Dita e Shenjtërimit të Nënë Terezës, Ambasada e SHBA: Përfaqëson më të mirën tek të gjithë ne!
Sot, në Ditën e Shenjtërimit të Nënë Terezës, Ambasada e Shteteve të Bashkuara në Tiranë duke vlerësuar kontributin dhe përkushtimin e saj ndaj njerëzve më në nevojë, thekson se Nënë Tereza ia kushtoi jetën të varfërve, të sëmurëve dhe të harruarve, duke përcjellë një mesazh të fortë për vlerën e shërbimit ndaj të tjerëve.
“Sot, kujtojmë Shenjtërimin e Nënë Terezës, një grua që ia kushtoi jetën e saj më të varfërve, të sëmurëve dhe të harruarve, duke i kujtuar botës se madhështia gjendet te shërbimi, jo te statusi,” thekson Ambasada e SHBA në Tiranë në reagimin e saj përmes rrjetit social Facebook ndërsa e mbyllë me vlerësimin e Presidentit amerikan Donald Trump për Nënë Terezën:
“Ajo përfaqëson më të mirën tek të gjithë ne!”
Ndryshe sot, më 5 shtator, Kisha katolike kremton festën liturgjike të Shenjtes shqiptare Nënë Terezës.
Më 4 shtator 2016, Papa Françesku e bëri murgeshën shqiptare të pavdekshme në sytë e katolikëve, por edhe të gjithë botës.
Anjezë Gonxhe Bojaxhiu, emër të cilin e ndërroi në Nënë Tereza, lindi më 1910 nga prindër shqiptarë.
Në moshën 18-vjeçare ajo u largua nga Shkupi, Maqedonia e Veriut, për t’ju bashkuar Motrave Loreto në Irlandë, dhe prej asaj dite nuk do i shihte më prindërit.
Misioni i saj u transferua në Kalkutë. Aty ajo ndjeu se kish në ardhur në botë për t’u shërbyer të varfërve dhe njerëzve në fund të jetës në rrugët e qytetin indian.
“Me gjak jam shqiptare. Me nënshtetësi jam indiane. Me besim jam murgeshë katolike. Zanati im është që t’i përkas botës. Ndërsa zemra ime i takon e tëra Zemrës së Jezusit,” do të shprehej Nënë Tereza.
Ajo e vizitoi Shqipërinë për herë të parë në gusht të vitit 1989, ndërkohë që dhjetë vite më herët, në 1979-ën, fitoi Çmimin Nobel për Paqe.
Shën Tereza njihet për disa mrekulli.
E para është rasti i Monica Besra në Bengal të Indisë, e cila kishte një ënjtje tumorale indesh prej 16 cm në fund të barkut, e patrajtueshme nga doktorët.
“Më 5 shtator, në përvjetorin e vdekjes së Nënë Terezës, Kryemurgesha mori medaljen e Marisë që kishte qenë direkt në kontakt me trupin e Nënë Terezës në kohën e funeralit, e vendosi mbi stomakun e Monikës dhe bëri një lutje të thjeshtë: ‘Nënë, sot është dita jote. Ti i do të varfrit. Bëj diçka për Monikën.’“
Rreth 8 orë më vonë, tumori i Monikës u zhduk plotësisht.
Mrekullia e dytë është shërimi i Marcilio Andrinos në vitin 2008.
Truri i tij kishte pësuar një infeksion, duke krijuar absese të shumta. Gruaja e tij, Fernanda, do të vendoste një relike të Nënë Terezës në kokën e bashkëshortit, duke u lutur që ta shërojë. Më 9 dhjetor 2008 ai hyri në koma pas një dhembjeje të fortë, por ditën tjetër doktori që do e operonte pa që Marcilio ishte zgjuar dhe skaneri zbuloi ditë më vonë se edhe sëmundja e tij nuk ishte më.
Dita e Shenjtërimit të Nënë Terezës, 5 Shtatori, është festë zyrtare në Shqipëri.
