Protestë Kombëtare, Berisha: Me 8 maj shqiptarët do të mblidhen në Tiranë

Me 8 maj shqiptarët do të mblidhen në rrugët dhe sheshet e Tiranës në kryengritjen e tyre më të fuqishme paqësore, tha sot Kryetari i Partisë Demokratike, Sali Berisha, duke bërë të ditur edhe datën e Protestës Kombëtare të rradhës.

“Jam sot për të informuar shqiptarët se me datën 8 maj, një ditë e rëndësishme, shqiptarët do të mblidhen në rrugët dhe sheshet e Tiranës në kryengritjen e tyre më të fuqishme paqësore që ka njohur vendi kundër kreut të organizatës kriminale dhe regjimit të tij, qeverisë së tij.
Pra, kundër Edi Ramës dhe narkoministrave,” tha Sali Berisha ndërsa akuzoi në konferencën e përjavshme, Kryeministrin Edi Rama se jo vetëm bllokoi drejtësinë për arrestimin e Belinda Ballukut për aferat korruptive, por mbrojti edhe veten me mandatet e tij.

“Bllokoi arrestimin e Lubi Ballukut, për afera të përbashkëta me Ramën të cilat me vlerësim paraprak prokurori caktoi 36 vite burg kërkesën e tij dhe natyrisht dhe nuk ishin më pak për Ramën në atë mes. Pasi me mandatet e tij të krimit mbylli, bllokoi arrestimin e saj për të mbrojtur veten e vet, pasi afera të tjera të mëdha korruptive kanë dalë në dritë dhe drejtësia është tërësisht e paralizuar”, tha Berisha mes të tjerash,” tha lideri i opozitës duke fol edhe për denoncimet që i janë bërë qeverisë nga opozita në Bruksel, por edhe informimin e BE-së me çështjet që po heton drejtësia dhe pengimi që po i bën asaj Rama.

“Pasi në Bruksel fantazma e Ramës dhe Lubi Ballukut të pranishme në një seri mbledhjesh nga marsi gjer në 18 prill, në të cilat është diskutuar raporti i ndërmjetëm për standardet dhe kriteret themelore për Shqipërinë dhe ka mbetur në klasë. Rama po pengon drejtësinë,” tha Berisha por shpresa e vetme në këtë situatë dramatike është reagimi dhe përgjigja e fuqishme qytetare.
“Edi Rama bllokoi drejtësinë. Edi Rama de facto për të shpëtuar lëkurën e tij, iu tha plaç partnerëve tanë ndërkombëtarë, të cilët kërkojnë absolutisht me të drejtë, funksionimin e shtetit ligjor, funksionimin e luftës kundër korrupsionit dhe respektimin e vendimeve të drejtësisë, u deklaroi shqiptarëve se çështja Balluku është e mbyllur.
Unë ftoj çdo shqiptar të mos pranojmë të mbyllim kurrë atë çështje. Vendi po shkatërrohet çdo ditë e më shumë. Shqiptarët po largohen çdo ditë e më shumë. Gjithçka bëhet e pashpresë në qoftë se ne nuk ngrihemi fuqishëm me zërin tonë.”

E pashmangshme ishte çështja AKSHI duke theksuar se pas saj qëndron Kryeministri Edi Rama me bashkëshorten e tij.

“Qytetarët kanë dëgjuar se afera e AKSHI-t është një nga aferat më të zeza, më të mëdha në historikun e regjimit të hajdutëve të Ramës. Kjo aferë të cilën Rama mburrej me AKSHI-n, e quante atë histori suksesi, rezulton të jetë historia më mafioze në historinë e një shteti. Më mafioze.

Strumbullari i të gjithë kësaj afere është çifti Rama, Edi dhe Linda Rama sepse përfituesi i qindra tenderave për të cilët janë marrë peng biznesmenë, për të cilët AKSHI është shndërruar në pishinën e peshkaqenëve, sic thotë peshkaqeni Ermal Beqiri, strumbullari është Armand Frangu, baxhanaku i Linda Ramës,” tha Kryetari i Partisë Demokratike duke bërë thirrje të lënë mënjanë çdo mosmarrëveshje dhe pakënaqësi dhe të bashkohen, sepse 8 Maji duhet të jetë dita e shqiptarëve.

“Të dashur qytetarë dhe qytetare, u bëj thirrje edhe ju që heshtni, por që shpirtërisht nuk aprovoni kurrë këto vjedhje monstruoze dhe këto qëndrime çnjerëzore ndaj kombit që mban Edi Rama.
Të lëmë mënjanë çdo pakënaqësi.
Të lëmë mënjanë çdo mosmarrëveshje dhe të bashkohemi në këtë kryengritje të fuqishme si shpresa e vetme e shqiptarëve.
Kryengritja e cila synon të bashkojë të gjithë shqiptarët pavarësisht nga moshat, pavarësisht se mund të jenë të bindjeve të ndryshme politike, por që gjykojnë se vjedhjet e tmerrshme të qeveritarëve po shkatërrojnë financat e tyre, po shkatërrojnë vendin e tyre,” tha Kryetari i Partisë Demokratike, Sali Berisha duke përfunduar:
“8 maji duhet të jetë dita e shqiptarëve. E protestës së tyre më të fuqishme.
Unë kam besim se do japim me 8 maj mesazhin më të fuqishëm ndaj këtij regjimi bandit dhe hajdut.”