje, mund të bëjmë edhe rrokadë që Lumir Abdixhiku ose dikush tjetër nga LDK-ja të bëhet kryetar i Kuvendit. Oferta jonë është shumë gjeneroze,” tha lideri i LVV, Albin Kurti, duke shprehur habi për refuzimin e këtyre propozimeve nga opozita ndërsa përfundoi:

“S’është e mundshme që i refuzuan. Na kanë thënë se nuk mund të bashkëqeverisin me tri pozita, ndërsa ne u kemi thënë se do t’i kemi dy.”